ខេត្តកំពត ៖ប្រភពពតិ័មាន ពីខេត្តកំពតបានឲ្យដឹងថា មួយថ្ងៃៗមានឈ្មួញ ទាំងតូចទាំងធំ រកស៊ីដឹកជញ្ជូនប្រេងសាំងគេចពន្ធ តាមរថយន្តនិងតាមទូក ចូលដែនសមុទ្រខេត្តកំពត មិនដែលមាននរណាហ៊ានត្រួតពិនិត្យ ទិន្នន័យជាក់ស្តែង ឈ្មួញធំៗ ៦នាក់បច្ចុប្បន្ន កំពុងធ្វើសកម្មភាពដឹកជញ្ជូនប្រេងសាំងគេចពន្ធ យ៉ាងគគ្រឹកគគ្រេង មកពីចំណុចកោះខ្យង និងកោះរ៉ុង ចូលមកស្រុកព្រៃនប់ ខេត្តព្រះសីហនុ ដើម្បីដឹកជញ្ជូនតាម រថយន្តកាមរី និងរថយន្តទួរីស មកលក់ចែកចាយ នៅទូទាំងខេត្តកំពត។ ជំនាញគយរបស់លោក សំ សុខា ក៏បានដាក់ប៉ុស្តិ៍ជជុះ តាមដងផ្លូវជាច្រើនកន្លែងផងដែរ ប៉ុន្តែមិនដែលឃើញ មានសកម្មភាពត្រួតពិនិត្យ ឬបង្ក្រាបការដឹកជញ្ជូនប្រេងសាំងគេចពន្ធ ដ៏អនាធិបតេយ្យនោះម្តងណាឡើយ ព្រោះគេដឹងថាឈ្មួញធំៗទាំង ៦នាក់នោះ បានទំនាក់ទំនងបង់លុយ ជាប់ជាប្រចាំឲ្យជំនាញគយ របស់លោក សំ សុខា និងក្រុមសមត្ថកិច្ច ពាក់ព័ន្ធដទៃទៀត។ បច្ចុប្បន្ននេះ លោក សំ សុខា ជាប្រធានសាខាគយនិងរដ្ឋាករ ប្រចាំខេត្តកំពត ដែលសឹងក្លាយជា ស្តេចត្រាញ់ទៅហើយនោះ កំពុង យកកំណែទម្រង់ស៊ីជម្រៅ របស់រាជរដ្ឋាភិបាល ទៅធ្វើជាលេសក្នុងការ កោសរូស ឲ្យក្រុមឈ្មួញ បង់លុយតាមតែអំពើចិត្ត មិនដែលខ្វល់ពីការរឹតបន្តឹង លើការប្រមូលពន្ធឲ្យបាន ១០០ភាគរយនោះទេ ហើយមន្ត្រីជាច្រើន ក៏បានលួចបង្ហើបឲ្យដឹងផងដែរថា លោក សំ សុខា បានបង្កើតទីតាំងស្តុកប្រេង ដ៏ធំមួយកន្លែងនិងស្ថានីយ៍លក់សាំង នៅកណ្តាលក្រុងកំពត ដែលមានតម្លៃថោកជាងស្ថានីយ៍ដទៃ ក៏ព្រោះតែគាត់មានអំណាច ប្រមូលក្រុមអ្នករកស៊ីដឹកជញ្ជូនប្រេងសាំងគេចពន្ធ ឲ្យយកទៅលក់ជូនគាត់ក្នុងតម្លៃថោកៗ។ ដោយឡែក សម្រាប់ការដឹកជញ្ជូនទំនិញ ភាគច្រើនស្ករស គ្រឿងសំណង់ ចូលតាមខេត្តកំពត គឺជំនាញគយ របស់លោក សំ សុខា ជួយសម្របសម្រួល ឲ្យមានការបង់ពន្ធ តិចតួចប៉ុណ្ណោះចូលរដ្ឋ តាមរយៈការឃុបឃិត លួចបន្លំពន្ធតាមជំនាញបច្ចេកទេស ពោលគឺឈ្មួញធំៗដែលមានទំនាក់ទំនងល្អ ជាមួយលោក សំ សុខា អាចធ្វើអ្វីៗតាមតែទំនើងចិត្ត មិនដែលក្រែងញញើត ពីការកែទម្រង់ស៊ីជម្រៅស្អីនោះទេ។ ក្នុងអំណាចជាមេគយ ប្រចាំខេត្តកំពត លោក សំ សុខា បានអួតអាងប្រាប់គេឯងថា គាត់ស្វែងរកផលប្រយោជន៍ តាមគ្រប់មធ្យោបាយយកទៅ ជួយលោក ប៉ែន ស៊ីម៉ន ចុះពង្រឹងមូលដ្ឋាន ។
សម្រាប់ការដឹកជញ្ជូនទំនិញ ឆ្លងកាត់ព្រំដែនខេត្តកំពត ចេញទៅស្រុកយួន ដូចជាឈើប្រណីត កសិផល ជាដើម សុទ្ធតែមានទំនាក់ទំនង បង់លុយជូនលោក សំ សុខា ដូចជានៅច្រកទាន់ហន់ ច្រកព្រែកចាក រួមទាំងច្រករបៀងជាច្រើនកន្លែង។ សូម្បីតែការនាំគោ ចេញទៅលក់នៅស្រុកយួន ក៏ជំនាញគយរបស់លោក សំ សុខា ចាំរាប់ចំនួនយកលុយហើយការនាំចូលទំនិញខុសច្បាប់មួយចំនួន ដូចជាត្រីឆ្តោ ឬប្រភេទចំណីអាហារ ដែលមានប្រឡាក់ជាតិថ្នាំគីមី មានជាតិពុល នាំមកពីស្រុកយួន ក៏អាចដឹកជញ្ជូនឆ្លងកាត់ ទឹកដីខេត្តកំពត យកមកលក់ចែកចាយ ដល់រាជធានីភ្នំពេញ យ៉ាងរលូនល្អ ឲ្យតែបង់លុយជូនលោក សំ សុខា និងសមត្ថកិច្ចពាក់ព័ន្ធ ដែលប្រចាំការតាមដងផ្លូវ យ៉ាងប្រសេចប្រសាច ពោលគឺមន្ត្រីទាំងនោះ មិនដែលខ្វល់ខ្វាយពីការបង្ក្រាប ម្តងណាឡើយ ឲ្យតែក្រុមឈ្មួញយល់ព្រមបង់លុយ ទៅតាមការតម្រូវរបស់ពួកគេ។
ក្នុងនាមជាមេគយប្រចាំខេត្តកំពត លោក សំ សុខា ក៏មានជាប់ពាក់ព័ន្ធ នឹងសកម្មភាពប្រើគ្រឿងចក្រ ឈូសឆាយដីព្រៃ រាប់សិបហិកតា យកទៅធ្វើជាកម្មសិទ្ធិផ្ទាល់ខ្លួន ហើយលោក សំ សុខា បានបើកស្ថានីយ៍លក់សាំង នៅកណ្តាលក្រុងកំពត ដែលមានតម្លៃថោកជាងគេ ហើយគេដឹងថារៀងរាល់យប់ថ្ងៃ មានរថយន្តដឹកជញ្ជូនប្រេង ប្រភេទកាមរី ឬរថយន្តទួរីស ដែលដឹកប្រេងតាមប៊ីដុង យកទៅចាក់ចូលក្នុងស៊ីទែន ស្តុកប្រេងរបស់លោក សំ សុខា ដើម្បីលក់ចែកចាយគ្រប់ច្រកល្ហក ៕
