ប្រភពព័ត៌មានពីក្រុមឈ្មួញដឹកជញ្ជូនជ្រូក មាន់ ទា គោ ក្របី ពងមាន់ ពងទាឆ្លងកាត់ផ្លូវជាតិលេខ១ ផ្លូវជាតិលេខ២ ផ្លូវជាតិលេខ៣និងផ្លូវជាតិលេខ២១បេជាដើមចៀសមិនផុតពីត្រូវមន្ត្រី ពេទ្យសត្វក្រោមអំណាចរបស់លោក អ៊ុល ដូរិនហៅលីដូ បង្ខំឲ្យបង់លុយតាមអំពើចិត្តនោះទេ។ជាក់ស្តែងថ្មីៗនេះមាន សេចក្តីរាយការណ៍ថាពេទ្យសត្វមួយក្រុមដែលដាក់កន្លែងត្រួតពិនិត្យនៅ ស្រុកកៀនស្វាយខេត្តកណ្តាលកំពុងធ្វើសកម្មភាពយ៉ាងអនាធិបតេយ្យបំផុតហើយ មិនដែលចាត់វិធានការទប់ស្កាត់បទល្មើសម្តងណាទ្បើយ។
អាជីវកររកស៊ីដឹកជញ្ជូនសត្វជ្រូក មាន់ ទា គោក្របី និងពងមាន់ពងទាឆ្លងកាត់ទឹកដីខេត្តកណ្តាលបានឲ្យដឹងថា លោក អ៊ុល ដូរិន ហៅលីដូជាប្រធានការិយាល័យបសុពេទ្យខេត្តកណ្តាលបានបញ្ជាឲ្យកូនចៅធ្វើ សកម្មភាពនៅគ្រប់ច្រកចូលខេត្តកណ្តាលដើម្បីប្រមូលលុយយកទៅធ្វើមាន ធ្វើបាន ។
ប្រភពពីមន្ត្រីមន្ទីរកសិកម្មខេត្តកណ្តាលមួយចំនួនបានបង្ហើបឲ្យ ដឹងថាលោក អ៊ុល ដូរិន ហៅលីដូ ជាមន្ត្រីជំនិតរបស់លោក លឹមងួនហ្គ្រុយ អនុប្រធានមន្ទីរកសិកម្មខេត្តកណ្តាលទទួលបន្ទុកផ្នែកពេទ្យសត្វ ខេត្តកណ្តាល។ដោយសារតែមានខ្នងបង្អែករឹងមាំបែបនេះហើយទើបលោក អ៊ុល ដូរិន ហៅលីដូដាក់ពង្រាយកូនចៅឲ្យជំរិតយកលុយពីក្រុមឈ្មួញជា បន្តបន្ទាប់មិនថាឈ្មួញដឹកសត្វ មាន់ ទា គោ ជ្រូក ក្របីមានច្បាប់ឬគ្មានច្បាប់អនុញ្ញាតនោះទេគឺពួកគេគិតតែពីរឿង ប្រមូលលុយយកទៅបង់ឲ្យថ្នាក់លើប៉ុណ្ណោះ។នៅលើផ្លូវជាតិលេខ១ ក្នុងស្រុកកៀនស្វាយ ខេត្តកណ្តាលមានឈ្មួញមួយចំនួនដឹកក្រួច ឬមាន់ ទាមកពីស្រុកយួនដោយគ្មានច្បាប់អនុញ្ញាតប៉ុន្តែមន្ត្រីពេទ្យសត្វ មិនបានចាត់វិធានការបង្ក្រាបតាមច្បាប់ដើម្បីកុំឲ្យប៉ះពាល់ដល់សុខភាព របស់ប្រជាពលរដ្ឋខ្មែរនោះទេគឺពួកគេជំរិតយកលុយពីឈ្មួញហើយបណ្តោយ ឲ្យឈ្មួញខិលខូចធ្វើអ្វីៗតាមអំពើចិត្ត។
លោក អ៊ុលដូរិន ហៅលីដូ គឺមិនមែនតែអាជីវករដឹកសត្វ ជ្រូក គោ ក្របី មាន់ ទាធ្វើអាជីវកម្មប៉ុណ្ណោះទេដែលត្រូវគេបង្ខំឲ្យបង់លុយ យ៉ាងច្រើនសូម្បីតែប្រជាពលរដ្ឋទិញគោ ក្របីពីបណ្តាខេត្តផ្សេងៗយកទៅចិញ្ចឹមជាលក្ខណៈគ្រួសារក៏ត្រូវប្រឈម នឹងការជំរិតយកលុយដែរ ។លើសនេះទៅទៀតនៅក្នុងខេត្តកណ្តាលមានកុងស៊ីកាប់ជ្រូក កាប់គោរាប់សិបកន្លែងទាំងនៅក្រុងតាខ្មៅ និងបណ្តាស្រុកនានាហើយម្ចាស់កុងស៊ីទាំងនោះត្រូវតែបង់លុយឲ្យមន្ត្រី ពេទ្យសត្វតាមការកំណត់ទើបអាចប្រកបអាជីវកម្មបាន ។ការប្រព្រឹត្តអំពើពុករលួយរបស់លោក អ៊ុល ដូរិន ហៅលីដូប្រធានការិយាល័យបសុពេទ្យខេត្តកណ្តាលនិងបក្ខពួកអាចប្រមូលលុយ បានជាច្រើនលានរៀលក្នុងមួយថ្ងៃៗដូច្នេះក្រសួងនិងស្ថាប័នពាក់ព័ន្ធ ត្រូវចាត់វិធានការលើក្រុមមន្ត្រីពុករលួយទាំងនោះជាបន្ទាន់ ៕
