ក្រុមអ្នករកស៊ីដឹកជញ្ជូនទំនិញឆ្លងកាត់ផ្លូវជាតិលេខ៥ បានលើកឡើងថា ចំណុចជញ្ជីងថ្លឹរថយន្តរបស់លោក ស៊ូ ប៊ុណ្ណារ៉ុង មិនដែលមានជញ្ជីងប្រើប្រាស់ទេ តែបើមានវិញយកទៅព្យួរតាមមែកឈើ គ្រាន់តែជាសញ្ញាសម្គាល់ឲ្យក្រុមអ្នករកស៊ីដឹកជញ្ជូនទំនិញចូលបង់លុយ មិន ខ្វល់ថា ក្រុមឈ្មួញដឹកទំនិញលើសទម្ងន់ ឬមិនលើសទម្ងន់នោះគឺត្រូវ ចូលបង់លុយ ដោយគ្មានការយោគយល់។ ប្រជាពលរដ្ឋរកស៊ីដឹកជញ្ជូនផលកសិកម្ម ដែលទទួលបានផលចំណេញតិចតួចក៏ត្រូវក្រុមជញ្ជីងថ្លឹងរថយន្តរបស់លោក ស៊ូ ប៊ុណ្ណារ៉ុង បង្គាប់ឲ្យបង់លុយយ៉ាងតិច ២០ម៉ឺនរៀល សម្រាប់រថយន្តផ្ទុកលើសទម្ងន់បន្តិចបន្តួច តែបើមិនមានផ្ទុកលើសទម្ងន់ ក៏ត្រូវបង់លុយថ្លៃក្បាលឡានចាប់ពី ៧ម៉ឺនទៅ១០ម៉ឺនរៀល ប្រសិនបើមានការសុំចុះថ្លៃ ឬប្រកែកតវ៉ាក្រុមជញ្ជីងថ្លឹងរថយន្តនោះ គំរាមកំហែងចាប់អូសយកដាក់មន្ទីរដើម្បីថ្លឹងនិងផាកពិន័យក្នុង កម្រិតខ្ពស់។
ប៉ុន្មានថ្ងៃមុននេះ អភិបាលរងខេត្តបាត់ដំបង លោក ជាម ច័ន្ទសោភ័ណ្ឌ បានដឹកនាំកម្លាំងចម្រុះត្រួតពិនិត្យចាប់ឃាត់រថយន្តដឹកទំនិញផ្ទុក លើសទម្ងន់បានចំនួន៣គ្រឿង ដើម្បីធ្វើការផាកពិន័យ ប្រមូលថវិកាជូនជាតិ ប៉ុន្តែក្រុមជញ្ជីងថ្លឹងរថយន្តក្រោមបញ្ជារបស់លោក ស៊ូ ប៊ុណ្ណារ៉ុង ដែលប្រចាំការឡើងដុះស្លែទៅហើយតាមបណ្តោយផ្លូវជាតិលេខ៥នៅចំណុច ភូមិស្វាយជំនីក ឃុំអន្លង់វិល ស្រុកសង្កែ ខេត្តបាត់ដំបង បានក្លាយជាទីតាំងជញ្ជីងថ្លឹងលុយ ឬរាប់ក្បាលដឹកទំនិញយកលុយតាមតែអំពើចិត្តមិនខ្វល់ខ្វាយពីផលប៉ះពាល់ អ្វីឡើយ។ បើទោះបីជានៅក្បែរៗទីតាំងជញ្ជីងថ្លឹងរថយន្តនោះគេសង្កេតឃើញផ្លូវ ជាច្រើនកន្លែងបានបាក់ស្រុតប្រេះស្រាំ ក៏លោក ស៊ូ ប៊ុណ្ណារ៉ុង ជាអនុប្រធានមន្ទីរសាធារណការខេត្តបាត់ដំបង ទទួលបន្ទុកជញ្ជីងថ្លឹងរថយន្តធ្វើមិនដឹងមិនឮដដែល គឺសម្ងំកើបតែលុយច្រកហោប៉ៅផ្ទាល់ខ្លួនប៉ុណ្ណោះ។សកម្មភាពរកស៊ី ដឹកជញ្ជូនទំនិញតាមរថយន្តខ្សែ ដែលភាគច្រើនផ្ទុកលើសទម្ងន់របស់ក្រុមឈ្មួញធំៗមកពីច្រកព្រំដែន