តាមមន្ត្រីក្រុមអាជ្ញាធរតាមដានពីបទល្មើសព្រៃឈើក្នុងខេត្តក្រចេះ និយាយថា លោក ប្រាក់ សំបូរ ដែលជា នាយផ្នែករដ្ឋបាលព្រៃឈើស្រុកស្នួល និងស្រុកឆ្លូង និងនាយខណ្ឌរដ្ឋបាលព្រៃឈើខេត្តក្រចេះនោះបាន និងកំពុងឃុប ឃិតជាមួយមេឈ្មួញបទល្មើសព្រៃឈើពីររូប១-ឈ្មោះ សន ឈឿន ២-ឈ្មោះ ផល (សាម៉ូម)ឱ្យចរាចរដឹកឈើ ខុសច្បាប់ ទៅលក់នៅព្រំដែនយួន ភ្លេចគិតពីតួនាទីរដ្ឋបាលព្រៃឈើដែលរដ្ឋាភិបាលចាត់តាំងឱ្យមកប្រចាំការទប់ ស្កាត់បទល្មើសព្រៃឈើ មិនគួរថ្នាក់លើអាជ្ញាធររដ្ឋបាលព្រៃឈើភ្នំពេញ លោក ឆេង គឹមស៊ុន និងលោក អ៊ុក រ៉ាប៊ុន រដ្ឋមន្ត្រីក្រសួងកសិកម្មមើលរំលងនោះទេ ! ។
តាមការសង្កេតក្នុងមួយយប់ៗយ៉ាងហោចណាស់ក៏មានរថយន្តដឹកឈើប្រណីត និង ឈើក្រហមចាប់ពី ៦០ ទៅ ៨០ ឡានដែរ ដែលឆ្លងកាត់ស្រុកស្នួលទៅលក់នៅឯប្រទេសយួន ហើយដែលចៅហ្វាយស្រុកស្នួល គង់ គឹមនី ក៏ទំនងជាត្រូវប៉ាន់បំផុត មិនចាញ់ក្រុមរដ្ឋបាលព្រៃឈើតាមជាន់ថ្នាក់នោះដែរ ។
បើតាមប្រភពពីប្រជាពលរដ្ឋដែលរស់នៅក្នុងស្រុកស្នួល ខេត្តក្រចេះបានប្រាប់អោយយើងទៀតដឹងថា ជារៀងរាល់យប់មានរថយន្តដឹកឈើចាប់ពី៦០ទៅ៨០គ្រឿងដែលបានធ្វើដំណើរ ឆ្លងកាត់ស្រុកស្នួល យកទៅលក់ បន្តនៅប្រទេសយួន ប៉ុន្តែប្រជាពលរដ្ឋតែងមានការងឿងឆ្ងល់យ៉ាងខ្លាំងចំពោះរថយន្តរបស់សមត្ថកិច្ចដែលចតនៅ តាមដងផ្លូវស្អេកស្កះ របស់ជំនាញរដ្ឋបាលព្រៃឈើដែលដាក់ក្បាលចេញរង់ចាំ ទប់ស្កាត់រថយន្តដែលដឹកឈើនៅតាម ដងផ្លូវនោះថា គេពុំដែលឃើញសមត្ថកិច្ចទាំងនោះធ្វើការបង្ក្រាបម្តងណាឡើយ ។
តាមប្រជាពលរដ្ឋបានបន្តទៀតថាជំនាញសមត្ថកិច្ចគឺជាកូនចៅរបស់លោក ប្រាក់ សំបូរ នាយផ្នែករដ្ឋបាល ព្រៃឈើស្រុកស្នួលនិងស្រុកឆ្លូងដែលលោក ប្រាក់ សំបូរ បានដាក់ពង្រាយកូនចៅគ្រប់ទីកន្លែង ដើម្បីរាប់ក្បាលឡាន យកលុយ តែប៉ុណ្ណោះ។
ជាក់ស្តែង ដូចជារថយន្តដែលដឹកឈើរបស់ឈ្មួញឈ្មោះ សន ឈឿន (ហៅប៉ាអាខុង) និងឈ្មួញម្នាក់ទៀត ដែលគេហៅថា ផល សាម៉ូម តែងតែធ្វើចរាចរណ៍ឆ្លងកាត់ស្រុកស្នួលឆ្ពោះទៅលក់នៅឯប្រទេសយួន ជាប្រចាំនោះ ។ ហើយដែលប្រភពអះអាងថា មានការត្រូវរ៉ូវយ៉ាងពិសេសជាមួយមេស្រុកស្នួល គង់ គឹមនី, ប្រាក់ សំបូរ ជានាយផ្នែក និងនាយខណ្ឌ សួយ សារិត ។
មន្ត្រីជាប្រភពព័ត៌មានដដែលបានអោយដឹងទៀតថា ការដែលមានរថយន្តដឹកឈើទាំងនេះអាចធ្វើចរាចរណ៍ ទៅបានយ៉ាងរលូនបែបនេះ គឺដោយសាតែមានការត្រូវរ៉ូវគ្នាពីសំណាក់លោកនាយផ្នែករដ្ឋបាលព្រៃឈើ ស្រុកស្នួល ប្រាក់ សំបូរ ចៅហ្វាយស្រុក ព្រមទាំងមន្ត្រីក្រោមឱវាទ។
ផ្ទុយទៅវិញ បញ្ហានេះ មន្ត្រីថ្នាក់តំណាងរាស្ត្រខេត្តនេះ ក៏បានសំណូមពរឱ្យថ្នាក់លើគួរតែពិនិត្យមន្ត្រីក្រោម ឱវាទឱ្យមែនទែន ព្រោះថា ទីណាមានមន្ត្រីប្រៀបដូចចាត់តាំងអាជ័យឱ្យចាំចំការមិនគួរបើថ្នាក់លើមើលរំលងព្រៃ ឈើជិតរលាយចុងក្រោយនោះទេ ។/
ដោយ ៖ មហាទេព្យ
