សកម្មភាពរបស់ក្រុមន្ត្រីខិលខូចទាំងនេះ ត្រូវបានប្រជាពលរដ្ឋរិះគន់ថា មិនត្រឹមតែបង្កការលំបាកដល់ការធ្វើអាជីវកម្មរបស់ប្រជាពលរដ្ឋនោះទេ តែវាក៏បានបណ្តាលឲ្យថវិកាជាតិបាត់បង់ក្នុងមួយឆ្នាំៗរាប់សិបលានដុល្លារ។ ប្រភពព័ត៌មានបានរិះគន់ថា រដ្ឋាភិបាលគណបក្សប្រជាជនកម្ពុជា គប្បីប្រើប្រាស់មន្ត្រីស្អាតស្អំឲ្យធ្វើការ ដោយមិនត្រូវឲ្យមន្ត្រីខិលខូចពុករលួយគ្មានសមត្ថភាព ធ្វើការដូចសព្វថ្ងៃនេះទេ។ ប្រជាពលរដ្ឋបានសង្កត់ធ្ងន់ថា មន្ត្រីពុករលួយកាន់តែមានជីវភាពប្រសើរឡើង ខណៈមន្ត្រីស្មោះត្រង់នៅតែក្រីក្រ ហើយសង្គមជាតិមានការរីកចម្រើនយឺតបំផុត។ ប្រភពដដែលបានរិះគន់ថា ការកែទម្រង់ស៊ីជម្រៅរបស់រដ្ឋភិបាលលោកហ៊ុន សែន កែទម្រង់បានតែមន្ត្រីតូចតាច និងប្រជាពលរដ្ឋស្លូតត្រង់ប៉ុណ្ណោះ ចំណែកមន្ត្រីខិលខូច មានបក្ខពួក មិនត្រូវបានបង្ក្រាបឲ្យមានប្រសិទ្ធភាពតាមគោលការណ៍ច្បាប់នោះទេ។
ក្រុមអាជីវករ បានឲ្យដឹងថា ពីក្រុងប៉ោយប៉ែត ដល់ក្រុងសិរីសោភ័ណ មានប៉ុស្តិ៍៥កន្លែង ដែលត្រូវបង់លុយ ហើយរថយន្ត១គ្រឿង ត្រូវបង់ឲ្យមន្ត្រីគយ១កន្លែង៥ម៉ឺន ទៅ១៥ម៉ឺនរៀល និងកម្លាំងនគរបាលសេដ្ឋកិច្ចក្រសួង១កន្លែងត្រូវបង់៥ទៅ១០ម៉ឺនរៀល និងមានមន្ត្រីគយ២កន្លែង ១.ចំណុចផ្សាររ៉ាថ្មី ២.គយដាក់នៅក្បែរផ្លូវ៥០ ភូមិកូនដំរី ក្រុងប៉ោយប៉ែត ។ ចំណែកឯកម្លាំងនគរបាលសេដ្ឋកិច្ចក្រសួង មាន៣កន្លែង ១.ដាក់នៅភូមិទឹកថ្លា ក្រុងសិរីសោភ័ណ គ្រប់គ្រងដោយលោក លេវ ណល់ ២.ដាក់នៅចំណុចសាលាក្រៅ ក្រុងសិរីសោភ័ណ គ្រប់គ្រងដោយលោក ទិត ណារិន និង៣.ដាក់នៅចំណុចភូមិគោកទម្លាប់ ស្រុកមង្គលបុរី គ្រប់គ្រងដោយលោក វ៉ាន់ វុទ្ធី។ ប្រជាពលរដ្ឋជាច្រើនរស់នៅក្នុងខេត្តបន្ទាយមានជ័យ ពិសេសអ្នកប្រកបរបរចិញ្ចឹមជីវិត ទិញទំនិញពីជាយដែន ក្រុងប៉ោយប៉ែត យកទៅលក់តាមបណ្តាខេត្ត បានត្អូញត្អែរយ៉ាងខ្លាំងថា មួយរយៈនេះ រកស៊ីមិនសូវចំណេញ ដោយសា រតាមផ្លូវក្នុងខេត្ត ឥឡូវ មានកុងត្រូលជជុះ ច្រើនកន្លែងពេក ហើយអាជ្ញាធរហាក់កំពុងជិះសេះលែងដៃ គ្មានការទប់ស្កាត់ ឬលុបបំបាត់ប៉ុស្តិ៍ជជុះទាំងនោះទេ ។
សកម្មភាពខុសច្បាប់នេះ ពុំដែលមានការទប់ស្កាត់ពីអាជ្ញាធរខេត្តម្តងណាឡើយ ហើយត្រូវបានពលរដ្ឋរិះគន់ថា បើអាជ្ញាធរខេត្ត ពុំជាប់ពាក់ព័ន្ធរឿងផលប្រយោជន៍ប្រហែលជាប៉ុស្តិ៍ជជុះទាំងនោះ មិនអាចធ្វើព្យុះភ្លៀងបានទាំងយប់ទាំងថ្ងៃទេ ច្បាស់ជាមិនបានមួយម៉ោងទាន់ឡើយ នឹងត្រូវគេលុបបំបាត់មិនខាន។ ប៉ុស្តិ៍ជជុះទាំងនេះ ត្រូវបានគេដឹងថា គ្រប់គ្រងដោយលោកស័ក្កិ៤ ឡុង សំអឿន ជាកម្លាំងនគរបាលប្រឆាំងបទល្មើសសេដ្ឋកិច្ចក្រសួង ប្រចាំការគោលដៅចំនួន៣ខេត្ត រួមមានខេត្ត សៀមរាប ខេត្តឧត្តរមានជ័យ ខេត្តបន្ទាយមានជ័យ។ គោលដៅខ្លះគេដឹងថា ប្រើប្រាស់កម្លាំងនគរបាល គោលដៅខ្លះ គឺប្រើកម្លាំងស៊ីវិល គឺមនុស្សគ្មានតួនាទីឲ្យអង្គុយចាំប៉ុស្តិ៍ និងទារលុយពីរថយន្តអ្នកដឹកទំនិញគ្រប់ប្រភេទ ដែលមកពីព្រំដែនឆ្លងកាត់។ ទន្ទឹមនឹងនេះ ថ្មីៗនេះគេសង្កេតឃើញថា មានទីតាំងត្រួតពិនិត្យទំនិញ គ្រប់ប្រភេទមកពីប្រទេសសៀម តាមច្រកទ្វារអន្តរជាតិក្រុងប៉ោយប៉ែត តែការពិត មន្ត្រីជំនាញទាំងនោះ គ្រាន់តែបង្កើតឡើងសម្រាប់ទុកទារប្រាក់ពីអាជីវករទន់ខ្សោយ ។
