ប្រភពពីសមត្ថកិច្ចពាក់ព័ន្ធក្នុងខេត្តស្ទឹងត្រែងបានឲ្យដឹងថា កន្លងមកសមត្ថកិច្ចកងរាជអាវុធហត្ថខេត្តស្ទឹងត្រែង ធ្លាប់ចាប់ម៉ូតូប្រមាណជាង២០០គ្រឿង ពីកន្លែងលក់ម៉ូតូនានានៅក្នុងខេត្តយកទៅទុកនៅទីបញ្ជាការរបស់ខ្លួន ហើយតម្រូវឲ្យម្ចាស់ម៉ូតូបង់លុយក្នុងមួយគ្រឿងពី២០០ទៅ៣០០ដុល្លារ។ ទង្វើបែបនេះរបស់លោក អៀង វ៉ាន់ឌី គឺជាអំពើខុសច្បាប់សុទ្ធសាធ ហើយបានបង្ហាញឲ្យឃើញពីការប្រព្រឹត្តអំពើពុករលួយយ៉ាងពេញបន្ទុកផង ដែរ។ ជាងនេះទៅទៀតកងរាជអាវុធហត្ថខេត្តស្ទឹងត្រែង ធ្លាប់ចាប់ក្របីប្រជាពលរដ្ឋរាប់សិបក្បាល ហើយតម្រូវឲ្យប្រជាពលរដ្ឋបង់លុយយ៉ាងច្រើន ដោយចោទប្រកាន់ស្រេចតែអំពើចិត្តរបស់ខ្លួន។ ហេតុនេះក្រសួងនិងស្ថាប័នពាក់ព័ន្ធត្រូវចាត់វិធានការតាមច្បាប់លើ បុគ្គល អៀង វ៉ាន់ឌី ដើម្បីកុំឲ្យមន្ត្រីរូបនេះប្រព្រឹត្តអំពើអាក្រក់នាំឲ្យប៉ះពាល់ដល់ កេរ្តិ៍ឈ្មោះកងរាជអាវុធហត្ថតទៅទៀត។
ប្រជាពលរដ្ឋនៅខេត្តស្ទឹងត្រែងបានឲ្យដឹងថា សព្វថ្ងៃនេះពួកគាត់គ្រាន់តែឮឈ្មោះលោក អៀង វ៉ាន់ឌី មេបញ្ជាការកងរាជអាវុធហត្ថខេត្តស្ទឹង ត្រែង គឺមានការភ័យខ្លាចអំណាចរបស់ជននេះយ៉ាងខ្លាំង។ ដោយសារ ក្នុងតួនាទីជាមេបញ្ជាការកងរាជអាវុធហត្ថខេត្តស្ទឹងត្រែង លោក អៀង វ៉ាន់ឌី មិនដែលអនុវត្តន៍តាមតួនាទីរបស់ខ្លួនក្នុងការការពារនិង ដោះស្រាយបញ្ហាជូនប្រជាពលរដ្ឋនោះទេ។ ផ្ទុយទៅវិញលោក អៀង វ៉ាន់ឌី បានប្រើអំណាចរបស់ខ្លួនទៅកាងក្រុមឈ្មួញរកស៊ីឈើខុសច្បាប់និង អ្នកប្រព្រឹត្តបទល្មើសផ្សេងៗទៀត ហើយប្រើអំណាចធ្វើបាបប្រជាពលរដ្ឋទន់ខ្សោយតាមអំពើចិត្ត។
សូម្បីតែមន្ត្រីកងរាជអាវុធហត្ថតូចតាចមួយចំនួននៅក្នុង ខេត្តស្ទឹងត្រែង ក៏មិនពេញចិត្តនឹងទង្វើរបស់ចៅហ្វាយនាយខ្លួនដែរ ព្រោះលោក អៀង វ៉ាន់ឌី ប្រព្រឹត្តតែអំពើអាក្រក់ដូចជាកាងក្រុមឈ្មួញ រកស៊ីឈើខុសច្បាប់ កាងក្រុមឈ្មួញដឹកទំនិញគេចពន្ធ និងកាងក្រុមអ្នករកស៊ីខុសច្បាប់ផ្សេងៗទៀតយ៉ាងក្រអឺតក្រទម ។ កន្លងមកពេលចុះបង្ក្រាបបទល្មើសមន្ត្រីកងរាជអាវុធហត្ថរបស់លោក អៀង វ៉ាន់ឌី ធ្លាប់ប្រើកាំភ្លើងបាញ់បុរសម្នាក់ឲ្យរងរបួស ហើយជនរងគ្រោះបានប្តឹងផ្តល់ទាមទារយុត្តិធម៌ ក៏ប៉ុន្តែរហូតមកដល់ពេលនេះគ្មានស្ថាប័នណារកយុត្តិធម៌ឲ្យជនរងគ្រោះ ឡើយ។ ប្រការនេះហើយ ដែលលោក អៀង វ៉ាន់ឌី កាន់តែបានចិត្តក្នុងការប្រើអំណាចធ្វើបាបប្រជាពលរដ្ឋក្រីក្រទន់ ខ្សោយក្នុងខេត្តស្ទឹងត្រែង កាន់តែខ្លាំងឡើងៗ។
