ប្រភពពីមន្ត្រីរាជការបម្រើការងារក្នុងមន្ទីរសុខាភិបាលខេត្តកំពង់ឆ្នាំងបានឲ្យដឹងថា ក្រោយពេលលោក ប្រាក់ វ៉ុន ត្រូវបានតែងតាំងជាប្រធានមន្ទីរសុខាភិបាលមកគាត់បាន ប្រព្រឹត្តអំពើពុករលួយបក្ខពួកនិយមមិនខុសពីលោក តឹក សារឿន ជាអតីតប្រធានមន្ទីរដែលបានទទួលមរណភាពទៅហើយនោះទេ។ អំពើពុករលួយរបស់លោក ប្រាក់ វ៉ុន បើពិនិត្យឲ្យដិតដល់ទៅ មានសភាពខ្លាំងក្លាជាងលោក តឹក សារឿន ទៅទៀតព្រោះលោក ប្រាក់ វ៉ុន ប្រមូលលុយពីគ្រប់ច្រកល្ហកដើម្បីធ្វើមានធ្វើបានផ្ទាល់ខ្លួនលឿនពេក។ បើតាមប្រភពដែលស្និទ្ធនឹងលោក ប្រាក់ វ៉ុន បានឲ្យដឹងថា ក្នុងមួយឆ្នាំៗ ថវិកាជាតិដែលមិនមែនជាកម្មវិធីត្រូវធ្លាក់ក្នុងកណ្តាប់ដៃលោក ប្រាក់ វ៉ុន មិនតិចជាង៥០០លានរៀលនោះទេ នេះមិនទាន់រាប់បញ្ចូលដល់ការបែងចែកសម្រាប់មន្ត្រីដែលជាបក្ខពួករបស់គាត់នៅឡើយ។ ហេតុនេះ លោក ម៉ម ប៊ុនហេង ត្រូវចាត់វិធានការក្តៅចំពោះលោក ប្រាក់ វ៉ុន ជាបន្ទាន់ ។
បញ្ហានេះលោក ម៉ម ប៊ុនហេង ដែលជារដ្ឋមន្ត្រីក្រសួងសុខាភិបាលនិងលោក ឱម យ៉ិនទៀង ដែលជាប្រធានអង្គភាពប្រឆាំងអំពើពុករលួយមិនត្រូវមើលរំលងតទៅទៀតទេ ហើយគួរតែចាត់វិធានការតាមច្បាប់ជាបន្ទាន់បំផុត។ បើមិនដូច្នោះទេ លោក ប្រាក់ វ៉ុន បន្តធ្វើអ្វីៗតាមអំពើចិត្ត និងអាចប្រើលុយទិញទឹកចិត្តក្រុមអធិការកិច្ចក្រសួងសុខាភិបាលឲ្យជួយបិទបាំងអំពើពុករលួយរបស់ខ្លួនទៀតផង។
ប្រភពពីមន្ត្រីរាជការមន្ទីរសុខាភិបាលខេត្តកំពង់ឆ្នាំងបានឲ្យដឹងទៀតថា ថវិកាដែលលោក ប្រាក់ វ៉ុន កេងប្រវ័ញ្ចលេបត្របាក់ស្រស់ៗនោះ ភាគច្រើនគឺនៅក្នុងប្រាក់គណនេយ្យលេខ ៦០២,ប្រាក់គណនេយ្យលេខ ៦០៥,ប្រាក់គណនេយ្យលេខ៦១៥, ប្រាក់គណនេយ្យលេខ៦២៤ ប្រាក់គណនេយ្យលេខ ៦៤៤ និងប្រាក់គណនេយ្យលេខ ៦៥៧?។ តាមរយៈប្រាក់គណនេយ្យដូចរៀបរាប់ខាងលើនេះ លោក ប្រាក់ វ៉ុន អាចឃុបឃិតជាមួយមន្ត្រីពាក់ព័ន្ធធ្វើការបំប៉ោងតួលេខតាមអំពើចិត្ត ហើយផលប្រយោជន៍ភាគច្រើនបានធ្លាក់ក្នុងកណ្តាប់ដៃរបស់គាត់ ៕
