ខេត្តត្បូងឃ្មុំ ៖ មន្ត្រីទាំង ២រូប រួមមានឈ្មោះ រ៉ង រដ្ឋា អត្តលេខ១៣៤៩ និងឈ្មោះ ជន់ រចនា អត្តលេខ១៣១៤ ពោលគឺការតែងតាំងមន្ត្រីគយ ទាំងពីរនាក់នេះ ជាអនុប្រធានការិយាល័យ សាខាគយខេត្តត្បូងឃ្មុំ ត្រូវបានមន្ត្រីគយ នៅក្នុងអគ្គនាយកដ្ឋាន រិះគន់ថា ពោរពេញទៅដោយ ភាពមិនប្រក្រតី ហើយអាច ប្រព្រឹត្តអំពើពុករលួយ ។ និយាយបានថា ចំណាត់ការរបស់លោក អូន ព័ន្ធមុនីរ័ត្ន ដែលជារដ្ឋមន្ត្រី ក្រសួងសេដ្ឋកិច្ច និងហិរញ្ញវត្ថុ ក៏ដូចជាចំណាត់ការ របស់លោក ប៉ែន ស៊ីម៉ន អគ្គនាយកគយនិងរដ្ឋាករ មានអាថ៌កំបាំង ទើបមានការតែងតាំងមន្ត្រីថ្មីៗ ។
ប្រភពពីរក្រសួងសេដ្ឋកិច្ច និងហិរញ្ញវត្ថុ ចុះថ្ងៃទី១៦ ខែមិថុនា ឆ្នាំ២០១៤ អំពីការតែងតាំង ផ្ទេរភារកិច្ចមន្ត្រីគយ ចំនួន ១៣នាក់ក្នុងនោះ មានភ្នាក់ងារគយ ៨នាក់ និងមន្ត្រីរាជការគយ ៥នាក់ ព្រមទាំងតែងតាំងដំទ្បើង តួនាទី ៦នាក់ ហើយក្នុងចំណោមមន្ត្រីគយ ដែលត្រូវតែងតាំង ដំទ្បើងឋានៈ គឺមានមន្ត្រីចំនួន ២នាក់ ត្រូវបានតែងតាំង ជាប្រធានស្តីទីសាខាគយ និង ៤នាក់ទៀត ជាអនុប្រធានការិយាល័យ ហើយក្នុងចំណោម អនុប្រធានការិយាល័យ ចំនួន ៤នាក់នោះ គឺមាន ២នាក់ ជាមន្ត្រីគយ ដែលទើបបម្រើការងារ ក្នុងរយៈពេល ៤ទៅ៥ ឆ្នាំប៉ុណ្ណោះ នាំឲ្យក្តុមមន្ត្រីរិះគន់ថា ការតែងតាំងនោះ មានភាពមិនប្រក្រតី ។
មន្ត្រីក្នុងអគ្គនាយកដ្ឋានគយ និងរដ្ឋាករ បានលើកទ្បើងទៀតថា អង្គភាពប្រឆាំងអំពើពុករលួយ គួរពិនិត្យមើលបញ្ហានេះផង ដើម្បីកុំឲ្យមានភាពមិនប្រក្រតី ក្នុងការតែងតាំង ដំទ្បើងតួនាទីមន្ត្រីគយ ដោយមានភាពមិនប្រក្រតី។ ព្រោះមន្ត្រីគយខ្លះ ធ្វើការងាររយៈពេល ២០ទៅ៣០ ឆ្នាំ ហើយស្នើសុំតាមលំដាប់លំដោយ ដើម្បីឲ្យមានការតែងតាំង ទៅជាថ្នាក់ដឹកនាំ សាខាគយខេត្តត្បូងឃ្មុំ ដែលជាខេត្តទើបបង្កើតថ្មី មិនត្រូវបានថ្នាក់លើ ពិនិត្យពិចារណាទេ ហើយបែរជាតែងតាំង មន្ត្រីគយថ្មីៗឲ្យទៅកាន់ តំណែងសំខាន់ៗ នៅសាខាគយខេត្តត្បូងឃ្មុំ ទៅវិញ។
ការពិតឈ្មោះ រ៉ង រដ្ឋា និងឈ្មោះ ជន់ រចនា ទើបចូលបម្រើការងារ ៤ទៅ៥ ឆ្នាំប៉ុណ្ណោះ ស្រាប់តែមានការតែងតាំង ជាអនុប្រធានការិយាល័យ សាខាគយខេត្តត្បូងឃ្មុំ ចំណែកមន្ត្រីគយ ដែលមានអតីតភាពការងារ រាប់សិបឆ្នាំ បែរជារដ្ឋមន្ត្រីក្រសួងហិរញ្ញវត្ថុ និងអគ្គនាយកគយ មើលមិនឃើញ។ មន្ត្រីក្នុងអគ្គនាយកដ្ឋាន គយនិងរដ្ឋាករ មួយចំនួនបានរិះគន់ថា ការរៀបចំរចនាសម្ព័ន្ធ ស្ថាប័នគយខេត្តត្បូងឃ្មុំ ពោរពេញទៅដោយ អំពើពុករលួយបក្ខពួកនិយម ៕
