លោកលី សាវេត អភិបាលខណ្ឌសែនសុខ សម្បូររឿងអាស្រូវពុករលួយរូបនេះបានចេញមុខការពារឈ្មួញរកស៊ីទិញលក់ ដី និងខ្សាច់ ខុសច្បាប់ក្នុងទីក្រុងភ្នំពេញ និងឈ្មួញមកពីតាមបណ្តាខេត្តជាប់ទីក្រុងភ្នំពេញ ទាំងបំពានបទបញ្ជារបស់រដ្ធាភិបាល ។
ផលប៉ះពាល់ធ្ងន់ធ្ងរដល់បរិស្ថានក្នុងទីក្រុងភ្នំពេញដែលកើតចេញពីការ ធ្វើជំនួញដីធ្លីមិនត្រឹមត្រូវខុសបែបបទបច្ចេកទេស និងច្បាប់ សាលាក្រុងភ្នំពេញបានចេញសេចក្តីណែនាំឲ្យបញ្ឈប់ការជីករណ្តៅដី និងការចាក់ដីក្នុងភូមិសាស្ត្រទីក្រុងភ្នំពេញ ដើម្បីត្រួតពិនិត្យឡើងវិញ ។ ប្រជាពលរដ្ឋក្នុងទីក្រុងភ្នំពេញ បានសម្តែងការព្រួយបារម្ភ និងការត្អូញត្អែរចំពោះរណ្តៅដីធំៗ ដែលត្រូវបានឈ្មួញជីកយកលក់ខុសបច្ចេកទេស កំដូចជាការបាក់ដី និងផ្ទះសម្បែងប្រជាពលរដ្ឋតាមមាត់ទន្លេ ដែលបណ្តាលមកពីការបូមខ្សាច់។
អភិបាលខណ្ឌសែនសុខលោកលី សាវេត បើទោះជាបានដឹងពីផលប៉ះពាល់យ៉ាងធ្ងន់ធ្ងរដែលបណ្តាលមកពីការធ្វើ អាជីវកម្មមិនត្រឹមត្រូវលើដីធ្លីក៏ដោយ ក៏បុក្កល រូបនេះមិនបានខ្វល់ខ្វាយចំពោះទុក្ខលំបាករបស់ប្រជាពលរដ្ឋ និងបទបញ្ជាថ្នាក់លើនោះទេ ព្រោះលោកលី សាវេត បានចេញមុខការពារក្រុមឈ្មួញរកស៊ីដីធ្លី។
នៅក្នុងខណ្ឌសែនសុខ ត្រូវបានគេសង្កេតឃើញថាមានភាពអនាធិបតេយ្យបានកើតឡើងយ៉ាងពេញបន្ទុក ក្នុងអាជីវកម្មដីធ្លី។ ការលុបអាងទឹកសម្អុយ ប្រឡាយទឹក ដែលបង្កឲ្យមានការកកស្ទះ និងការជន់លិចនៅពេលមានភ្លៀងធំ។ ជាងនេះទៅទៀតមានតំបន់ខ្លះក្នុងទីក្រុងភ្នំពេញ ត្រូវគេមើលឃើញថាមានរណ្តៅដីជ្រៅខ្លាំង ខូចសណ្ឋានដី ដែលបណ្តាលឲ្យមានផលប៉ះពាល់បរិស្ថានធ្ងន់ធ្ងរ ៕
