ខេត្តពោធិ៏សាត់៖ មន្រ្តីបានទម្លាយឲ្យដឹងថា រឿងអំពើពុករលួយ របស់លោកប្រធានមន្ទីរធម្មការ និង សាសនាខេត្តពោធិ៏សាត់ នូ ផេង និងប្រធាន ការិយាល័យរដ្ឋបាល លោក ពេជ្រ ចន្ថា កំពុងតែ ឆាប់ឆេះ កាន់តែ ខ្លាំងឡើង ៗ ហើយមន្ត្រី នៅក្នុងមន្ទីរភាគច្រើន ក៏បានអំពាវនាវសុំ អោយលោករដ្ឋមន្ត្រី មិន ឃិន និងលោកអ ភិបាលខេត្តពោធិសាត់ ម៉ៅ ធនិន គួរចាត់វិធាន ការលើមន្ត្រីខិលខូច ខាងលើដើម្បី ជាការព្រ មាន កុំអោយពួកគេប្រព្រឹត្តិអំពើ ផ្តេសផ្តាសតទៅទៀត។
តាមប្រភព បានអោយដឹងថាក្រោយពីបណ្តាញព័ត៌មានបាន ចុះផ្សាយពីរឿងអាស្រូវ ពុករលួយរបស់ លោក ប្រធានមន្ទីរ នូ ផេង និងលោកប្រ ធានការិយាល័យរដ្ឋបាលរបស់មន្ទីរ ពេជ្រ ចន្ថា រឿងនេះបានបែកធ្លាយទៅដល់លោករដ្ឋមន្ត្រីក្រសួងធម្មការនិងសាសនា មិន ឃិន និងលោកអភិបាលខេត្ត ម៉ៅ ធនិន។ ក្រោយពីរឿងនេះបែកធ្លាយស្របពេលលោករដ្ឋមន្រ្តី មិន ឃិន ត្រឡប់មកពីខេត្តបាត់ដំបងគឺលោករដ្ឋមន្ត្រីបានចូលមកជួបមន្ត្រីមន្ទីរធម្មការខេត្តពោធិ៏សាត់នៅសណ្ឋាគារភ្នំពេញនិងបានសួរដេញដោលរឿងនេះទៅលោក ពេជ្រ ចន្ថា និងលោកអនុប្រធានមន្ទីររ៉ុន សុភារិន ហើយក៏បានប្រមូលយកឯកសារចំណាយមួយចំនួនទៅពិនិត្យនៅភ្នំពេញ។ ចំណែកលោកអភិបាលម៉ៅ ធនិន ក៏បានលើកយករឿងអាស្រូវរបស់លោកប្រធានមន្ទីរធម្មការនិងបក្ខពួកទៅនិយាយនៅក្នុងអង្គប្រជុំគណៈបញ្ជាការឯកភាពខេត្តនិងបានធ្វើការព្រមានថាកុំអោយអ្នកទាំងនេះសប្បាយលើគំនរទុក្ខរបស់អ្នកដ៏ទៃអោយសោះ ។ប៉ុន្តែសំណូមរឿងមួយនេះរហូតមកដល់បច្ចុប្បន្នមានរយៈពេលជិត១ខែហើយ តែមិនឃើញក្រសួងនិងខេត្តមានវិធានការលើមន្ត្រីខិលខូចខាងលើនោះទេ។
តាមប្រភពបានបញ្ជាក់អោយដឹងទៀតថា ក្រោយពីបណ្តាញព័ត៌មានចុះផ្សាយផ្ទួនៗពីរឿងអាស្រូវខាងលើនៅរសៀលថ្ងៃទី១៩មករាលោកប្រធានមន្ទីរ នូផេងបានបើកអង្គប្រជុំមួយត្រួតពិនិត្យពីការចុះផ្សាយរបស់បណ្តាញព័ត៌មាន តាមបញ្ជាពីលោកស្រីអគ្គនាយករដ្ឋបាលនិងហិរញ្ញវត្ថុនៃក្រសួងធម្មការដែលត្រូវជាម្ដាយមីងបង្កើតរបស់លោកប្រធានការិយាល័យរដ្ឋបាល ពេជ្រ ចន្ថា ហើយនៅក្នុងអង្គប្រជុំនោះគឺមានមន្ត្រីជាច្រើនដែលមិនពេញចិត្តនិងការដឹកនាំរបស់លោកប្រធានមន្ទីរនិងលោកប្រធានការិយាល័យរដ្ឋបាលយ៉ាងច្រើន ពាក់់ព័ន្ធទៅនិងការកឹបកេងប្រាក់ចំនួន១៨លានរៀលសំរាប់មន្ត្រីមានជំងឺ ប្រាក់១០លានរៀលសំរាប់បេសកម្ម ស៊ីប្រាក់ខែមន្ត្រីកិច្ចសន្យាខ្មោចចំនួន២២នាក់ជារៀងរាល់ខែ កឹបកេងប្រាក់៤លានរៀលសំរាប់ផ្នែកទំនាក់ទំនងសារធារណៈនិងផ្សព្វផ្សាយរួមនិងការកឹបកេងប្រេងឥន្ទនៈជាដើម។ ដោយសារតែមានការសាកសួរដេញដោលខ្លាំងពីសំណាក់មន្ត្រីក្រោមឱវាទនោះធ្វើអោយលោក នូ ផេង និងពេជ្រ ចន្ថា រកពាក្យឆ្លើយដោះសារពុំរួចហើយនិយាយបង្វែរទៅរឿងផ្សេងធ្វើអោយអង្គប្រជុំប្រកបដោយភាពសោះកក្រោះ។
