ខេត្តព្រៃវែង៖ រឿងអាស្រូវពុករលួយដ៏គួរអោយភ្ញាក់ផ្អើលនិងធំមហិមារទើបនិងផ្ទុះចេញជាបណ្តើរៗ ហើយករណីនេះបានធ្វើអោយរដ្ឋខាតបង់ថវិកាជាតិក្នុងមួយឆ្នាំៗយ៉ាងតិច៣០០០លានរៀល ដោយផលប្រយោជន៍ពីអំពើពុករលួយនេះបានធ្លាក់ចូលក្នុងកណ្តាប់ដៃលោកអភិបាលខេត្ត ហាស់ សារ៉េត ដែលជាប្រធានគណកម្មាធិការលទ្ធកម្មនិងលោកអភិបាលរង ម៉ុក ធារី ដែលជាអនុប្រធាននិងលោក វង្ស សោភ័ណ្ឌដែលជាប្រធានអង្គភាពលទ្ធកម្មរួមនិងសាម៉ីមន្ទីរដែលជាអ្នកត្រូវទទួលសមទ្ឋិផល។
តាមសេចក្តីរាយការណ៍បានអោយដឹងថាបញ្ហាខាងលើ បានកើតមានឡើងពេញបន្ទុកនៅឆ្នាំ២០១៣និងឆ្នាំ២០១៤ក្រោយពីលោក ហាស់ សារ៉េត បានប្តូរតំណែងពីអភិបាលខេត្តកែបជាខេត្តដែលតូចបំផុតមកកាន់តំណែងជាអភិបាលខេត្តព្រៃវែង បន្តពីលោក អ៊ុង សាមី ដែលត្រូវតែងតាំងជាអនុរដ្ឋលេខាធិការក្រសួងមហាផ្ទៃ។ ក្រោយពីលោក ហាស់ សារ៉េត បានធ្វើជាអភិបាលខេត្តព្រៃវែងភ្លាម គណម្មាធិការលទ្ធកម្មចាប់ផ្តើមមានអំពើពុករលួយធ្ងន់ធ្ងរ ដូចជាការដេញថ្លៃមានភាពមិនប្រក្រតី ដោយក្រុមអ្នកទទួលបានសិទ្ធសាងសង់សំណង់និងផ្គត់ផ្គងសំភារៈផ្សេងៗគឺចេញពីប្រភពក្រុមហ៊ុនដែលហ៊ានផ្តល់ទឹកតែខ្ពស់ដល់លោកអភិបាលខេត្តនិងបក្ខពួក។ ហើយតម្លៃសាងសង់ជួសជុលនិងផ្គត់ផ្គងសំភារៈផ្សេងៗ គឺមានតម្លៃខុសពីតម្លៃទីផ្សារដល់ទៅ៥ដងដូចជាការថែទាំនិងជួសជុលសំណង់អគារ។ ចំណែកសំភារៈផ្សេងៗក៏មានតម្លៃខ្ពស់មួយគុណនិង២ឬ៣ដងនៃតម្លៃទីផ្សារ លើកលែងតែការផ្គត់ផ្គង់ម៉ូតូនិងប្រេងឥន្ធនៈចេញដែលមានសភាពមិនសូវធ្ងន់ធ្ងរ។
តាមប្រភពបានអោយដឹងថា ការដែលក្រុមហ៊ុននីមួយៗ ដេញថ្លៃបានការផ្គត់ផ្គង់សំណង់និងសំភារៈផ្សេងៗក្នុងតម្លៃខ្ពស់លើទីផ្សារធ្វេរដង ដោយសារតែមន្ទីរដែលជាអ្នកស្នើគំរោងបានបំប៉ោងតម្លៃគំរោងនៃការសាងសង់ជួលជុលនិងផ្គត់ផ្គង់សំភារៈផ្សេងៗជាមុន។ ហើយក្រោយពីក្រសួងសេដ្ឋកិច្ចនិងហិរញ្ញវត្ថុអនុញ្ញាតអោយអនុវត្តន៍នៅគំរោងនោះទើបគណកម្មាធិការលទ្ធកម្មចាប់ផ្តើមអនុវត្តន៍នីតិវិធីហិរញ្ញវត្ថុក្នុងពេលនោះទើបគេបង្កើតការដេញថ្លៃឬពីគ្រោះថ្លៃ ។ប៉ុន្តែការដេញថ្លៃទាំងនោះគឺសុទ្ធតែបក្ខពួកទោះបីមើលឃើញថាមានអ្នកចូលរួមដេញថ្លៃច្រើន។ ព្រោះថាក្រុមអ្នកដេញថ្លៃឬពីគ្រោះថ្លៃទាំងនោះគឺគេបានរៀបចំទុកជាមុន ពេលខ្លះមើលឃើញថាមានប្រកាសជួនដំណឹងតាមកាសែត តែក្រុមហ៊ុនដែលមិនមែនជាក្រុមគេគឺពិបាកនិងទទួលបានឱកាស ពេលខ្លះទទួលបានឱកាស។ប៉ុន្តែនៅពេលទូទាត់ប្រាក់គឺពិបាកដូចអូសឫស្សីបញ្ច្រាស់ចុង រហូតធ្វើអោយក្រុមហ៊ុនទាំងនោះលែងហ៊ាននឹកស្រមៃចង់មកធ្វើជាអ្នកដេញថ្លៃផ្គត់ផ្គង់។
តាមប្រភពដដែលបានបញ្ជាក់ថាបញ្ហានេះជាក់ស្តែងដូចជានៅឆ្នាំ២០១៤គឺមានមន្ទីរខ្លះបានចំណាយថវិកាលើការថែទាំនិងជួសជុលអគារអស់ទឹកប្រាក់រហូត៥០០ទៅ៦០០លានរៀល។ប៉ុន្តែការចំណាយទាំងនេះគឺបានត្រឹមតែលាបថ្នាំតួអគារ ប្តូរបង្អួចទ្វារនិងបាញ់ថ្នាំដំបូលអគារបន្តិចបន្តួចតែប៉ុណ្ណោះ។ ហើយថវិកាដែលចំណាយនោះអ្នកដែលទទួលបានផលប្រយោជន៍ច្រើនគឺលោកអភិបាលខេត្តនិងលោកប្រធានអង្គភាពលទ្ធកម្មរួមនិងលោកប្រធានមន្ទីរដែលជាម្ចាស់គំរោងនិងជាអ្នកត្រូវទទួលសមទ្ឋិផលនោះ។ ចំណែកលោកអភិបាលរងខេត្តទទួលបន្ទុកលទ្ធកម្មនិងលោកប្រធានមន្ទីរសេដ្ឋកិច្ចនិងហិរញ្ញវត្ថុខេត្តក៏បានចំណែកមួយចំនួនធំដែរ។ ដោយពេលវេលាខ្លីរៀបរាប់មិនអស់សូមយករឿងនេះមកលម្អិតនៅវគ្គក្រោយៗទៀត។
មន្ត្រីជាច្រើននៅក្នុងខេត្តព្រៃវែងដែលបានដឹងពីបញ្ហានេះមួយៗនាំគ្នាគក់ទ្រូងនិងចង់ឃើញចំណាត់ការរបស់ក្រសួងមហាផ្ទៃ ក្រសួងសេដ្ឋកិច្ចនិងហិរញ្ញវត្ថុ ជាពិសេសគឺអង្គភាពប្រឆាំងអំពើពុករលួយបើកការស៊ើបអង្កេតលើករណីមួយនេះអោយបានស៊ីជំរៅនិងហ្មត់ចត់បំផុតនោះនិងឃើញសខ្មៅមិនខាន់៕
