នាយករដ្ឋបាលជលផល ខេត្តកំពង់ចាម លោក គង់ ពុទ្ធារិទ្ធិ ត្រូវបាន មន្រ្តីមួលដ្ឋាននិងប្រជាពលរដ្ឋ រិះគន់យ៉ាង ចាស់ដៃថា អត់ហ៊ានលូកដៃបង្រ្កាបបទល្មើសដែលស្ថិតក្នុងដែនជម្រករបស់ខ្លួន ដែលស្ថិតនៅចំណុចលូធំទំនប់តាកុយ ស្រះហ៊ីង ឬស្សីច្រាញ់ ទួលឃ្មាក់ រហូតដល់ចំណុច ពោធិតាឡុង ក្នុងភូមិសាស្រ្ត ភូមិតាព្រង ឃុំថ្មកែវ និង ភូមិរោធ ឃុំត្រប់ ស្រុកបាធាយ ខេត្តកំពង់ចាម បានឡើយ ដោយសារតែ លោក គង់ ពុទ្ធារិទ្ធិ បានឃុបឃិតជាមួយឈ្មួញហើយមិនហានបង្រ្កាបបទល្មើសនេសាទ ។
របាំងស្បៃមុងដែកត្រូវបានក្រុមឈ្មួញធ្វើសកម្មភាពនេសាទយ៉ាងគគ្រើន ក្នុងស្រុកបាធាយ ខេត្តកំពង់ចាម ដោយមិនខ្លាចញញើតអាជ្ញាធរមូលដ្ឋាន និងរដ្ឋបាលជលផលខេត្តកំពង់ចាមនោះធ្វើឡើងក្រោយពីមានការបែកធ្លាយព័ត៍មានពីប្រជាពលរដ្ឋថា នាយរដ្ឋបាលជលផលខេត្ត លោក គង់ ពុទ្ធារិទ្ធិ បានបណ្តែតបណ្តោយឲ្យពួកឈ្មួញមកសម្រុកនេសាទនិងចាប់ត្រីក្នុងតំបន់ខាងលើនេះ ដោយមិនមានការចុះបង្រ្កាបរបាំងស្បៃមុងនោះឡើយ ។
ក្រុមអ្នកភូមិនៅក្នុងក្នុងភូមិសាស្រ្តភូមិតាព្រងឃុំថ្ម កែវនិងភូមិរោធ ឃុំត្រប់ ស្រុកបាធាយខេត្ត កំពង់ចាមបានចោទថា ករណីបទល្មើសនេសាទស្បៃមុងនោះ បានកើតមានឡើងជាយូរមកហើយ ។ ចំណែកមន្រ្តីរដ្ឋបាលជលផលអត់ហានបង្រ្កាបពីឈ្មួញនោះទេ ពីព្រោះតែអំណាចទាំងស្រុងកំពុងក្តោបក្តាប់ដោយបុគ្គល គង់ ពុទ្ធារិទ្ធិ ដែលជា នាយរដ្ឋបាលជលផលខេត្តកំពង់ចាម បើទោះជាមានការតវ៉ាពីប្រជាពលរដ្ឋពីបទល្មើសនេសាទនៅពេលដែលឈ្មួញកំពុងស្ទាក់ចាប់យកត្រីធ្វើជាចំណីចិញ្ចឹមត្រីឆ្តោរយ៉ាងសេ្កកស្កះ និងយ៉ាងសេរី ក្នុងតំបន់នេះក៏ដោយ ។
ប្រជាពលរដ្ឋជាអ្នកនេសាទធ្លាប់បានប្រាប់ថា បើអ្នកនេសាទណាចង់យកអូនក្រឡាញឹកទៅរកត្រីក្នុងទន្លេមេគង្គស្ថិតក្នុងស្រុកកោះសូទិនខេត្តកំពុងចាម ត្រូវបង់លុយជូនលោកគង់ ពុទ្ធារិទ្ធ នាយខណ្ឌរដ្ឋបាលជលផលខេត្តចំនួន ១.៣០០.០០០ រៀល បើមិនបង់គឺចាប់គ្មានរើសមុខឡើយ។ប្រភពដដែលបានខ្សឹបឲ្យដឹងថា ច្បាប់មិនអនុញ្ញាតឲ្យប្រើ នាម ឫអូនក្រឡាញឹក ឫ ប្រើទូកម៉ាស៊ីនមិនឲ្យលើសពីកំលាំង១០សេះនោះទេ តែដល់ពេលមានអ្នករត់ការម្នាក់ ឈ្មោះ ម៉ាន កទៀក ហៅធីយកលុយទៅជូនលោកនាយខណ្ឌរដ្ឋបាលជលផលខេត្តចំនួន១លាន៣សែនរៀល ក្នុងម្នាក់ៗ អ្នកនេសាទទំាងនោះអាចប្រើឧបករណ៏ខុសច្បាប់បានដូចជា នាម ឫអូនក្រឡាញឹកនិងប្រើទូក ម៉ាស៊ីនមានកម្លាំងចាប់ពី២០សេះ នេសាទត្រីពេញទន្លេ នៅស្រុកកោះសូទិននោះធ្វើព្រងើយ ។
