ថ្មីៗនេះឡានយីឌុបដឹកឈើរបស់ក្រុមហ៊ុន ហួត ម៉េងរីតាបានបង្កគ្រោះថ្នាក់ចរាចរណ៏បណ្តាលឲ្យមនុស្សស្លាប់ម្នាក់និងរបួស៥នាក់ ។
សេចក្តីរាយការណ៏បានឲ្យដឹងថាជារៀងរាល់ថៃ្ងក្រុមហ៊ុនហួតម៉េងរីតាធ្វើសកម្មភាពដឹកជញ្ជូនដោយលួចលាក់ផ្ទុកឈើដឹកឈើលើសចំនួនពីការផ្តល់អាជ្ញាប័ណ្ណបង្កឲ្យខូចផ្លូវនិងគ្រោះថ្នាក់ចរាចរណ៏ ។
សេចក្តីរាយការណ៏បានបន្តឲ្យដឹងថាឈើក្នុងព្រៃសម្បទានរបស់ក្រុមហ៊ុននេះអស់យូរយារហើយ អ្វីដែលក្រុមហ៊ុនចេះតែ មានឈើដឹកធ្វើអាជីវកម្មទៅតាមបណ្តាខេត្តជារៀងរាល់ថៃ្ងគឺជាឈើខុសច្បាប់ដែលក្រុមហ៊ុនដាក់បណ្តាញទិញឈើពីតំបន់ខាងក្នុង។
សេចក្តីរាយការណ៍បានឲ្យដឹងទៀតថាកន្លងមកឧត្តមសេនីយ៍ផ្កាយ ពីរឈ្មោះ ជ័យ (ឈ្មោះពិត មិក សុផាណារ៉េត) ដែលជាជំនួយការ របស់ឧត្តមសេនីយ៍ យឹម លាង មេអង្គរក្សសម្តេចប្រធានព្រឹទ្ធសភាគឺជាចេញមុខកាងក្រុមហ៊ុននេះប្រៀបដូចជាហ្នឹង!ការកំចាយសន្លឹកឆ្នោតបក្សប្រជាជាជនអ៊ីចឹង!ព្រោះអ្នកកាងឲ្យក្រុមហ៊ុនហួតម៉េងរីតាប្រើសុទ្ឋតែសែ្បកអង្គរក្សប្រធានដឹកនាំបក្សប្រជាជន។ក្រុមហ៊ុនដែលរៀបរាប់ឈ្មោះខាងលើនេះ បានប្រើប្រាស់ប៉ូលិសសក្តិ៣ម្នាក់ឈ្មោះយ៉ា ឲ្យចេញមុខប្រមូលទិញឈើផ្តាច់ មុខពីពួកអ្នកលួចកាប់ឈើទាំងឡាយនៅព្រៃរបស់ភូមិអូររំចេក ឃុំអន្លង់វែង ស្រុកអន្លង់វែងនិងប្រមូលទិញឈើគ្រញូងពីប្រជាពលរដ្ឋឆ្លងដែនទៅលួចកាប់ពីដីថៃតំបន់នោះផងដែរយកទៅស្តុកទុកក្នុងឃ្លាំងដ៏ធំរបស់ក្រុមហ៊ុន ហួត ម៉េង រីតា ដោយមានអ្នកយាមកាមយ៉ាង តឹងរ៉ឹងបំផុតមិនឱ្យអ្នកក្រៅណាអាចចេញចូលមើលឃើញពីគំនរឈើគរដូចភ្នំនៅក្នុងក្រុមហ៊ុនខុសច្បាប់របស់ពួកគេឡើយ ។ នៅពេលយប់ស្ងាត់ ពួក គេតែងតែដឹកឈើទាំងនោះចេញក្នុងមួយយប់ៗពី២ទៅ៣រថយន្តខ្នាតយក្ស គ្របយ៉ាងជិតឈឹង! និងមានអ្នកជិះ រថយន្តទំនើបតាមរត់ការនាំផ្លូវផងដែរ ដែលគេបានស្គាល់ថាបុរសនោះឈ្មោះ ប៉ុល គឺជាជើងខ្លាំងខាងបិទមាត់សមត្ថ កិច្ចតាមដងផ្លូវ ។
