ភ្នំពេញ ៖ ផ្ទៃដីទំនាស់នៅភូមិកកាប ទំហំជាង ៥ហិកតា ត្រូវបានម្ចាស់ដីជាជនរងគ្រោះធ្វើពាក្យសុំផ្តល់ភស្តុតាងបន្ថែមទៅ ក្រសួងដែនដីនគរូបនីយកម្ម និងសំណង់ជាប្រយោជន៍ដល់លោករដ្ឋមន្ត្រីពិនិត្យ និងពិចារណាក្រោយពីមានលិខិតជាផ្លូវការ របស់ខុទ្ទកាល័យសម្តេចតេជោ ហ៊ុន សែន ផ្ញើជូនលោករដ្ឋមន្ត្រីក្រសួងមួយនេះ ។
យោងតាមលិខិតពាក្យសុំផ្តល់ភស្តុតាងបន្ថែមរបស់លោកស្រី ហួត សារុំ អាយុ ៦៤ឆ្នាំ ចុះថ្ងៃទី ២៦ ខែកញ្ញា ឆ្នាំ២០១៤ គោរពជូន ឯកឧត្តម អ៊ឹម ឈុនលឹម ទេសរដ្ឋមន្ត្រី រដ្ឋមន្ត្រីក្រសួងដែនដីនគរូបនីយកម្ម និងសំណង់ស្នើសុំ មោឃភាពលិខិតលេខ ៣៨៩ ស.ជ.ណ ចុះថ្ងៃទី ១៨ ខែមិនា ឆ្នាំ២០០៨ របស់ទីស្តីការគណៈរដ្ឋមន្ត្រីដែលចុះហត្ថលេខា ដោយលោក ប្រាក់ សុខុន និងសុំសិទ្ធិគ្រប់គ្រងលើផ្ទៃដីចំនួន ៥ហិកតា ៦០អា និង១៣សង្ទីអា ដែលស្ថិតនៅភូមិកាកាប សង្កាត់កាកាប ខណ្ឌពោធិ៍សែនជ័យ រាជធានីភ្នំពេញ ។
នៅក្នុងលិខិតដដែលនោះបានបញ្ជាក់ឱ្យដឹងទៀតថា លោកស្រី ហួត សារុំ បានស្នើដល់ ឯកឧត្តម ទេសរដ្ឋមន្ត្រី រដ្ឋមន្ត្រី អ៊ឹម ឈុនលឹម ធ្វើការទប់ស្កាត់ហាមឃាត់មិនឱ្យមានការលក់ដូរចាក់ដីធ្វើរបងផ្ទេរសិទ្ធិ បញ្ចាំធ្វើអំណោយបណ្តាំមរតក ឬចាត់ចែងទៅឱ្យអ្នកដទៃ ដែលមានប័ណ្ណសម្គាល់សិទ្ធិកាន់កាប់អចលនវត្ថុលេខ ភព ១២៣១០ និងលេខ ភព ១២៣១១ ចុះថ្ងៃទី ២៦ ខែឧសភា ឆ្នាំ២០០៩ របស់ឈ្មោះ ឯម ឆន, ឈ្មោះ ជា ផរ និងឈ្មោះ ឆន ធូ ដែលជាជនមេក្លោងបង្កើតឱ្យមាន វិវាទដីធ្លីរវាងលោកស្រី ហួត សារុំ និងប្រជាពលរដ្ឋ ១២០គ្រួសារ ។
គួររំលឹកផងដែរថា លោស្រី ហួត សារុំ បានដាក់ពាក្យបណ្តឹងទៅសម្តេចតេជោ ហ៊ុន សែន នាយករដ្ឋមន្ត្រីនៃរាជរដ្ឋាភិ បាលកម្ពុជា កាលពីថ្ងៃទី ១៦ ខែកញ្ញា ឆ្នាំ២០១៤ ដើម្បីសម្តេចបានជ្រាបពិតប្រាកដអំពីរឿងរំលោភដីធ្លីមួយកន្លែងនេះ ពិតប្រាកដជាប្រយោជន៍ដល់លោកស្រី បានគ្រប់គ្រងដីធ្លីនេះឡើងវិញ ព្រោះលោកស្រីបានអាស្រ័យផលលើដីមួយកន្លែងនេះ ចាប់តាំងពីឆ្នាំ ១៩៧៩ មកដោយពុំមានប្រជាពលរដ្ឋណាម្នាក់ចង់បាន ឬដណ្តើមយកនោះឡើយ ។ ដោយឡែកមេភូមិ មេឃុំ ក៏បានគាំទ្រ នឹងបញ្ជាក់ថា លោកស្រី ហួត សារុំ ពិតជាបានកាន់កាប់ចាប់ពីឆ្នាំ ១៩៧៩ រហូតមកដែរ ។