តាមប្រភពបានបន្ថែមថាមូលហេតុដែលលោកស្រីអគ្គនាយករដ្ឋបាលនិងហិរញ្ញវត្ថុក្រសួងធម្មការ កែវ សុធារី បញ្ជាអោយលោក នូ ផេង បើកអង្គប្រជុំខាងលើគឺដើម្បីធ្វើកំណត់ហេតុបដិសេធជុំវិញព័ត៌មានរឿងអាស្រូវពុករលួយក្នុងបំណងជួយការពារក្មួយប្រុសរបស់គាត់អោយរួចផុតពីការពាក់ព័ន្ធក្នុងរឿងអំពើពុករលួយកន្លងមក មិនមែនរកការពិតក្នុងរឿងខាងលើនោះទេ។ ហើយចំពោះលោកស្រី កែវ សុធារី នាពេលបច្ចុប្បន្នគឺជាមន្ត្រីដែលមានអំណាចខ្លាំងនៅក្នុងក្រសួងធម្មការនិងពូកែពុករលួយល្បីខ្ទរខ្ទារ ហើយរយៈកន្លងមករូបគាត់គឺទទួលបានប្រាក់រាប់សែនដុល្លារពីមន្ត្រីធម្មការនៅទូទាំងប្រទេសតាមរយៈការយកប្រាក់ពីមន្ត្រីដែលប្រលងឡើងកាំប្រាក់និងប្រលងចូលក្របខណ្ឌក្រសួង ធ្វើអោយមន្រ្តីខ្លះដែលចង់បានកាំខ្ពស់មកដល់ពេលនេះរកប្រាក់សង់ម្ចាស់បំណុលមិនទាន់រួចផង ដោយសារតែយកប្រាក់ទៅសូកលោស្រី កែវ សុធារី ក្នុងម្នាក់ៗចំណាយពី១៥០០ដុល្លាទៅ៣០០០ដុល្លានោះ។
សូមរំលឹកថាអំពើពុករលួយនៅក្នុងមន្ទីរធម្មការខេត្តពោធិ៏សាត់គឺបានកើតមានឡើងយ៉ាងធ្ងន់ធ្ងរក្រោយពេលលោក ខឹម ញៀម អតីតប្រធានមន្ទីរបានចូលនិវត្តន៍ និងដោយមានលោក នូផេងអតីតអនុប្រធានមន្ទីរឡើងធ្វើជាប្រធានមន្ទីរក្នុងរយៈពេល៦-៧ ខែមកនេះ។ អំពើពុករលួយគឺកើតមានឡើងគ្រប់រូបភាពដូចជាការកឹបកេងថវិកានៅជំពូក៦០,៦២និងជំពូក៦៤ ។ប៉ុន្តែអ្វីដែលធ្ងន់ធ្ងរបំផុតគឺការស៊ីប្រាក់ខែមន្ត្រីកិច្ចសន្យាខ្មោចយ៉ាងតិច២២នាក់ក្នុងចំណោមមន្ត្រីកិច្ចសន្យាដែរមានឈ្មោះនៅក្នុងបញ្ជី២៨នាក់សំរាប់ឆ្នាំ២០១៤ និងការស៊ីដាច់ប្រាក់មន្ត្រីមានជំងឺជាង១៨លានរៀលរួមនិងប្រាក់សាហ៊ុយទូទាត់ក្នុងប្រទេសមួយចំនួនថែមទៀត។ ដែលមន្ត្រីខ្លះមានឈ្មោះថាការទទួលបានឧបត្ថម្ភប្រាក់មានជំងឺនិងប្រាក់សាហ៊ុយទូទាត់ក្នុងប្រទេស។ប៉ុន្តែប្រាក់ទាំងអស់នេះត្រូវបានលោកប្រធានការិយាល័យពេជ្រ ចន្ថា ដែលមានលោកប្រធានមន្ទីរ នូ ផេង នៅពីក្រោយបានកឹបកេងស្ទើរទាំងស្រុង