ឯលោកផ្កាយពីរ មិកសុផាណារ៉េត ហៅ ជ័យ ធ្លាប់បានប្រាប់ កាសែតថា ក្រុមហ៊ុន ហួត ម៉េងរីតា គឺត្រូវបានគ្រប់គ្រងដឹកនាំដោយភរិយា របស់លោកហើយក្រុមហ៊ុននេះ ទទួល បានដីសម្បទានសេដ្ឋកិច្ចពីរាជរដ្ឋាភិបាល និងរកស៊ីត្រឹមត្រូវតាមច្បាប់ ។
ប៉ុន្តែផ្ទុយពីសម្តីរបស់លោក ជ័យ ក្រុមហ៊ុននោះមានតែឈ្មោះគ្មាន ការអភិវឌ្ឍនិងដាំដុះអ្វីគោរពតាម លក្ខខណ្ឌដែលទទួលបានដីសម្បទានសេដ្ឋកិច្ចពីរដ្ឋនោះទេ ។ ផ្ទុយទៅវិញ គឺយកឈ្មោះក្រុមហ៊ុនដើម្បីដឹកឈើរកស៊ីទៅវិញ ។
តាមប្រជាពលរដ្ឋបញ្ជាក់ថា ក្រុមហ៊ុន ហួត ម៉េងរីតា ដែលគេដឹង ថា មានឧត្តមសេនីយ៍ផ្កាយ២ ឈ្មោះ មុត សុផាណារ៉េត ហៅ ជ័យ ជា មេបញ្ជាការរងកងអង្គរក្សសម្តេចប្រធានព្រឹទ្ធសភាធ្វើជាខ្នងបង្អែកដ៏សែនរឹង មាំនិងមានការមើលការខុសត្រូវពីក្រោយឈ្មោះ យឹម លាង នោះបានធ្វើសកម្ម ភាពដឹកជញ្ជូនជួញដូរឈើយ៉ាងកក្រើកអាណាចក្រខេត្តសៀមរាប ខេត្តឧត្តរមានជ័យ ខណៈដែលរាជរដ្ឋាភិបាលកំ ពុងតែធ្វើការទប់ស្កាត់សកម្មភាពបទ ល្មើសព្រៃឈើនៅទូទាំងប្រទេស និង ធ្វើការកែទម្រង់ស៊ីជម្រៅនៅក្នុងរាជ រដ្ឋាភិបាលអាណត្តិទី៥នេះ ។
ជាក់ស្តែងលោក ជួត ច័ន្ទ តារា អនុប្រធានមន្ទីរសាធារណការ ខេត្តសៀមរាបនិងជាប្រធានក្រុមចល័តពិសេសបានឲ្យដឹងពីពេលកន្លងមកថា ក្រោយពេលថ្លឹងនៅស្ថានីយ៍ធំឡានដឹកឈើទាំងពីរគ្រឿងរបស់ក្រុមហ៊ុន ហួត ម៉េងរីតាក្នុង១គ្រឿងៗលើសទម្ងន់ចាប់ ពី១៥តោនឯណោះ គឺលើសក្នុងកំរិតចាប់ ពី២០ភាគរយឡើង ដែលត្រូវពិន័យជា ប្រាក់ក្នុង១តោនចំនួន ៣០ម៉ឺនរៀល។