នៅក្នុងលិខិតរបស់ លោកស្រី ហួត សារុំ ដដែលនោះបានបង្ហាញឱ្យឃើញទៀតថា ខុទ្ទកាល័យសម្តេចតេជោ ហ៊ុន សែន បានចេញលិខិតមួយច្បាប់លេខ ៩៨៨ ខន/០១៤ ចុះថ្ងៃទី ១៨ ខែកញ្ញា ឆ្នាំ២០១៤ គោរពជូនទៅ ឯកឧត្តម ទេសរដ្ឋមន្ត្រី រដ្ឋមន្ត្រីក្រសួងដែនដីនគរូបនីយកម្ម និងសំណង់ អ៊ឹម ឈុនលឹម ដើម្បីពិនិត្យសំណីរបស់ លោកស្រី ហួត សារុំ តាមការគួរ ។ ពាក្យបណ្តឹងរបស់ លោកស្រី ហួត សារុំ ទៅសម្តេចតេជោ ហ៊ុន សែន ប្រមុខរាជរដ្ឋាភិបាលកម្ពុជា មានអត្ថន័យដូចពាក្យសុំផ្តល់ភស្តុតាងបន្ថែមទៅក្រសួងដែនដីនគរូបនីយកម្ម និងសំណង់ដែរ គឺស្នើសុំទប់ស្កាត់រាល់សកម្មភាព ទាំងអស់មិនទទួលស្គាល់លិខិតកាន់កាប់អចលនវត្ថុរបស់មេក្លោងទាំងបីរូប និងសុំកាន់កាប់ផ្ទៃដី ៥ហិកតា ៦០អា និង១៣សង្ទីអា ដោយស្របច្បាប់ឡើងវិញ ។
លោកស្រី ហួត សារុំ បានមានប្រសាសន៍ឱ្យដឹងថា ក្រោយពីលិខិតអន្តរាគមន៍របស់ខុទ្ទកាល័យសម្តេចតេជោ ហ៊ុន សែន ទៅក្រសួងដែនដីនគរូបនីយកម្ម និងសំណង់ នាថ្ងៃទី ១៨ ខែកញ្ញា ឆ្នាំ២០១៤ រួចមកនាថ្ងៃទី ១៩ ខែកញ្ញា គណៈកម្មការចម្រុះសាលាខណ្ឌពោធិ៍សែនជ័យ បានចុះអនុវត្តន៍ស្មារតីលិខិតលេខ ៥៦៤ សជណ ចុះថ្ងៃទី ២៨ ខែមិនា ឆ្នាំ២០១៣ របស់ទីស្តីការគណៈរដ្ឋមន្ត្រីដើម្បីចាក់ដីធ្វើរបងហ៊ុំព័ទ្ធលើផ្ទៃដីទំនាស់រំលោភទៅលើលិខិតរបស់ខុទ្ទកាល័យ សម្តេចតេជោ ហ៊ុន សែន និងសាលដីការបស់តុលាការ រាជធានីភ្នំពេញ បណ្តាលឱ្យមានការប្រែប្រួលផ្លាស់ប្តូរស្ថានភាពដើមដែលជាវាលស្រែមានសន្ទូងកំពុងលូតលាស់ត្រូវបានក្រុម ជនមានអំណាចទឹកប្រាក់ចាក់ដីលុបបំបាត់សភាពដើមដើម្បីរំលោភយក ។ អ្វីដែលមើលទៅដែលបង្ហាញនូវភាពឃោរ ឃៅរបស់ក្រុមជនមានអំណាចនោះ គឺការប្រើប្រាស់ក្រុមប្រដាប់អាវុធចម្រុះដេកយាមការពារសកម្មភាព ២៤ម៉ោង លើ ២៤ម៉ោង រំលោភច្បាប់ និងរំលោភទៅ លើ សិទ្ធិមនុស្ស សិទ្ធិរស់នៅស្របច្បាប់របស់ប្រជាពលរដ្ឋពីសំណាក់មនុស្សដែលមានអំណាចបុណ្យស័ក្តិនិងប្រាក់កាសទាំងអស់នោះ ៕
