ប្រជាពលរដ្ឋនៅស្រុកអន្លង់វែង បានឲ្យដឹងថា ច្រកសេដ្ឋកិច្ចអន្តរជាតិជាំស្រងាំនេះ មិនសូវមានសកម្មភាពដឹកជញ្ជូន ទំនិញគគ្រឹកគគ្រេងដូចច្រកអន្តរជាតិប៉ោយប៉ែតនោះទេ តែច្រកជាំស្រងាំនេះ ក៏មិនមានភាពស្ងាត់ពេកដែរ ព្រោះការនាំចូលទំនិញពីប្រទេសសៀមមកកាន់ប្រទេសកម្ពុជា ក្នុងមួយថ្ងៃៗក៏មានកម្រិតធម្មតា ដែលអាចឲ្យមន្ត្រីគយនៅច្រកជាំស្រងាំ រកប្រាក់ចំណូលបានខ្ពស់ ហើយមន្ត្រីគយទាំងនោះភាគច្រើនមិនចង់ផ្លាស់ចេញពីច្រកសេដ្ឋកិច្ចនេះ ទេ។ តែបញ្ហាសំខាន់ចំណូលដែលមន្ត្រីគយទាំងនោះទទួលបាន គឺមិនមែនជាចំណូលស្របច្បាប់នោះទេ តែវាជាចំណូលបានមកពីប្រភពខុសច្បាប់ តាមរយៈការកិបកេងថវិកាជាតិ។
មន្ត្រីថ្នាក់លើរបស់ខេត្តឧត្តរមានជ័យ នាំគ្នាបិទភ្នែកបិទត្រចៀកចំពោះសកម្មភាពរំលោភច្បាប់របស់មន្ត្រី ថ្នាក់ក្រោមនោះមន្ត្រីគយ នៅច្រកអន្តរជាតិ ជាំស្រងាំ ស្រុកអន្លង់វែង ខេត្តឧត្តរមានជ័យ ត្រូវគេដឹងថាកំពុងត្រេកត្រអាលខ្លាំងឡើងៗ ចំពោះការឃុបឃិតជាមួយក្រុមឈ្មួញ ក្នុងការនាំចូលទំនិញគេចពន្ធ និងទំនិញខូចគុណភាពពីប្រទេសសៀមមកកម្ពុជារៀងរាល់ថ្ងៃ។
ប្រភពបន្តថាបញ្ហាឃុបឃិតគ្មារវាងមន្ត្រីគយ ក្រុមឈ្មួញ ដើម្បីនាំចូលទំនិញខូចគុណភាព និងទំនិញគេចពន្ធនៅច្រកជាំស្រងាំនេះ មិនមែនទើបតែកើតឡើងថ្មីៗនេះទេ វាបានកើតឡើងជាច្រើនឆ្នាំមកហើយ តែមិនឃើញមានមន្ត្រីថ្នាក់លើរបស់ខេត្តឧត្តរមានជ័យណាម្នាក់ហ៊ាន ចេញមុខមកសើរើ ឬលុបបំបាត់សកម្មភាពខុសច្បាប់នោះទេ ។ នៅពេលថ្មីៗនេះសកម្មភាពទាំងនោះកំពុងតែមានភាពផុលផុសកាន់តែខ្លាំង ឡើងៗ ពិសេសកម្មភាពនាំចូលទំនិញខូចគុណភាពដោយគ្មានការត្រួតពិនិត្យ។
ការនាំចូលទំនិញពីប្រទេសសៀមចូលមកប្រទេសកម្ពុជាតាមច្រកជាំ ស្រងាំនេះ បានឲ្យដឹងថាមិនមែនតែមន្ត្រីគយមួយអង្គភាព អាចធ្វើឲ្យសកម្មភាពខុសច្បាប់នេះប្រព្រឹត្តទៅបានយ៉ាងរលូន ហើយមានរយៈពេលច្រើនឆ្នាំដូច្នេះបានទេ បើគ្មានការបើកដៃពីមន្ត្រីនគរបាល និងសមត្ថកិច្ចពាក់ព័ន្ធផ្សេងទៀតនោះ ៕
