ខេត្តបន្ទាយមានជ័យ ៖ ប្រជាពលរដ្ឋបានសំដែង ការព្រួយបារម្ភអំពី ការសាងសង់ទីតាំងជល់មាន់ កណ្តាលក្រុងប៉ោយប៉ែត ដូច្នេះ អាចបង្កមានភាពអសកម្ម នៅក្នុងមូលដ្ឋាន ដូចអំពើឆក់ប្លន់ អសន្តិសុខសង្គម អំពើហិង្សានៅក្នុងគ្រួសារ ផ្ទុយពីគោលនយោបាយ ភូមិឃុំ មានសុវត្ថិភាព។
ទីតាំងគម្រោង បើកសៃវៀនបញ្ជល់មាន់ នៅកណ្តាលទីប្រជុំជនក្រុងប៉ោយប៉ែត ដោយមិនខ្លាចពីច្បាប់ និងអាជ្ញាធរមានសមត្ថកិច្ច ដោយអាងខ្លួនជា អ្នកមានទ្រព្យសម្បត្តិ ច្រើន នាំឲ្យប្រជាពលរដ្ឋរិះគន់ដល់មន្ត្រី ពាក់ព័ន្ធ ដែលបណ្តោយឲ្យក្រុមឈ្មួញ សាងសង់សៃវៀនជល់មាន់ ដ៏ធំមួយនោះ ជិតរួចរាល់ នៅត្រង់ចំណុច មុខចំណតទទួលពលករខ្មែរ ស្ថិតនៅភូមិ-សង្កាត់ ក្រុងប៉ោយប៉ែត ខេត្តបន្ទាយមានជ័យ ហើយ។
ប្រជាពលរដ្ឋបានបន្តថា ប្រសិនជាសៃវៀនបញ្ជល់មាន់នេះ សាងសង់រួចរាល់ ហើយបើកដំណើរការ ពួកគាត់ពិតជារស់នៅ ទាំងការភ័យខ្លាច ព្រួយបារម្ភ ពីសុវត្ថិភាព ហើយពួកគាត់សង្ឃឹមថា អាជ្ញាធរមានសមត្ថកិច្ច មិនអនុញ្ញាតឲ្យ សាងសង់សៃវៀនបញ្ជល់មាន់ បន្តទៀតទេ។ ករណីខាលើនេះលោក អ៊ុំ សុផល អធិការក្រុងប៉ោយប៉ែត ធ្លាប់បានបញ្ជាក់ថា ករណីខាងលើនេះ លោកបានជ្រាបហើយ ក៏ប៉ុន្តែរង់ចាំមើលសិនថា គេបើកសៃវៀនមែនទេ បើហ៊ានបើកមែន លោកនឹងចាត់ការភ្លាមៗ ទៅតាមច្បាប់ភ្លាម ៕
