តាមសេចក្តីរាយការណ៍ពីប្រជាពលរដ្ឋនៅខេត្តឧត្តរមានជ័យបានឲ្យដឹងថា កន្លងមកប្រធានសាខាគយខេត្តឧត្តរមានជ័យបានឃុបឃិតជាមួយប្រធានស្នាក់ការគយច្រកអន្តរជាតិអូរស្មាច់បើកដៃឲ្យឈ្មួញខិលខូចនាំម៉ូតូគេចពន្ធចូលមកលក់ពេញខេត្តឧត្តរមានជ័យ។ ហេតុនេះហើយទើបនៅក្នុងខេត្តនេះសម្បូរទៅដោយប្រជាពលរដ្ឋដែលប្រើប្រាស់ម៉ូតូអត់ពន្ធយ៉ាងអនាធិបតេយ្យ។ អ្វីដែលគួរឲ្យងឿងឆ្ងល់នោះគឺនៅក្នុងស្រុកត្រពាំងប្រាសាទមានកន្លែងលក់ម៉ូតូគេចពន្ធរាប់ភ្លេច ប៉ុន្តែសមត្ថកិច្ចគយនិងកងរាជអាវុធហត្ថឃុបឃិតគ្នាបង្ក្រាបតែ៣កន្លែងប៉ុណ្ណោះ ចំណែកកន្លែងដទៃទៀតគេបែរជាមិនបង្រ្កាបទៅវិញ ។
មេគយខេត្តឧត្តរមានជ័យសហការជាមួយមន្ត្រីកងរាជអាវុធហត្ថស្រុកត្រពាំងប្រាសាទបង្ក្រាបទីតាំងលក់ម៉ូតូគេចពន្ធ៣កន្លែងកាលពីថ្ងៃទី២៨ ខែកក្កដា ឆ្នាំ២០១៤។ នៅក្នុងប្រតិបត្តិការបង្ក្រាបនោះរឹបអូសបានម៉ូតូចំនួន២២គ្រឿង និងនាំខ្លួនអ្នកលក់ម៉ូតូយកទៅធ្វើកំណត់ហេតុ ។
ជុំវិញបញ្ហាខាងលើនេះដែរអ្នកលក់ម៉ូតូអត់ពន្ធមួយរូបបានទទួលស្គាល់ថា គាត់ពិតជាបានលក់ម៉ូតូអត់ពន្ធដោយខុសច្បាប់មែន ហើយអ្វីដែលនឹកស្មានមិនដល់គឺសមត្ថកិច្ចតម្រូវឲ្យរូបគាត់បង់លុយក្នុងម៉ូតូ១គ្រឿងដល់ទៅ៧៥០ដុល្លារអាមេរិក។ បញ្ហានេះលោក ប៊ែនស៊ីម៉ន ដែលជាមេគយធំត្រូវតាមដានសកម្មភាពរបស់លោក ឆាយ សុធា ប្រធានសាខាគយខេត្តឧត្តរមានជ័យខ្លះផង កុំឲ្យគិតតែរឿងប្រយោជន៍ផ្ទាល់ខ្លួន ៕
