ក្រុមឈ្មួញបានឲ្យដឹងថា មេឈ្មួញ លឹម ប៊ុណ្ណាហៅខ្នា មិនសូវចុះទៅពិនិត្យមើល ការប្រមូលទិញឈើ ឬការបំផ្លាញព្រៃឈើដោយផ្ទាល់នោះទេ គឺគាត់បានចាត់តាំងមេការ ដ៏មានអំណាចម្នាក់ឈ្មោះ សានចយ ឲ្យជួយមើលការខុសត្រូវ ហើយឈ្មោះ សាន ចយ នេះ ក៏បានបង្កើតជំនួយការឬមេការរងផ្ទាល់ខ្លួន ៣ទៅ៤ នាក់ទៀត ឲ្យចូលព្រៃប្រមូលទិញឈើឬកេណ្ឌប្រជាពលរដ្ឋ ឲ្យកាប់ឈើប្រណីត តាមតំបន់អភិរក្សនិងនៅដែនជម្រកសត្វព្រៃ យ៉ាងវិនាសហិនហោច។ គេមិនច្បាស់ទេថាតើមេឈ្មួញ លឹម ប៊ុណ្ណា ហៅខ្នា និងបរិវាររបស់គាត់ ២នាក់ទៀត គឺឧកញ៉ាពិសី និងឧកញ៉ា ថៃ មានសិទ្ធិអំណាចអ្វីពិសេសក្នុងការរកស៊ីដឹកជញ្ជូនឈើខុសច្បាប់ នោះទេព្រោះសមត្ថកិច្ចនិងមន្ត្រីជំនាញ គ្រប់ជាន់ថ្នាក់ មិនដែលហ៊ាននិយាយឬប៉ះពាល់ជំនួញឈើខុសច្បាប់ របស់មេឈ្មួញ លឹម ប៊ុណ្ណា ហៅខ្នាម្តងណាឡើយ។
នៅតាមបណ្តាខេត្តភូមិភាគឦសាន ដូចជាខេត្តស្ទឹងត្រែង រតនគិរីនិងមណ្ឌលគិរី កំពុងមានសកម្មភាពកាប់បំផ្លាញព្រៃឈើខុសច្បាប់ យ៉ាងអនាធិបតេយ្យហើយគ្រាន់តែជ្រកក្រោមស្លាក ស្តារបាតអាង ទំនប់វារីអគ្គិសនី នៅស្រុកសេសាន មេឈ្មួញ លឹម ប៊ុណ្ណា ហៅខ្នាបានបំផ្លាញព្រៃឈើ យ៉ាងអនាធិបតេយ្យ នៅជុំវិញតំបន់នោះមិនដែលមាននរណាហ៊ានចុះបង្រ្កាប ហើយក្រោយមកមេឈ្មួញ លឹម ប៊ុណ្ណា ហៅខ្នាដែលមានបរិវារមួយចំនួនទៀត រួមមានឧកញ៉ា ថៃ និងឧកញ៉ា ពិសី ក៏បានពង្រីកការកាប់បំផ្លាញព្រៃឈើ ចូលក្នុងតំបន់ឧទ្យានជាតិនិងតំបន់ដែនជម្រកសត្វព្រៃលំផាត់យ៉ាង អនាធិបតេយ្យ ។
រាល់ការដឹកជញ្ជូនឈើ តាមរថយន្តយីឌុបទាំងខ្សែៗចេញពីព្រៃបំផ្លាញផ្លូវស្ពាន បង្កភាពក្តៅក្រហាយដល់ប្រជាពលរដ្ឋគេមិនដែលឃើញសមត្ថកិច្ច និងមន្ត្រីពាក់ព័ន្ធ ចាត់វិធានការទប់ស្កាត់ឬដោះស្រាយផលលំបាក ដែលប្រជាពលរដ្ឋបានជួបប្រទះនោះទេ គ្រាន់តែដឹងថាជាក្បួនរថយន្តដឹកឈើ របស់មេឈ្មួញ លឹម ប៊ុណ្ណា ហៅខ្នាបើកបរឆ្លងកាត់ផ្លូវណាមួយ គឺមន្ត្រីនិងសមត្ថកិច្ចពាក់ព័ន្ធនាំគ្នាញញឹមរង់ចាំ ទៅបើករបបយកទៅចែកគ្នា ធ្វើមានធ្វើបានទោះជារថយន្តដឹកឈើរបស់មេឈ្មួញ លឹម ប៊ុណ្ណា ហៅខ្នាបំផ្លាញស្ពានធ្វើឲ្យខូចផ្លូវ រំខានការរស់នៅរបស់ប្រជាពលរដ្ឋបែបណាក៏ដោយ ក៏គ្មាននរណាឈឺក្បាលវិលមុខដែរ។ កុំថាឡើយដល់ទៅមេឈ្មួញលឹម ប៊ុណ្ណា ហៅខ្នា សូម្បីតែឈ្មោះ សាន ចយ និងមេការរងមួយចំនួនទៀត ក៏មានសិទ្ធិអំណាចធំ គ្មាននរណាហ៊ានប៉ះពាល់ដែរ។
គេចង់ឃើញ រដ្ឋមន្ត្រីក្រសួងកសិកម្មលោក អ៊ុក រ៉ាប៊ុនពិនិត្យមើលភាពអនាធិបតេយ្យ នៃការកាប់បំផ្លាញព្រៃឈើនិងការដឹកជញ្ជូនឈើខុសច្បាប់ របស់មេឈ្មួញ លឹម ប៊ុណ្ណា ហៅខ្នាឡើងវិញផង ជាពិសេសអគ្គស្នងការនគរបាលជាតិ គួរតែតាមដានស្រាវជ្រាវមើលថាតើ នគរបាលសេដ្ឋកិច្ចក្រសួងមហាផ្ទៃ ថ្នាក់ណាខ្លះ បានយកតួនាទីរបស់ខ្លួនទៅជួយការពារនិងសម្របសម្រួល សកម្មភាពដឹកជញ្ជូនឈើខុសច្បាប់របស់មេឈ្មួញ លឹម ប៊ុណ្ណា ហៅខ្នា ៕
