ខេត្តត្បូងឃ្មុំ ៖មន្ត្រីកងរាជអាវុធហត្ថ ខេត្តត្បូងឃ្មុំ បានឲ្យដឹងថា ឥទ្បូវនេះលោក រ័ត្ន ចាន់ណា មិនរកស៊ីដឹកជញ្ជូនឈើ ដោយខ្លួនឯងដូចកាល នៅធ្វើជាមន្ត្រី កងរាជអាវុធហត្ថ ស្នាក់ការ៧០១ ទៀតទេ ពោលគឺលោក រ័ត្ន ចាន់ណា បានប្រើប្រាស់ មនុស្សជំនិតៗរបស់ខ្លួន ឲ្យរកស៊ីជំនួសគាត់ ហើយគាត់ជាអ្នកកាងពីក្រោយខ្នង ចាំដោះស្រាយបញ្ហា សម្របសម្រួល ជាមួយសមត្ថកិច្ចពាក់ព័ន្ធ និងមន្ត្រីជំនាញជាដើម។ មនុស្សជំនិត ២នាក់ របស់លោក រ័ត្ន ចាន់ណា ដែលប្រមូលទិញឈើប្រណីត យកទៅលក់នៅ ប្រទេសវៀតណាម យ៉ាងសកម្មនោះមានឈ្មោះ លីន និងឈ្មោះ វុធ តែងដឹកជញ្ជូនឈើ ទៅលក់តាមច្រកដូង ៧ដើម ច្រកដូនរ័ត្ន ច្រកចាន់មូល និងច្រកជាំក្រវៀន គ្មានសមត្ថកិច្ចណា ហ៊ានប៉ះពាល់នោះទេ។
មន្ត្រី ក្នុងជួរកម្លាំងប្រដាប់អាវុធ ក្នុងខេត្តត្បូងឃ្មុំ មិនបានបំពេញតួនាទីរបស់ខ្លួន ក្នុងការពង្រឹងសន្តិសុខសង្គម និងការពារប្រជាពលរដ្ឋនោះទេ ផ្ទុយទៅវិញពួកគេ មានមុខរបរបន្ថែមដូចជា ដឹកជញ្ជូនឈើខុសច្បាប់គ្មានក្រែងញញើត ហើយ លោក រ័ត្ន ចាន់ណា ដែលពីមុន មានមុខរបរជា អ្នករត់តាក់ស៊ីនោះ បន្ទាប់មកបានធ្វើជា មន្ត្រីកងរាជអាវុធហត្ថ ស្នាក់ការសន្តិសុខលេខ៧០១ បានប្រឡូកក្នុងការរកស៊ី ដឹកជញ្ជូនឈើប្រណីត សល់លុយយ៉ាងច្រើន សន្ធឹកសន្ធាប់ អាចរត់ការឡើងតំណែង ជាមេបញ្ជាការរង កងរាជអាវុធហត្ថ ខេត្តត្បូងឃ្មុំ ដើម្បីពង្រឹងជំនួញឈើខុសច្បាប់ កាន់តែខ្លាំងជាងមុន។
ប្រភពបានឲ្យដឹងទៀតថា លោក រ័ត្ន ចាន់ណា កំពុងតែធ្វើជាខ្នងបង្អែក ឲ្យមនុស្សជំនិតរបស់ខ្លួន ដឹកជញ្ជូនឈើប្រណីត យកទៅលក់នៅវៀតណាម ដោយគ្មាននរណា ហ៊ានទប់ស្កាត់ ព្រោះមានការបែងចែក ផលប្រយោជន៍ ដល់សមត្ថកិច្ចពាក់ព័ន្ធ គ្រប់ស្ថាប័ន។ ជាពិសេស នៅច្រកទន្លេចាម ច្រកចាន់មូល និងច្រកបឹងជ្រោង កំពុងតែមានសកម្មភាព នាំឈើប្រណីត ទៅលក់នៅវៀតណាម យ៉ាងពេញបន្ទុក ព្រោះសមត្ថកិច្ចគយ និងសមត្ថកិច្ចពាក់ព័ន្ធដទៃទៀត ឃុបឃិតជាមួយលោក រ័ត្ន ចាន់ណា ដើម្បីប្រមូលផលប្រយោជន៍ ៕