ធ្វើអោយមន្ត្រីមួយចំនួនធំក្នុងចំណោមន្ត្រីក្របខណ្ឌ១៩នាក់កើតការក្តៅក្រហាយរហូតដល់អនុប្រធានមន្ទីរក៏ស្រក់ទឹកភ្នែកដោយសារតែរង់ការជិះជាន់និងកឹបកេងប្រាក់ផលប្រយោជ៍របស់ខ្លួន កុំថាឡើយមន្ត្រីថ្នាក់តូច។ ហើយបច្ចុប្បន្នការងារទាំងអស់ដែលមានផលប្រយោជន៍គឺត្រូវបានលោក ពេជ្រ ចន្ថា ប្រមូលយកមកគ្រប់គ្រង ហើយសុំបីតែប្រាក់ខែរបស់គ្រូពុទ្ធិកសិក្សាកិច្ចសន្យាក៏រូបគាត់ជាអ្នកចាត់ចែងនិងជាអ្នកដើរបើកប្រាក់ខែអោយគ្រូៗទាំងនោះ ពេលបើកម្តងៗលោក ពេជ្រ ចន្ថា កាត់ប្រាក់ពីគ្រូក្នុងមួយអង្គ នាក់ពី២ទៅ៣ម៉ឺននាក់ក្នុងចំណោមគ្រូកិច្ចសន្យា៤៩នាក់ ធ្វើអោយលោក ពេជ្រ ចន្ថា ទទួលបានប្រាក់ក្នុងពេលបើកប្រាក់ខែម្តងៗជិត២លានរៀល នេះមិនទាន់បូកបញ្ចូលអំពីគ្រូកិច្ចសន្យាដែលបោះបង់ចោលភារកិច្ចរបស់ខ្លួនមួយចំនួនទៀត ដែលប្រាក់ខែរបស់ពួកគាត់ត្រូវបានលោក ពេជ្រ ចន្ថា ប្រមូលយកតែម្នាក់ឯង។
ដោយសារតែការប្រព្រឹត្តិអំពើពុករលួយនិងដោយសារតែប្រធានមន្ទីរលោកនូ ផេងគ្រប់គ្រងមន្ទីរដោយពុករលួយនិងបានប្រើអោយលោក ពេជ្រ ចន្ថា ជាអ្នកធ្វើព្យុះភ្លៀងហើយរូបគាត់ជាប្រធានមន្ទីរជាអ្នកចាំទទួលផល។
ដោយសារមានអំពើពុករលួយដ៏ធ្ងន់ធ្ងរនៅក្នុងមន្ទីរមួយនេះកើតការក្តៅក្រហាយនិងប្រុងផ្ទុះក្លាយជាភ្នំភ្លើង។
សូមបញ្ជាក់សំរាប់គំរោងចំណាយថវិកាជាតិរបស់មន្ទីរធម្មការខេត្តពោធិសាត់២០១៤គឺមានថវិកាសរុបចំនួន៤២០.0លានរៀលក្នុងនោះ ជំពូក៦០ចំនួន៣៥.០លានរៀល ជំពូក៦២ចំនួន២៩.០លានរៀល ជំពូក៦៤មានថវិកាចំនួន៣៥៦.០លានរៀល។ សំរាប់ឆ្នាំ២០១៣និងឆ្នាំ២០១៤មន្ទីរមួយនេះអត់មានថវិកាជំពូក៦១ទេ។ ហើយថវិកាខាងលើមកដល់ពេលនេះគឺបានចាយស្ទើរអស់ ។ប៉ុន្តែថវិកាទាំងនេះត្រូវបានគេកឹបកេងមិនតិចជាង៨០លានរៀល ហើយថវិកាដែលគេកឹបកេងនេះគឺបានធ្លាក់ទៅលើកណ្តាប់ដៃលោក នូ ផេង និងលោ ពេជ្រ ចន្ថា ចំណែកមន្ត្រីផ្សេងទៀតដោយបានត្រឹមតែត្រងក្លិន។
ចំពោះថវិកាដែលលោក ពេជ្រ ចន្ថា និងលោកប្រធានមន្ទីរ នូ ផេង កឹបកេងនិងប្រព្រឹត្តិអំពើពុករលួយគឺមាននៅគណនេយ្យលេខ៦០១, ៦០២, ៦២២, ៦២៤, ៦៤៤, ៦៤៥ជាដើម។
មន្ត្រីជាច្រើននៅក្នុងមន្ទីរធម្មការខេត្តពោធិ៏សាត់ បានអំពាវនាវសុំអោយគណៈអភិបាលខេត្តលោក រដ្ឋមន្ត្រី ក្រសួងធម្មការនិងសាសនាជាពិសេសអង្គភាពប្រឆាំងអំពើពុករលួយគួរពិនិត្យស្រាវជ្រាវលើករណីនេះចាត់វិធានការឲ្យបានធ្ងន់ធ្ងរចំពោះមន្ត្រីខិលខូចខាងលើ ដើម្បីជាការផ្តល់យុត្តិធម៌ដល់មន្ត្រីរង់គ្រោះនិងដើម្បីជាការព្រមានដល់មន្ត្រីខិលខូចកុំអោយយកតម្រាប់តាម៕
