រឿងអាស្រូវពុករលួយរបស់លោក សូ ម៉ារ៉ា រដ្ឋលេខាធិការក្រសួងទេសចរណ៍ និងលោក សូ វិសុទ្ធី ប្រធាននាយកដ្ឋានសិក្សា ទីផ្សារ និងផ្សព្វផ្សាយនៃក្រសួងទេសចរណ៍ គឺជារឿងមិនអាចបិទបាំងបាន ព្រោះអង្គភាពប្រឆាំងអំពើពុករលួយក៏បានចេញលិខិតមួយឲ្យពួកគេបំន្លឺ កាលពីថ្ងៃទី២៣ ខែធ្នូ ឆ្នាំ២០១៣ ។ នៅក្នុងពាក្យបណ្ដឹងរបស់មន្ត្រីតូចតាចដាក់ជូនអង្គភាពប្រឆាំង អំពើពុករលួយបានរៀបរាប់យ៉ាងច្បាស់នៅរឿងអាស្រូវពុករលួយចំនួន៦ចំណុច រួមមាន ទី១- ដកយកថវិកាចំនួន៣ពាន់ដុល្លារដែលជាថ្លៃដឹកសម្ភារៈផ្សព្វផ្សាយ ក្នុងពិព័រណ៍នីមួយៗទៅបរទេសដោយចែកសម្ភារៈទាំងនោះឲ្យប្រតិភូជា អ្នកយូរទៅវិញ។
លោក សូ ម៉ារ៉ា រដ្ឋលេខាធិការក្រសួងទេសចរណ៍មិនត្រឹមតែល្បីល្បាញខាងមានស្រីស្នេហ៍ ថែមទាំងមានជំនាញខាងប្រព្រឹត្តអំពើពុករលួយគ្រប់រូបភាពមិនខ្វល់ពី ការរិះគន់អ្វីទាំងអស់។ មន្ត្រីតូចតាចក្នុងក្រសួងទេសចរណ៍បានឲ្យដឹងថា លោក សូ ម៉ារ៉ា បានឃុបឃិតជាមួយលោក សូ វិសុទ្ធី ប្រធាននាយកដ្ឋានសិក្សា ទីផ្សារ និងផ្សព្វផ្សាយប្រព្រឹត្តអំពើពុករលួយយ៉ាងគឃ្លើន ហើយបញ្ហានេះ មានរបាយការណ៍ដាក់ជូនអង្គភាពប្រឆាំងអំពើពុករលួយកាលពីថ្ងៃទី ១៨ ខែតុលា ឆ្នាំ២០១៣ រួចមកហើយ។ ក៏ប៉ុន្តែអង្គភាពប្រឆាំងអំពើពុករលួយមិនទាន់ចាត់វិធានការតាមផ្លូវ ច្បាប់ទៅលើមន្ត្រីពុករលួយទាំង២នាក់នេះនៅឡើយទេ ទើបពួកគេបន្តធ្វើអ្វីៗយ៉ាងក្រអឺតក្រទម។
ទី២-កិបកេងស្នាដៃប្លង់គំនូររបស់មន្ត្រីនៃនាយកដ្ឋានសិក្សា ទីផ្សារដោយបើកប្រាក់យកតែម្នាក់ឯងនៅថ្លៃប្លង់គំនូរពិព័រណ៍នីមួយៗ ពី៨០០ទៅ១០០០ដុល្លារ។ ទី៣-កិបកេងប្រាក់ថ្លៃជួលគ្រឿងសង្ហារិមបន្ថែមចំនួន១០០០ដុល្លារ ប្រាក់សម្រាប់ទិញវត្ថុសិល្បៈដាក់តាំងពិព័រណ៍ចំនួន៦០០ដុល្លារ ប្រាក់ថ្លៃផលិតវីស៊ីឌី ៦២៥ដុល្លារ ប្រាក់ថ្លៃថតរូប និងវីដេអូសម្រាប់ផ្សព្វផ្សាយចំនួន៦០០ដុល្លារក្នុងការតាំងពិព័រណ៍ នីមួយៗ។ ទី៤-កិបកេងប្រាក់ដែលជាចំណូលរបស់ក្រសួងតាមរយៈការបង់របស់ភ្ងាក់ ងារទេសចរណ៍ដែលចូលរួមផ្សព្វផ្សាយ ទី៥- កិបកេងយកប្រាក់ចំណាយរបស់ប្រតិភូសម្រាប់ធ្វើដំណើរ ១២០០ដុល្លារ ទី៦- ប្រាក់បេសកកម្មរបស់ប្រតិភូមិនដែលបើកបានគ្រប់ចំនួន។
ភស្ដុតាងខាងលើនេះជាសក្ខីភាពបង្ហាញថាលោក សូ ម៉ារ៉ា និងលោក សូ វិសុទ្ធី ឃុបឃិតគ្នាប្រព្រឹត្តអំពើពុករលួយតាមគ្រប់រូបភាព នេះមិនទាន់គិតដល់អំពើពុករលួយជាច្រើន ។ ទង្វើមិនប្រក្រតីរបស់លោក សូ ម៉ារ៉ា បានធ្វើឲ្យតំណែងជាអគ្គនាយករដ្ឋបាល និងហិរញ្ញវត្ថុក្រសួងទេសចរណ៍ត្រូវរបូតពីដៃគាត់ ហើយតំណែងនោះ ត្រូវបានធ្លាក់កណ្ដាប់ដៃកូនប្រសាលោក ថោង ខុន ដែលជារដ្ឋមន្ត្រីក្រសួងទេសចរណ៍រួចទៅហើយ ៕
