សេចក្តីរាយការណ៍មួយចំនួនបានដាក់ការសង្ស័យថា ប្រហែលជាលោក ណៅ ធួក អគ្គនាយករដ្ឋបាលជលផលទទួលបានផលប្រយោជន៍ពីលោក សេង ប៊ុនឈឿន មេរដ្ឋបាលជលផលខេត្តកំពង់ឆ្នាំងជាប្រចាំទើបបណ្តោយឲ្យលោក សេង ប៊ុនឈឿន ក្លាយទៅជាបងធំកាងបទល្មើសនេសាទយ៉ាងក្រអឺតក្រទម។ ជាក់ស្តែងរយៈពេល២សប្តាហ៍ចុងក្រោយនេះបទល្មើសនេសាទក្នុងស្រុកបរិបូរណ៍និងស្រុកកំពង់លែងកើតទ្បើងយ៉ាងពេញបន្ទុក ហើយក្រុមជនល្មើសភាគច្រើនជាជនជាតិយួន ប៉ុន្តែលោក ណៅ ធួក មិនបានយកចិត្តទុកដាក់ចាប់វិធានការបង្ក្រាបទ្បើយ។ ផ្ទុយទៅវិញលោក ណៅ ធួក បានបើកដៃឲ្យបុគ្គល សេង ប៊ុនឈឿន ធ្វើអ្វីៗយ៉ាងគឃ្លើនជាន់ឈ្លីបទបញ្ជាលេខ០០១របស់រដ្ឋាភិបាលតាមអំពើចិត្ត។
បទល្មើសនេសាទកើតទ្បើងយ៉ាងពេញបន្ទុកនៅក្នុងបឹងទន្លេសាបនៃខេត្តកំពង់ឆ្នាំងត្រូវបានគេដឹងថាមានការបើកដៃពីលោក សេង ប៊ុនឈឿន ដែលជានាយខណ្ឌរដ្ឋបាលជលផលខេត្តកំពង់ឆ្នាំង ។ ប្រជានេសាទក្នុងស្រុកកំពង់លែង ស្រុកបរិបូរណ៍ ស្រុកជលគិរី និងស្រុកកំពង់ត្រទ្បាច បានរាយការណ៍ជាបន្តបន្ទាប់ពីរឿងមេរដ្ឋបាលជលផលខេត្តបើកដៃឲ្យជនជាតិយួនប្រើឧបករណ៍ខុសច្បាប់បំផ្លាញធនធានមច្ឆជាតិតាមអំពើចិត្ត។ ប៉ុន្តែលោក ណៅ ធួក ដែលជាមេរដ្ឋបាលជលផលធ្វើមិនដឹងមិនឮអ្វីទាំងអស់ បើទោះបីលោក សេង ប៊ុនឈឿន ក្លាយជាបងធំកាងបទល្មើសនេសាទក្នុងបឹងទន្លេសាបនៃខេត្តកំពង់ឆ្នាំងក៏ដោយ។
មន្ត្រីអង្គការក្រៅរដ្ឋាភិបាល ការពារធនធានធម្មជាតិក្នុងខេត្តកំពង់ឆ្នាំងបានកត់សម្គាល់ថាចាប់ពីថ្ងៃទី០១ ខែវិច្ឆិកា ឆ្នាំ ២០១៤ ដែលជារដូវបើកនេសាទគឺជនជាតិយួនបានប្រើឧបករណ៍ខុសច្បាប់ជាច្រើនប្រភេទចាប់យកត្រីតាមអំពើចិត្ត។ ជាមួយគ្នានេះមន្ត្រីជលផលក្រោមការគ្រប់គ្រងរបស់លោក សេង ប៊ុនឈឿន បានធ្វើសកម្មភាពជំរិតយកលុយពីក្រុមអាជីវករដឹកជញ្ជូនត្រីពីខេត្តកំពង់ឆ្នាំងទៅចែកចាយតាមបណ្តាខេត្តនានាស្រេចតែអំពើចិត្តរបស់ពួកគេ។ បញ្ហានេះលោក ណៅ ធួក ដែលជាអគ្គនាយករដ្ឋបាលជលផលមិនត្រូវមើលរំលងតទៅទៀតទេ ប្រសិនបើគ្មានពាក់ព័ន្ធផលប្រយោជន៍ជាមួយបុគ្គល សេង ប៊ុនឈឿន ។
