សកម្មភាពដឹកឈើប្រណីតខុសច្បាប់ នៅតែបន្តយ៉ាងអនាធិបតេយ្យទាំងយប់ទាំងថ្ងៃ ក្នុងភូមិសាស្ត្រស្រុកមេមត់ យកទៅលក់អោយវៀតណាមតាមរបៀងច្រកចាន់មូល ក្រៅតែពីអាជ្ញាធរដែនដីមានចៅហ្វាយស្រុក អធិការនគរបានស្រុក និងអាវុធហត្ថស្រុក អាវុធហត្ថលើផ្ទៃប្រទេស និងមានជំនាញពាក់ព័ន្ធជាច្រើនទៀតដូចជារដ្ឋបាលព្រៃឈើ គយ នគរបាលសេដ្ឋកិច្ចខេត្ត/ ក្រសួង ឈរជើងបណ្តាក់គ្នាដូចខ្យងចាប់ពីផ្លូវជាតិលេខ៧ រហូតដល់ច្រព្រំដែន ដែលមន្ត្រីទាំងនោះសុទ្ធសឹងទទួលបទបញ្ជា និងកាន់លិខិតបញ្ជាបេសកកម្មចុះមកបង្ក្រាបបទល្មើស បែរជាទៅការពារឲបទល្មើសទៅវិញ។
ប្រភពព័ត៌មានពីប្រជាពលរដ្ឋបានឲដឺងថានៅ ស្រុកមេមត់ ក្នុង១យប់ៗ មានរថយន្តម៉ាក់កាមេរីហើម ស្វិត ឡង់គ្រីស័រ និងរថយន្តម៉ាកស៊ាំងយ៉ុង និងរថយន្តយីឌុបដឹកឈើប្រណីតប្រភេទធ្នង់ និងប្រភេទនាងនួន មិនក្រោម ៣៥ទៅ ៥០គ្រឿង ប៉ុន្តែសមត្ថកិច្ចគ្រប់ជំនាញមិនបង្ក្រាបឡើយ។ ចំណែកប៉ុស្តិ៍សមត្ថកិច្ច នគរបាល និងប៉េអឹម ដាក់ក្បាលឡានតម្រៀបចេញមករកផ្លូវនៅតាមមុខប៉ុស្តិ៍មុខស្នាក់ការមានទាំងឡានសារ៉េនទៀតផង ក៏ប៉ុន្តែហាក់ដូចជាគ្រាន់តែជាសញ្ញាគំរាមពួកឈ្មួញកុំឲ្យរំលង ។ ជាមួយនឹងបញ្ហានេះអ្នកកាសែកប្រចាំតំបន់នោះបានលើកឡើងថា រថយន្តសមត្ថកិច្ចទាំងនោះតែងតែប្រដេញចាប់ អ្នកសារព័ត៌មានណាដែលតាមប្រមាញ់យករូបភាព រថយន្តដឹកបទល្មើសដើម្បីយកមកផ្សព្វផ្សាយ ដោយចោទពីបទបង្កភាពអនាធិបតេយ្យនៅតាមដងផ្លូវសារធារណៈ ។
បច្ចុប្បន្ន លោក ប៉េង អេងហាក់ ជាអធិការ នៃអធិការរដ្ឋាននគរបាល ស្រុកមេមត់ ដែលទើបឡើងកាន់តំណែងថ្មីៗនេះ បានពួតដៃជាមួយប្រពន្ធគាត់ឈ្មោះ ណាក់ រស់នៅភូមិមេមត់ ឃុំមេមត់ ស្រុកមេមត់ ខេត្តត្បូងឃ្មុំ ធ្វើជំនួញឈើពេញបន្ទុក នេះដោយសារគាត់កន្លងមកជាមេឈ្មួញឈើប្រណីតខុសច្បាប់ដ៏មានបទពិសោធ និងល្បីល្បាញយូរឆ្នាំមកហើយ ដោយបច្ចុប្បន្នគាត់មានអំណាចពេញដៃថែមទៀតនោះ គឺកាន់តែធ្វើឲ្យគាត់ងាយស្រួល ធ្វើជា ខ្នងបង្អែករឹងដូចភ្នំ ធ្វើ ជំនួញល្មើសនេះតាមចិត្ត ដោយគ្មាន សមត្ថកិច្ចណា សូម្បីតែរដ្ឋបាលព្រៃឈើក៏មិន ហ៊ានក្អកជាមួយគាត់ឡើយដោយសុំតែគុទាវ និងកាហ្វេដោយមិនហ៊ានមាត់ធ្ងន់ដាក់ទៀតផង។ ពលរដ្ឋមានការកត់សម្គាល់ថា ពេល លោក ប៉េង អេងហាក់ឡើងជាអធិការភ្លាម ហ៊ាន បំភ្លេច ចោលការទូន្មានរបស់ថ្នាក់លើ លែងក្រែងញញើតដោយហ៊ាន បំពានលើគោលនយោបាយភូមិឃុំមានសុវត្ថភាព និងរឹតតែមិនខ្វល់ជាមួយបទបញ្ជាលេខ ០១ របស់រដ្ឋាភិបាលឲ្យទប់ស្កាត់ និងបង្ក្រាបជំនួញឈើប្រណីតខុសច្បាប់ តែបែរគាត់ និងភរិយាជាអ្នកប្រព្រឹត្តផ្ទាល់ទៅវិញ។ លោក ម៉ៅ ពៅ ស្នងការនគរបាលខេត្តត្បូងឃ្មុំ ល្មមដល់ពេលត្រួតពិនិត្យ លោក ប៉េង អេងហាក់ អធិការនគរបាល ស្រុកមេមត់ ដែលរកស៊ី រកស៊ីឈើខុសច្បាប់ជាមួយនឹងភរិយាគាត់ ដែលមានគំរូមិនល្អដល់មន្ត្រីនគរបាលក្រោមបង្គាបើសិនជាលោកស្នងការគ្មានវិធានការជាបន្ទាន់ទេប្រជាពលរដ្ធច្បាស់ជាចោទលោកថាបានទទួលសំណូកពីលោកអធិការនេះហើយមើលទៅបានជាមិនបង្រ្កាប៕
