ខេត្តតាកែវ ៖តាមប្រភពពីប្រជាពលរដ្ឋបានឲ្យដឹងថា លោក វិត្ថ ធារិទ្ធ កាលពីថ្ងៃទី១២ ខែកក្កដា កន្លងទៅនេះ គេឃើញនាយរង ខណ្ឌរដ្ឋបាលជលផល ខេត្តកណ្ដាល រូបនេះ បានថយរថយន្ត ទៅក្នុងកំពង់ទូក រួចប្រមូលយកកូនត្រីគ្រប់ប្រភេទ ដែលពេលនោះ មានការសួរនាំថា យកទៅណា ? លោកឆ្លើយថា យកទៅឲ្យលោក ព្រំ វ៉ាត ជាម្ចាស់កសិដ្ឋាន ផលិតពូជត្រី នៅភូមិព្រៃសំបួរ ឃុំស្រុកអង្គរបូរី ។
មន្ត្រីដែលមានទ្រព្យសម្បត្តិស្តុកស្តម្ភម្នាក់ មានតួនាទីជានាយរង ខណ្ឌរដ្ឋបាលជលផល ខេត្តកណ្ដាល ដែលគេស្គាល់ថា ជាម្ចាស់ស្ថានីយ៍ ផលិតពូជត្រី ៧មករា ផងនោះ បានរងការចោទប្រកាន់ថា បានដឹកកូនត្រី និងកូនបង្កងពីប្រទេសវៀតណាម តាមច្រករបៀងបាក់ដៃ ក្នុងស្រុកអង្គបុរី ខេត្តតាកែវ យកមកលក់ចែកចាយ តាមកសិដ្ឋាននានា ដែលក្រុមមន្ត្រីចាត់ទុក ជាអំពើខុសច្បាប់។
ទាក់ទងទៅលោក ព្រំ វ៉ាត ជាម្ចាស់កសិដ្ឋាន ផលិតពូជត្រី ស្រាប់តែគាត់ បានឆ្លើយបដិសេធថា គាត់មិនដឹងរឿងនេះទេ។ ពាក់ព័ន្ធបញ្ហានេះ លោក សៅ កុសល នាយខណ្ឌស្តីទី រដ្ឋបាលជលផល ខេត្តតាកែវ បានឲ្យដឹងថា រឿងនាំចូលផ្សៅត្រី ពងត្រី ពងបង្កង ពីប្រទេសវៀតណាម មកក្នុងស្រុកខ្មែរ គឺជាទង្វើខុសច្បាប់ទាំងស្រុង ៕
