ខេត្តរតនគិរី ៖លោក សាល ដែលជាមេការ របស់លោកឧកញ៉ា ទ្រី ភាព ប្រចាំខេត្តរតនគិរីនេះ ជាមនុស្សដែលមានឥទ្ធិពល ចាំប្រមូលទិញឈើ មកពីគ្រប់ស្រុក នៅទូទាំងខេត្តរតនគិរី យកទៅស្តុកទុក តាមទីតាំងសំខាន់ៗមួយចំនួន ហើយដឹកជញ្ជូនយកទៅស្តុកទុក នៅទីតាំងដ៏ធំមួយកន្លែង នៅចំណុចភូមិប៉ក់ធំ ឃុំប៉ក់ញ៉ៃ ស្រុកអូរយ៉ាដាវ នៅក្បែរមាត់ច្រកព្រំដែន អន្តរជាតិអូរយ៉ាដាវ តែម្តង។ ប្រជាពលរដ្ឋ បាននិយាយថា ទីតាំងស្តុកឈើរបស់ឧកញ៉ា ទ្រី ភាព នៅក្បែរច្រកព្រំដែនអន្តរជាតិនេះ ធំសម្បើមណាស់ មិនដែលមាននរណាហ៊ានទៅក្បែរទេ ព្រោះលោក សាល បានចាត់ចែងរៀបចំបង់លុយ ឲ្យសមត្ថកិច្ចពាក់ព័ន្ធសព្វគ្រប់អស់ហើយ អាចដឹកជញ្ជូនឈើ និងប្រមូលទិញឈើ តាមតែអំពើចិត្ត។ ជាគោលការណ៍ក្រុមហ៊ុន របស់ឧកញ៉ា ទ្រី ភាព ទទួលបានអាជ្ញាប័ណ្ណ ប្រមូលទិញឈើគ្រប់ប្រភេទដែលបានមកពីការបង្ក្រាប របស់ជំនាញរដ្ឋបាលព្រៃឈើ ប៉ុន្តែរូបភាពជាក់ស្តែង ក្រុមហ៊ុនរបស់ឧកញ៉ា ទ្រី ភាព បានដាក់ទីតាំងប្រមូលទិញឈើ ពីប្រជាពលរដ្ឋ និងឈ្មួញតូចតាច សឹងគ្រប់ទីកន្លែង ដែលមានសកម្មភាព កាប់បំផ្លាញព្រៃឈើ។ ជាពិសេសនៅក្នុងខេត្តរតនគិរី ឧកញ៉ា ទ្រី ភាព បានបង្កើតទីតាំងស្តុកឈើ ជាច្រើនកន្លែង ដើម្បីប្រមូលទិញ ពីប្រជាពលរដ្ឋ ហើយដឹកជញ្ជូនយកទៅ ស្តុកទុកនៅមូលដ្ឋានធំ ដែលទើបតែបង្កើត កាលពីប៉ុន្មានខែមុននេះ ក្បែរច្រកអន្តរជាតិអូរយ៉ាដាវ ដែលមានឈ្មោះ សាល ជាអ្នកមើលការខុសត្រូវរួម។ ការកាប់បំផ្លាញព្រៃឈើ នៅតំបន់ការពារ និងព្រៃសហគមន៍ នៅទូទាំងខេត្តរតនគិរី កំពុងបន្តកើតមានយ៉ាងអនាធិបតេយ្យក្រុមឈ្មួញធំៗមានអំណាច មានឱកាសប្រមូលទិញឈើខុសច្បាប់ ពីប្រជាពលរដ្ឋយកទៅស្តុកទុក ដើម្បីនាំចេញទៅលក់នៅស្រុកយួន គ្មាន ច្បាប់ទម្លាប់ ឬការរឹតបន្តឹងរបស់ រាជរដ្ឋាភិបាល ។ ក្រុមហ៊ុន របស់ឧកញ៉ា ទ្រី ភាព ដែលមានលោក សាល ជាមេការមើលខុសត្រូវ បានបង្កើតទីតាំង ស្តុកឈើខុសច្បាប់ ជាច្រើនកន្លែង ក្នុងស្រុកវ៉ឺនសៃ ស្រុកអូរជុំ និងស្រុកអណ្តូងមាស ដើម្បីប្រមូលទិញឈើ ពីឈ្មួញតូចតាចទាំងយប់ទាំងថ្ងៃ ប្រមូលយកទៅទុកនៅ មូលដ្ឋានដ៏ធំមួយកន្លែង ក្បែរច្រកព្រំដែន អន្តរជាតិអូរយ៉ាដាវ។ ក្រុមឈ្មួញតូចតាចមួយចំនួន ដែលប្រមូលទិញឈើ ពីប្រជាពលរដ្ឋតាមភូមិ បានដឹកជញ្ជូនតាមរថយន្តកាមរី គូថហើម ឬរថយន្តច្នៃ យកទៅលក់ឲ្យ ក្រុមហ៊ុនឧកញ៉ា ទ្រី ភាព ទាំងយប់ទាំងថ្ងៃ ទៅដល់ម៉ោងណា គេថ្លឹងឈើនិងបង់លុយ នៅពេលនោះតែម្តង មានឈើប៉ុន្មាន ក៏គេប្រមូលទិញដែរ។ សកម្មភាពដែលប្រជាពលរដ្ឋ ចូលព្រៃកាប់ឈើប្រណីត តាមតំបន់ព្រៃការពារ និងព្រៃសហគមន៍ អាចដំណើរការទៅបាន ដោយសារតែមាន សកម្មភាពប្រមូលទិញឈើខុសច្បាប់ របស់ឧកញ៉ា ទ្រី ភាព នោះឯង ហើយប្រសិនបើ រដ្ឋាភិបាលមានឆន្ទៈពិតប្រាកដ ក្នុងការបង្ក្រាប ការដឹកជញ្ជូនឈើខុសច្បាប់ ជំហានដំបូងគួរតែកោះហៅ មន្ត្រីរដ្ឋបាលព្រៃឈើខិលខូច ពុករលួយទៅដាក់ទោស និងទី២ ត្រូវបិទការប្រមូលទិញឈើ ឲ្យមានប្រសិទ្ធភាព។
ទីតាំងស្តុកឈើធំបំផុត ប្រចាំខេត្តរតនគិរី ដែលស្ថិតក្រោមការ ចាត់ចែងផ្តាច់មុខ របស់លោក សាល នៅចំណុចច្រកព្រំដែន អន្តរជាតិអូរយ៉ាដាវ មានឈ្មួញជនជាតិយួន ជនជាតិចិន ចូលមកមើលប៉ាន់ឈើ និងចុះកិច្ចសន្យានៅទីនោះជាហូរហែ។ លោក សាល មានសិទ្ធិអំណាចធំធេង ក្នុងការប្រមូលទិញឈើ និងដឹកជញ្ជូនឈើខុសច្បាប់ នៅក្នុងខេត្តរតនគិរី ហើយម្តងម្កាលគេសង្កេតឃើញលោក សាល យកអំណោយរបស់ឧកញ៉ា ទ្រី ភាព ទៅចែកជូនសមត្ថកិច្ច និងអាជ្ញាធរខេត្តយកបុង ដើម្បីរក្សាទំនាក់ទំនងល្អ និងបិទបាំងការប្រមូលទិញឈើ ខុសច្បាប់របស់ខ្លួន ៕
