រថយន្តដឹកទំនិញទាំងខុសច្បាប់និងស្របច្បាប់មកពីខេត្តកោះកុង និងខេត្តព្រះសីហនុ ចូលរាជធានីភ្នំពេញតាមផ្លូវជាតិលេខ៤ រាប់រយគ្រឿងក្នុងមួយថ្ងៃៗសុទ្ធតែជាប់កាតព្វកិច្ចចូលបង់លុយឲ្យ មន្ត្រីរបស់លោក ជុង លឹមហាន ដែលដាក់ប៉ុស្តិ៍ជជុះប្រចាំការទាំងយប់ទាំងថ្ងៃ នៅក្បែរផ្លូវបំបែកស្រែអំបិល និងនៅក្បែរផ្លូវបំបែកវាលរេញស្រុកព្រៃនប់ ហើយទីតាំងប៉ុស្តិ៍ជជុះដ៏ធំមួយកន្លែងទៀត ស្ថិតនៅក្បែរផ្សារឧដុង្គតាមផ្លូវជាតិលេខ៥ នៃខេត្តកំពង់ស្ពឺ។
លោក ជុង លឹមហាន បានលុយច្រើនជ្រែយកតំណែងជាមេប៉ូលិសសេដ្ឋកិច្ចក្រសួងមហាផ្ទៃប្រចាំ ផ្លូវជាតិលេខ៤ មានខេត្តកំពង់ស្ពឺ និងខេត្តព្រះសីហនុ បង្កភាពអនាធិបតេយ្យក្នុងការដាក់ប៉ុស្តិ៍ជជុះគាបជំរិតបង្ខំឲ្យ អ្នករកស៊ីដឹកជញ្ជូនទំនិញបង់លុយទៅតាម មិនដែលខ្វល់ខ្វាយពីបទបញ្ជារបស់ថ្នាក់លើឡើយ។ ក្រុមអ្នករកស៊ីដឹកជញ្ជូនទំនិញបានលើកឡើងថា កម្លាំងនគរបាលសេដ្ឋកិច្ចក្រសួងមហាផ្ទៃ ដែលចុះឈរជើងប្រចាំផ្លូវជាតិលេខ៤ ជំនាន់មុន មិនដែលកោសរូសបង្ខំឲ្យពួកគាត់បង់លុយតាមតែអំពើចិត្តនោះទេ គឺឲ្យថ្លៃបាយប៉ុន្មានពួកគាត់យកប៉ុណ្ណឹង ប៉ុន្តែនគរបាលសេដ្ឋកិច្ចក្រសួងក្រុមថ្មី ស្ថិតក្រោមបញ្ជារបស់លោក ជុង លឹមហាន បានធ្វើអ្វីៗតាមតែទំនើងចិត្តគាបជំរិតកោសរូសបង្ខំឲ្យក្រុម អ្នករកស៊ីដឹកទំនិញបង់លុយក្នុងកម្រិតខ្ពស់គ្មានការយោគយល់អ្វីឡើយ។
ក្រុមឈ្មួញមួយចំនួនបានលើកឡើងថា ពួកគាត់រកស៊ីដឹកជញ្ជូនទំនិញបន្តិចបន្តួចក៏ត្រូវកូនចៅរបស់លោក ជុង លឹមហាន តម្រូវឲ្យបង់លុយ ១ខែ ១ពាន់ដុល្លារ ទោះជាសុំចុះថ្លៃត្រឹម៥០០ ឬ៧០០ដុល្លារ ក៏គេមិនព្រមដោយលើកឡើងថា ត្រូវបង់ថ្លៃប៉ុស្តិ៍អស់ច្រើនណាស់ និងត្រូវឡើងលុយជូនមេឲ្យទាន់ពេលវេលា បើមិនដូច្នេះទេ គេនឹងដកចេញពីប៉ុស្តិ៍ដាក់ជំនួសអ្នកផ្សេងដែលពូកែកាប់ដាវរកលុយបង់ ជូនមេ។ មន្ត្រីនគរបាលសេដ្ឋកិច្ចមួយចំនួនដែលចុះប្រចាំការតាមផ្លូវជាតិ សំខាន់ៗសុទ្ធតែចំណាយលុយទិញប៉ុស្តិ៍បន្តពីលោក ជុង លឹមហាន ដូច្នេះពួកគេត្រូវបង្កព្យុះភ្លៀងតាមទំនើងចិត្តដើម្បីមានលុយគ្រប់ ចំនួនយកទៅបង់ជូនមេថ្លៃទិញប៉ុស្តិ៍ឲ្យបានទាន់ពេលវេលា ដែលតាមពិតទៅមន្ត្រីថ្នាក់ក្រោមទាំងនោះមិនសូវសល់ប្រាក់យកទៅផ្ទះ ប៉ុន្មានទេ ប៉ុន្តែយ៉ាងហោចណាស់ពេលមានឈ្មោះចុះប៉ុស្តិ៍ ងាយស្រួលមិនចាំបាច់ទៅបង្ហាញវត្តមាននៅកន្លែងធ្វើការ និងអាចសល់ប្រាក់បន្តិចបន្តួចយកទៅចិញ្ចឹមប្រពន្ធកូន។
លោក ជុង លឹមហាន កំពុងបង្កព្យុះភ្លៀងធ្វើឲ្យអ្នករកស៊ីទាំងតូចទាំងធំក្តៅក្រហាយ យ៉ាងខ្លាំង ចំពោះអំពើកោសរូសបង្ខំឲ្យអ្នករកស៊ីដឹកទំនិញបង់លុយតាមតែអំពើចិត្ត មិនដែលខ្វល់ខ្វាយពីបទបញ្ជារបស់ថ្នាក់លើ ។
គេចង់ឃើញអគ្គស្នងការនគរបាលជាតិពិនិត្យមើលលក្ខណៈសម្បត្តិរបស់លោក ជុង លឹមហាន ឡើងវិញផង ព្រោះតាមខ្លឹមសារនៃលិខិតបញ្ជាបេសកកម្មនគរបាលសេដ្ឋកិច្ច ក្រសួងមហាផ្ទៃទាំងអស់ មានតួនាទីចុះស្រាវជ្រាវស្រង់ទិន្នន័យពីបទល្មើសសេដ្ឋកិច្ចរាយការណ៍ ជូនថ្នាក់លើឬសុំកម្លាំងសហការដើម្បីបង្ក្រាបបទល្មើសទាំងនោះ។ ហើយថ្មីៗនេះរដ្ឋមន្ត្រីក្រសួងមហាផ្ទៃ ក៏បានណែនាំដល់នគរបាលក្រសួងមហាផ្ទៃគ្រប់ជាន់ថ្នាក់ឲ្យពិនិត្យ ពិចារណាឡើងវិញពីប្រតិបត្តិការរបស់ពួកគេ ពេលចុះទៅបង្ក្រាបការដឹកជញ្ជូនឈើខុសច្បាប់ ឬទំនិញគេចពន្ធ ត្រូវតែមានកិច្ចសហការនិងជូនដំណឹងដល់អាជ្ញាធរថ្នាក់ខេត្ត ឬសុំកម្លាំងសហការជាដើមប៉ុន្តែជាទូទៅ កម្លាំងនគរបាលសេដ្ឋកិច្ចក្រសួងមហាផ្ទៃបែរជាធ្វើអ្វីៗតាមតែអំពើ ចិត្ត មិនដែលខ្វល់ខ្វាយពីបទបញ្ជារបស់ថ្នាក់លើ។
ចាប់តាំងពីលោក ជុង លឹមហាន បានបង្ក្រាបការដឹកជញ្ជូនឈើខុសច្បាប់ដល់ស្រុកកោះធំ ខេត្តកណ្តាល ដើម្បីយកស្នាដៃបង្អួតថ្នាក់លើ។ ជាធម្មតា លោក ជុង លឹមហាន គឺជាមនុស្សដែលចង់បានមុខ ចង់បានមាត់ខ្លាំងណាស់ ហើយគាត់ដើរតួជាអ្នកបង្ក្រាបការដឹកជញ្ជូនឈើខុសច្បាប់ឆ្លងខេត្ត តែមួយករណីប៉ុណ្ណោះ ដើម្បីយកគាប់យកគួរ ថ្នាក់លើ។ សេចក្តីណែនាំរបស់អគ្គស្នងការនគរបាលជាតិ ក៏ដូចជាបទបញ្ជារបស់រដ្ឋមន្ត្រីក្រសួងមហាផ្ទៃ ដែលអំពាវនាវឲ្យសមត្ថកិច្ចនិងមន្ត្រីគ្រប់ជាន់ថ្នាក់លុបបំបាត់ កុងត្រូលជជុះ ៕
