រាជធានីភ្នំពេញ ៖មន្ត្រីមួយចំនួន បាននិយាយ ឲ្យដឹងថា លោក អ៊ុំ វណ្ណា ជាមន្ត្រីប៉ូលិសសេដ្ឋកិច្ចពោរពេញដោយឥទ្ធិពលអំណាចនិង អត់ដែលផ្លាស់ប្តូរទៅណាទេ គឺក្តោបក្តាប់ការងារបង្ក្រាប បទល្មើសព្រៃឈើ ចំនួន ៤ខេត្ត ។ មន្ត្រីជាច្រើនត្រូវបានផ្លាស់ប្តូរ ទៅតាមអាណត្តិ នៃលិខិតបេសកកម្ម បើទោះបីជាមន្ត្រីទាំងនោះ មានស្នាដៃល្អ បែបណាក៏ដោយ ប៉ុន្តែសម្រាប់ លោក អ៊ុំ វណ្ណា បានក្លាយជា មន្ត្រីផ្ការីកគ្រប់រដូវ មានអំណាចពង្រាយកូនចៅ ឲ្យដាក់ប៉ុស្តិ៍ជជុះ ប្រមូលលុយ ពីឈ្មួញរកស៊ី ដឹកជញ្ជូនឈើខុសច្បាប់ ហើយលោក អ៊ុំ វណ្ណា ក៏បានធ្វើជាបង្អែក ឲ្យមេឈ្មួញ លឹម ប៊ុណ្ណា ហៅខ្នា ក្នុងការដឹកជញ្ជូនឈើ ចេញទៅស្រុកវៀតណាម ល្បីពេញភូមិភាគឥសាន្តផងដែរ។
លោក អ៊ុំ វណ្ណា ជាប្រធានប្រតិបត្តិនគរបាល ប្រឆាំងបទល្មើសសេដ្ឋកិច្ច ក្រសួងមហាផ្ទៃ ក្តោបក្តាប់ការងារបង្ក្រាប បទល្មើសព្រៃឈើ ចំនួន ៤ខេត្ត រួមមានរាជធានីភ្នំពេញ កំពង់ធំ ក្រចេះ និងខេត្ដកណ្ដាលមានអំណាចខ្លាំងប៉ុណ្ណានោះទេ បានជាគាត់អាចចាត់តាំង ខ្សែបណ្ដាញ ឱ្យឃុបឃិតជាមួយ ក្រុមឈ្មួញរកស៊ី ដឹកជញ្ជូនឈើខុសច្បាប់ យ៉ាងសុខស្រួល ហើយលោក អ៊ុំ វណ្ណា បានតាំងខ្លួនជាដៃស្ដាំ ប្រមូលប្រភពសេដ្ឋកិច្ច ឱ្យទៅមេធំៗ តាមរយៈការប្រើប្រាស់ លិខិតបញ្ជាបេសកកម្ម របស់លោក នេត សាវឿនបង្ខំឱ្យក្រុមឈ្មួញបង់លុយតាមចិត្តនឹកឃើញ ។
រឿងសំខាន់នោះ ប៉ូលីសសេដ្ឋកិច្ច ក្រោមបញ្ជារបស់លោក អ៊ុំ វណ្ណា តែងតែបានយកតួនាទីរបស់ខ្លួន ទៅប្រព្រឹត្តអំពើពុករលួយ ជាមួយពួកឈ្មួញ ច្រើនជាងការបង្ក្រាបទប់ស្កាត់ បទល្មើសព្រៃឈើ។
ជាក់ស្ដែងលោក អ៊ុំ វណ្ណា បានសាងសង់ភូមិគ្រឹះ យ៉ាងស្កឹមស្កៃមួយ នៅជាប់នឹងមាត់ទន្លេ ក្រោយវត្តវាលស្បូវ ក្នុងសង្កាត់វាលស្បូវ ខណ្ឌមានជ័យ រាជធានីភ្នំពេញ ដែលមួយផ្នែកធំ នៃគ្រឿងសំណង់ និងគ្រឿងសង្ហារឹម នៅក្នុងភូមិគ្រឹះនោះ សុទ្ធតែធ្វើឡើងពី ប្រភេទឈើប្រណីតៗ ដ៍មានតម្លៃលំដាប់សេដ្ឋី ៕