ប្រជានេសាទបានខ្សឹបថា យោងតាមច្បាប់ជលផលគឺឲ្យអ្នកនេសាទប្រើអូនក្រឡារង្វើល និងប្រើទូកម៉ាស៊ីនមិនឲ្យលើសពីកម្លាំង១០សេះនោះទេ ហើយការចុះនេសាទត្រូវសុំច្បាប់ពីនាយខណ្ឌជលផលគ្រប់គ្រងតំបន់នោះ ដោយត្រូវបង់លុយបន្តិចបន្តួចប៉ុណ្ណោះ ព្រោះនាមឫអូនក្រឡាញឹកនោះ ត្រីប្រភេទណាក៏រត់មិនរូចដែរ រាប់តាំងពីទំហំប៉ុនជើងធូបឡើងទៅ ដូចេ្នះបើមិនប្រញប់ទៅហាមឃាត់ទេនោះ ច្បាស់ជារលាយហិចហោចពូជមច្ចជាតិអស់ជាក់ជាមិនខាន ។
ប៉ុន្តែទោះជាយ៉ាងណាក៏ដោយកន្លងទៅនេះ រាជរដ្ឋាភិបាលកម្ពុជា និង លោក ណៅ ធូក ប្រធានរដ្ឋ បាលជលផល ធ្លាប់ព្រមានជារឿយៗ ហើយថា រាល់បទល្មើស នេសាទទាំង ឡាយណា ដែល ធ្វើឡើង ដោយខុសច្បាប់នេសាទនោះនឹង ត្រូវផ្តន្ទាទោស តាមច្បាប់ជា ធរមានដែល មិនត្រូវអត់ អោនបានឡើយ ។ តែជាការកត់ សម្គាល់សម្រាប់ លោក គង់ ពូទ្ធារិទ្ធិ វិញ នៅពេលនេះ កំពុងតែជក់ខ្យល់និងទឹកលុយជាមួយឈ្មួញ ដោយអត់ហានចេញមុខមកបង្រ្កាបបទល្មើសនោះទេ ។
អ្នកភូមិបានចោទថា បើនាយរដ្ឋបាលជលផលខេត្តកំពង់ចាម លោក គង់ ពុទ្ធារិទ្ធិ នៅតែបន្តទទួលយកលុយពុករលួយ និងមិនប្រើតួនាទី ក្នុងការចុះបង្រ្កាបបទល្មើសទេនោះ ប្រហែលជាតំណែងជានាយរដ្ឋបាលជលផលនោះ ទំនងជាមិនអាចឈរនិងបានយូរដែរ ព្រោះបច្ចុប្បន្ននេះ សម្តេចនាយករដ្ឋមន្រ្តីកំពុងតែប្រើកណ្តាប់ដៃដែកបង្រ្កាបមន្រ្តីខិលខួចដែលជារបស់ខ្លួន ដើម្បីរក្សាសេចក្តីថ្លៃថ្នូរ និងសេចក្តីទុកចិត្តពីប្រជាពលរដ្ឋមកវិញ ។
ថ្វីបើករណីបទល្មើសស្បៃមុងកំពុងតែស្ថិតក្នុងការបិទបាំងក៏ដោយ តែថ្មីៗនេះ សាព័ត៍មានចាប់ដៃមិនអាចសុំការពន្យល់បានទេ ពីលោក គង់ ពុទ្ធារិទ្ធិ នាយរដ្ឋបាលជលផលបានឡើយ។ បុន្តែទោះបែបនេះក្តីរបាំងស្បៃមុងដែលពួកឈ្មួញបានដាក់ចាប់យកត្រីនោះក្នុងមួយបាំងៗ មានប្រវែងពី១ពាន់ម៉ែត្រ រហូតដល់៣ពាន់ម៉ែត្រនៅកកកុញសម្រាប់ស្ទាក់ចាប់ត្រីដោយសេរី និង គ្មានឃើញមន្រ្តីជាន់ខ្ពស់រដ្ឋបាលជលផលចេញមុខចុះបង្រ្កាបឡើយ ប្រហែលកំពុងតែត្រូវថ្នាំសន្តំពួកឈ្មួញ និងទទួលយកលុយពុករលួយដ៏ច្រើនសន្ទឹកនៅរយៈពេលចុងក្រោយនេះ ដោយមិនខ្លាចសំណាញ់ច្បាប់ និងប្រធានរដ្ឋបាលជលផលលោក ណៅ ធូកនោះដែរ ។ ដូចេ្នះសូមលោក ណៅ ធូក ចុះទៅពិនិត្យស្រាវជ្រាវករណីនេះផងថា តើលោក គង់ ពុទ្ធារិទ្ធ មានបានធ្វើដូចគេខ្សឹបបា្រប់អ្នកសារព័ត៏«ចាប់ដៃ»នេះមែនឫអត់?