លោកបានបញ្ជាក់ថា រថយន្ត យីឌុបកង់៨ច្បាប់អនុញ្ញាតឲ្យផ្ទុកទម្ងន់ចំនួន២១តោន គិតទាំងសំបករថយន្ត ឯរថយន្តកង់១០ផ្ទុកបាន២៥តោន រថ យន្តយីឌុបភ្លៅ៤ ផ្ទុកបាន៣០តោន រថ យន្តយីឌុបភ្លៅ៥ ផ្ទុកបាន៤០តោន ។ ចំពោះរថយន្តដឹកឈើទាំងពីរគ្រឿង របស់ក្រុមហ៊ុន ហួត ម៉េងរីតា នេះវិញ គឺមានភ្លៅ៦គេផ្ទុកទម្ងន់រហូតជិត ៦០ តោន ដែលតាមការពិតនៅប្រទេស កម្ពុជាមិនទាន់មានច្បាប់អនុញ្ញាតឲ្យប្រើប្រាស់រថយន្តមានភ្លៅ៦បែបនេះនៅឡើយទេ ហើយករណីនេះរដ្ឋមន្ត្រីក្រ-សួងសាធារណការនិងដឹកជញ្ជូនកំពុង តែមានវិធានការ ។
ក្រុមហ៊ុន ហួត ម៉េងរីតាមួយនេះទទួលបានសិទ្ធិសម្បទានលើផ្ទៃ៣០០០ហិកតាពីរាជរដ្ឋាភិបាលកម្ពុជា ដែលពួកគេបានបោះទីតាំងនៅក្នុងស្រុកអន្លង់វែង ខេត្តឧត្តរមានជ័យនៅចំណុច ព្រៃស្អាកនោះយូរឆ្នាំនិងគ្មានការដាំដុះស្អីទេក្រៅពីប្រើឈ្មោះដីព្រៃសម្បទានបាំងមុខដឹកឈើខុសច្បាប់នោះ ។
តាមពលរដ្ឋនៅខេត្តសៀមរាប និងឧត្តរមានជ័យបាននិយាយថា ចាប់ តាំងពីបានឃើញក្រុមហ៊ុន ហួត ម៉េងរី តា បានបោះទីតាំងនៅចំណុចខាងលើ មក គេពុំដែលឃើញក្រុមហ៊ុននេះធ្វើការ អភិវឌ្ឍអ្វីទៅតាមកិច្ចសន្យាជាមួយរាជរដ្ឋាភិបាលកម្ពុជានោះទេ ។
ផ្ទុយទៅវិញគេឃើញតែក្រុមហ៊ុនមមាញឹកក្នុងការដឹកជញ្ជូនឈើជាបន្តបន្ទាប់ស្ទើររៀងរាល់យប់ដោយក្នុង មួយយប់ៗមិនតិចជាងពី២ទៅ៣ឡានយីឌុបឡើយហើយកាលពីពួកគេបង្កើតក្រុមហ៊ុនដំបូងគឺដឹកសុទ្ធតែឈើគ្រញូង លុះមកដល់ពេលនេះពួកគេក៏ប្រែរូបភាព មកដឹកឈើប្រភេទលេខ២វិញម្តង និង ងាយស្រួលបង្កប់ឈើល្អក្រញូងពីក្រោម ដោយគ្មាននរណាហ៊ានប៉ះឡើយ ។
បើតាមប្រភពបន្តថាតាម ពិត ក្រុមហ៊ុនមួយនេះបានកាប់ឈើអស់តាំងពីមួយឆ្នាំដំបូងម៉្លេះ? ក្រោយពេលអស់ ព្រៃឈើនៅក្នុងក្រុមហ៊ុនរបស់ខ្លួនហើយ ក៏បានដើរប្រមូលទិញឈើអនាធិបតេយ្យ ពីតំបន់ផ្សេងៗ និងជួលឲ្យប្រជាពលរដ្ឋ ចូលទៅកាប់ឈើនៅតំបន់ហាមឃាត់ មួយចំនួនយកមកលក់ឲ្យក្រុមហ៊ុន ហើយ បន្តដឹកចេញទៅកាន់ទីផ្សារ ដោយសុំ អនុញ្ញាតច្បាប់ដឹកជញ្ជូនពីរដ្ឋបាលព្រៃឈើ និងមានឧត្តមសេនីយ៍ពាក់ផ្កាយពីរ ឈ្មោះជ័យ(ឈ្មោះហៅក្រៅ) ខ្លួនឯង និងជាមេបញ្ជាការរងកងអង្គរក្សសម្តេចប្រធានព្រឹទ្ធសភានៅកាងពីក្រោយខ្នងផង ។