ខេត្តបាត់ដំបង ឬមកពីខេត្តបន្ទាយមានជ័យសុទ្ធតែស្គាល់ចិត្តស្គាល់ថ្លើមមន្ត្រីដែល ប្រចាំការនៅចំណុចជញ្ជីងថ្លឹងរថយន្តនោះ ហើយចូលទៅបង់លុយប្រចាំខែឲ្យទៅលោក ស៊ូ ប៊ុណ្ណារ៉ុង ថែមទាំងមានការបង់លុយថ្លៃក្បាលឡានជូនក្រុមដែលប្រចាំការនៅចំណុច ថ្លឹងរថយន្តនោះ ដែលគេហៅថាជាលុយថ្លៃបាយ ក្នុងមួយរថយន្តចាប់ពី២ម៉ឺនរៀល ដល់៥ម៉ឺនរៀល។ ក្រុមអ្នករកស៊ីដឹកជញ្ជូនទំនិញបានលើកជាសំណួរថា រាល់ការបង់លុយក្រៅផ្លូវការឲ្យទីតាំងជញ្ជីងថ្លឹងរថយន្តរបស់លោក ស៊ូ ប៊ុណ្ណារ៉ុង មិនដែលមានលិខិតស្នាម ឬវិក្កយបត្រនោះទេ អាចចាត់ទុកជាអំពើពុករលួយ ហេតុអ្វីបានជាលោក ឱម យ៉ិនទៀង មិនដែលធ្វើការស៊ើបអង្កេតដោះស្រាយបញ្ហានេះ ដើម្បីកុំឲ្យក្រុមអ្នករកស៊ីដឹកជញ្ជូនទំនិញរងទុក្ខតទៅទៀត។ដោយឡែក ជញ្ជីងថ្លឹងរថយន្តមួយកន្លែងទៀត ត្រូវបានលោក ស៊ូ ប៊ុណ្ណារ៉ុង រៀបចំតាមរបៀបចល័តចុះឡើងៗ ប៉ុន្តែឧស្សាហ៍ធ្វើសកម្មភាពនៅចំណុចភូមិអូរតាគី តាមផ្លូវជាតិលេខ១០ ទីដែលមានការដឹកជញ្ជូនទំនិញច្រើនសន្ធឹកសន្ធាប់មកពីខេត្តប៉ៃលិន សុទ្ធតែរថយន្តយីឌុបខ្នាតយក្សផ្ទុកលើសទម្ងន់ ក៏ជាប្រភពចំណូលច្រើនគួរសម ដែលលោក ស៊ូ ប៊ុណ្ណារ៉ុង ប្រមូលយកទៅធ្វើមានធ្វើបានផ្ទាល់ខ្លួន និងបែងចែកថ្នាក់លើដើម្បីកុំឲ្យមានការចាប់កំហុស ឬដាក់ពិន័យ។ គេចាំបានថាលោក ហ៊ុន សែន បានណែនាំឲ្យមន្ត្រីនិងសមត្ថកិច្ចពាក់ព័ន្ធយកចិត្តទុកដាក់លុបបំបាត់ បញ្ហាធំៗចំនួន២ឲ្យមានប្រសិទ្ធភាពកុំឲ្យក្លាយទៅជាដំបៅមហារីក តទៅទៀត គឺទី១ ការដាក់ប៉ុស្តិ៍ជជុះតាមផ្លូវ និងទី២ទីតាំងជញ្ជីងថ្លឹងរថយន្តផ្ទុកលើសទម្ងន់ត្រូវតែពង្រឹង ការងាររបស់ខ្លួន កុំឲ្យមានពាក់ព័ន្ធនឹងអំពើពុករលួយជាដាច់ខាត។ គេចង់ឃើញលោក ច័ន្ទ សុផល ជាអភិបាលខេត្តបាត់ដំបង ចាត់វិធានការក្តៅដើម្បីកែទម្រង់ភាពអសកម្ម របស់ក្រុមជញ្ជីងថ្លឹងរថយន្តក្រោមបញ្ជារបស់លោក ស៊ូ ប៊ុណ្ណារ៉ុង ដែលកំពុងតែ ប្រព្រឺត្តអំពើចិត្ត ៕
