ខេត្តកណ្តាល ៖ក្រុមឈ្មួញធំៗទាំងនោះ គេស្គាល់ ឈ្មោះ លឹម ធារិទ្ធនិងលោក ឈឿន ឆន ត្រូវជាកូនប្រុស របស់លោក ផៃ ប៊ុនឈឿន អភិបាលខេត្តកណ្តាលកំពុងតែធ្វើសកម្មភាព បូមខ្សាច់ នៅចំណុចក្នុងភូមិព្រែកសំរោងសង្កាត់តាខ្មៅ ក្រុងតាខ្មៅ និងចំណុច ភូមិកោះអន្លង់ចិន ឃុំកោះអន្លង់ចិនស្រុកស្អាង ខេត្តកណ្តាល ដោយគ្មានខ្លាចញញើតនិងអាជ្ញាធរឬសមត្ថកិច្ចពាក់ព័ន្ធ ចុះទៅធ្វើការបង្ក្រាបឡើយ ។
ប្រជាពលរដ្ឋរស់នៅ តាមដងទន្លេបាសាក់កំពុងមានការព្រួយបារម្ភយ៉ាងខ្លាំងដោយសារ ក្រុមឈ្មួញមានអំណាច បានយកទូកនិងសាឡង់ធំៗចំណុះរាប់ពាន់តោនសំរុកបូម ខ្សាច់ នៅក្នុងរដូវទឹកឡើងយ៉ាងប្រសេកប្រសាចពេញតាមដងទន្លេបាសាក់ ដោយគ្មានសមត្ថកិច្ច ជំនាញណាម្នាក់ ធ្វើការបង្ក្រាបឡើយ ។
ពួកគេ អាងអំណាចរបស់លោកឪពុក ជាអភិបាលខេត្តកណ្តាល បែបនេះហើយមើលទៅ បានជាពួកគេ មិនខ្វល់ពីទុក្ខកង្វល់ របស់ប្រជាពលរដ្ឋដូចជាបាក់ច្រាំងទន្លេបាសាក់ ដល់ផ្ទះសម្បែង ឬផលដំណាំដីចំការបស់ពួកគាត់នោះ។ គេឆ្ងល់ថា ហេតុអ្វីបានជាក្រុមឈ្មួញធំៗទាំងនេះ ហាក់បីដូចជា មានឥទ្ធិពលខ្លាំងណាស់ក្នុងការធ្វើសកម្មភាព បូមខ្សាច់ទាំងយប់ទាំងថ្ងៃ តាមទន្លេបាសាក់បង្កហានិភ័យដល់ប្រជាពលរដ្ឋ រស់នៅតាមដងទន្លេ ជាបន្តបន្ទាប់ហើយអាជ្ញាធរ និងមន្ត្រីជំនាញពាក់ព័ន្ធ បែរជាធ្វើមិនដឹងមិនឮទៅវិញ។
ចំណែកករណីបូមខ្សាច់ ចាប់ពីព្រំប្រទល់សង្កាត់ព្រែកឯង ខណ្ឌច្បារអំពៅ រហូតដល់ខាងក្រោយ សាលាស្រុកល្វាឯមក្នុងឃុំសារិកាកែវ របស់ក្រុមឈ្មួញមានអំណាច ក៏កំពុងធ្វើសកម្មភាពបូមខ្សាច់ ដោយគ្មានមន្ត្រីនាម្នាក់ ចុះទៅត្រួតពិនិត្យឡើយ។ ប្រជាពលរដ្ឋជួបទុក្ខលំបាក បានលើកឡើងថា ពួកគាត់បានប្តឹង ទៅអាជ្ញាធរនិងមន្ត្រីជំនាញ ជាច្រើនលើកច្រើនសារហើយ ជាពិសេសឡើងរាយការណ៍ជូនអាជ្ញាធរមូលដ្ឋាន ខេត្តកណ្តាល ទៀងផង គឺគ្មានអាជ្ញាធរឬមន្ត្រីជំនាញណា គេធ្វើដឹងឮពីផលប៉ះពាល់ និងទុក្ខលំបាករបស់ប្រជាពលរដ្ឋនោះទេ។
ប្រជាពលរដ្ឋរស់នៅ តាមដងទន្លេទាំងអស់ សូមសំណូមពរយ៉ាងទទូចដល់រដ្ឋមន្ត្រី ក្រសួងធនធានទឹកនិងឧតុនិយម ក៏ដូចជាអាជ្ញាធរមូលដ្ឋានខេត្តកណ្តាល មេត្តាចាត់វិធានការ ទប់ស្កាត់ចំពោះ សកម្មភាពបូមខ្សាច់របស់ក្រុមឈ្មួញធំៗ ដែលមានអំណាច ប្រចាំទឹកដីខេត្តកណ្តាល ដែលមានឈ្មោះដូចខាងលើនេះ ដើម្បីបញ្ចៀសនូវគ្រោះ ហានិភ័យ ៕
