អង្គភាពប្រឆាំងអំពើពុករលួយដែលមានលោក ឱម យ៉ិនទៀង ជាប្រធានងាប់ត្រគាកស្តូកទុកឲ្យលោក ប៉ែន ស៊ីម៉ន និងប្អូនប្រុសឈ្មោះ ប៉ែន សំអាតយកអគ្គនាយកដ្ឋានគយនិងរដ្ឋាករធ្វើជាកម្មសិទ្ធិផ្តាច់មុខរបស់ ក្រុមគ្រួសារខ្លួន។
មន្ត្រីគយនិងរដ្ឋាករបន្តលាតត្រដាងអំពើពុករលួយរបស់មេគយពីរ នាក់បងប្អូនគឺប៉ែន ស៊ីម៉ននិងប៉ែន សំអាត ជាបន្តបន្ទាប់ដើម្បីឲ្យដឹងឮដល់រដ្ឋមន្ត្រីក្រសួងហិរញ្ញវត្ថុនិង ដឹងឮដល់លោក ហ៊ុន សែន ។ ក៏ប៉ុន្តែរហូតមកដល់ពេលនេះរដ្ឋមន្ត្រីក្រសួងហិរញ្ញវត្ថុលោក អូន ព័ន្ធមុនីរ័ត្ន ក៏ដូចជានាយករដ្ឋមន្ត្រី ហ៊ុន សែន មិនចាត់វិធានការលើមេគយពុករលួយពីរនាក់បងប្អូននោះទេ ហើយបណ្តោយឲ្យពួកគេបន្តប្រព្រឹត្តអំពើពុករលួយតាមគ្រប់រូបភាព។
ប្រភពពីមន្ត្រីគយ បានឲដឺងថាអំពើពុករលួយរបស់ ប៉ែន ស៊ីម៉ន និងប៉ែន សំអាត គ្រាន់តែការដំទ្បើងកាំប្រាក់ខែសម្រាប់មន្ត្រីគយមួយចំនួនក៏មេគយ ពុករលួយទាំងពីរនាក់នេះអាចជំរិតយកលុយពីមន្ត្រីក្រោមឱវាទស្រេចតែ អំពើចិត្តដែរ។ ជាងនេះទៅទៀតមន្ត្រីគយមួយចំនួនដែលមានលុយសូកប៉ាន់ ប៉ែន ស៊ីម៉ន និងប៉ែន សំអាត ត្រូវបានគេដំទ្បើងឋានៈនិងតួនាទីក្នុងមួយឆ្នាំ២ទៅ៣ដង ផ្ទុយពីគោលការណ៍របស់អគ្គនាយកដ្ឋានគយនិងរដ្ឋាករទាំងស្រុង។ លោក អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុពិនិត្យមើល កុំបណ្តោយឲ្យមន្ត្រីពុករលួយធ្វើអ្វីៗស្រេចតែអំពើចិត្តតទៅទៀត។
ថ្មីៗនេះមានការតែងតាំងតំណែងនិងតួនាទីមន្ត្រីគយចំនួន២៦នាក់ តាមប្រកាសលេខ៨៦៩ សហវ.ប្រក ចុះថ្ងៃទី១១ ខែសីហា ឆ្នាំ២០១៤ ហើយក្នុងនោះមានមន្ត្រីគយមួយចំនួនបានត្រៀមលុយចាប់ពី២ម៉ឺនដល់ ២៥០០០ដុល្លារដើម្បីប្តូរកាំប្រាក់ពី ខ ទៅ ក។ បញ្ហានេះគឺជាអំពើពុករលួយដ៏ធំបំផុតផ្គើនទៅនឹងវិធានការកែទម្រង់ ស៊ីជម្រៅរបស់ ហ៊ុន សែន ព្រោះអំពើពុករលួយក្នុងអគ្គនាយកដ្ឋានគយនិងរដ្ឋាករមិនត្រឹមតែគ្មាន ការថយចុះប៉ុណ្ណោះទេ គឺថែមទាំងរាលដាលខ្លាំងជាងមុនទៅទៀត។
អំពើពុករលួយរបស់ ប៉ែន ស៊ីម៉ន និងប៉ែន សំអាត ល្បីល្បាញជាយូរមកហើយព្រោះមន្ត្រីគយទាំងពីរនាក់នេះចាត់ទុក អគ្គនាយកដ្ឋានគយនិងរដ្ឋាករជាកម្មសិទ្ធរបស់ក្រុមគ្រួសារខ្លួន។ ការទ្បើងកាំប្រាក់ឬការចាត់តាំងមន្ត្រីគយឲ្យទៅឈរជើងតាមបណ្តាញ សាខាប្រចាំខេត្តនានា ឬស្នាក់ការគយតាមច្រកព្រំដែនសុទ្ធតែជាប្រភពចំណូលរបស់មេគយ ប៉ែន ស៊ីម៉ន និងប៉ែន សំអាត រហូតដល់មន្ត្រីគយខ្លះទ្បើងឋានៈមួយឆ្នាំដល់ទៅ២ដងដោយសារតែពួកគេ មានលុយសូកប៉ាន់មេគយពុករលួយទាំងពីរនាក់ ៕