មន្ត្រីជំនាញនិ យាយថាផ្កាយ២ ឈ្មោះ ជ័យ នោះ គឺគ្រាន់តែជាអ្នកចេញមុខទេ ការពិត មេធំ គឺលោកផ្កាយ៣ យឹម លាង មេបញ្ជាការកងអង្គរក្ស និងជាទីប្រឹក្សា សម្តេចប្រធានព្រឹទ្ធសភាដែលឪពុករបស់លោកគឺលោក យឹម ឆៃលី ឧបនាយក រដ្ឋមន្ត្រីប្រធានក្រុមប្រឹក្សាស្តារនិងអភិវឌ្ឍន៍វិស័យកសិកម្ម ដែលសម្តេចតេជោ ប្រគល់សិទ្ធិឲ្យដឹកនាំក្រុមបង្ក្រាបបទល្មើសព្រៃឈើ និងជលផល ។ មេការ ក្រុមហ៊ុន ហួត ម៉េងរីតា ម្នាក់ឈ្មោះ ឃុយ ដែលប្រភពខ្លះបានអះអាងថា គឺ ត្រូវជាសាច់ញាតិរបស់លោកផ្កាយ២ឈ្មោះ ជ័យ ដែរនោះទទួលស្គាល់ថា កាលពីមុនក្រុមហ៊ុនរបស់លោក(ហួត ម៉េងរីតា) ដឹកសុទ្ធតែឈើគ្រញូងប្រា កដមែន ។
ពាក់ព័ន្ធនឹងផ្កាយពីរឈ្មោះ ជ័យ ក្របខណ្ឌប្រដាប់អាវុធ ក៏ដូចជាស័ក្តិ៣ឈ្មោះ យ៉ា ដែលសុទ្ធតែ ស៊ីប្រាក់ខែរដ្ឋហើយមកកាងពាក់ព័ន្ធរក ស៊ីឈើខុសច្បាប់គេសួរថា តើការខិត ខំធ្វើកំណែទម្រង់ស៊ីជម្រៅរបស់សម្តេច ហ៊ុន សែនមានប្រសិទ្ឋភាពឬក៏អត់នៅនីតិកាលនេះ។
គួររំលឹកផងដែរថាកាលពីថ្ងៃ ទី១៧ ខែវិច្ឆិកា ឆ្នាំ២០១៣ នៅលើដងផ្លូវជាតិលេខ៦៧ស្ថិតក្នុងតំបន់ភូមិគោកត្រាច ស្រុកប្រាសាទបាគងខេត្តសៀមរាបត្រូវបានក្រុមមន្ត្រីត្រួត ពិនិត្យចល័តពិសេសនៃមន្ទីរសាធារណៈការ និងដឹកជញ្ជូនខេត្តសៀមរាបសហ ការជាមួយមន្ត្រីចម្រុះបានឃាត់ចាប់រថយន្តប្រភេទយីឌុប ខ្នាតយក្សចំនួនពីរ គ្រឿងរបស់ក្រុមហ៊ុន ហួត ម៉េងរីតា ដែលបានធ្វើសកម្មភាពល្មើសច្បាប់ដឹកឈើលើសទម្ងន់រហូតដល់ទៅជិត២០តោន ។ពាក់ព័ន្ឋការចោទប្រកាន់ខាងលើសារពត៌មានយើងមិនអាចទាក់ទងលោកមិកសុផាណារ៉េត ហៅ ជ័យនិងលោកផ្កាយ៣ យឹម លាង មេបញ្ជាការកងអង្គរក្ស និងជាទីប្រឹក្សា សម្តេចប្រធានព្រឹទ្ធសភាបាននៅឡើយទេ៕
