ប្រភពព័ត៌មានបានឲ្យដឹងថាឈើប្រណីតត្រូវបានគេដឹកជញ្ជូនតាមថយន្ត ទំនើបជាច្រើនប្រភេទ ដែលឈើប្រណីតទាំងនោះមានប្រភពមកពីខេត្តមណ្ឌគិរី ហើយត្រូវបានគេដឹកជញ្ជូនឆ្លងកាត់មុខស្នាក់ការ សង្កាត់រដ្ឋបាលព្រៃឈើកន្ទួត ខេត្តក្រចេះ។ តាមប្រភពព័ត៌មានបានបន្តឲ្យដឹងថាឈើប្រណីតទាំងនោះត្រូវបានគេ ដឹកជញ្ជូនបន្តចេញពីភូមិសាស្ត្រទឹកដីខេត្តក្រចេះ តាមរយៈរថយន្តទំនើបៗ ឆ្ពោះទៅខេត្តត្បូងឃ្មុំ ដោយមានឈ្មួញធំចាំប្រមូលទិញយកទាំងអស់នៅទីនោះ។
ការសន្យារបស់លោក ប៊ួយ រតនា នាយផ្នែករដ្ឋបាលព្រៃឈើក្រចេះ កាលពីពេលថ្មីៗនេះ ថានឹងចាត់វិធានការម៉ឺងម៉ាត់ទប់ស្កាត់បទល្មើសព្រៃឈើក្នុងដែន សមត្ថកិច្ចរបស់ខ្លួន ត្រូវគេមើលឃើញថាគ្មានប្រសិទ្ធភាពនោះទេ ព្រោះបន្ទាប់ពីការសន្យាមិនទាន់បានរួចពីមាត់ស្រួលបួលផង បទល្មើសព្រៃនៅលើទឹកដីខេត្តក្រចេះ ត្រូវគេមើលឃើញថាកំពុងប្រព្រឹត្តទៅយ៉ាងអនាធិបតេយ្យ។
មន្ត្រីយោធាខេត្តមណ្ឌគិរីម្នាក់ឈ្មោះទេព ប្រុស ត្រូវគេដឹងបានឃុបឃិតគ្នាជាមួយឈ្មួញរកស៊ីឈើទាំអស់ និងជាអ្នកចេញមុខសម្របសម្រួលជាមួយមន្ត្រីមានសមត្ថកិច្ចពាក់ព័ន្ធ នៅតាមដងផ្លូវ ដើម្បីធ្វើយ៉ាងណា ឲ្យការដឹកជញ្ជូនឈើរបស់ក្រុមគេអាចប្រព្រឹត្តទៅបានរលូនល្អ។ តាមប្រភពីប្រជាពលរដ្ឋបានឲ្យដឹងថាឈ្មួញឈើប្រណីតទាំងអស់ភាគច្រើន មានទំនាក់ទំនងល្អជាមួយមន្ត្រីរដ្ឋបាលព្រៃឈើ ហើយក៏មានមន្ត្រីមានអំណាចនៅក្នុងខេត្តក្រចេះចេញមុខកាងដែរ ទើបក្រុមឈ្មួញឈើប្រណីតទាំងនោះអាចមានលទ្ធភាព ក្នុងការដឹកជញ្ជូនឈើប្រណីតបានរលូន ៕
