មានសេចក្តីរាយ ការណ៍ថា មានករណី បើកសិប្បកម្មជីក ថ្មភ្នំប្រវត្តិសាស្ត្រមួយ បាននឹងកំពុងធ្វើ សកម្មភាពជីកកាកាយថ្ម ភ្នំទាំងយប់ទាំងថ្ងៃ ធ្វើជាអាជីវកម្ម ដែលបណ្តាលឲ្យ ប្រជាពលរដ្ឋនិងភ្ញៀវ ទេសចរណ៍ជាតិ និងអន្តរជាតិ មានការព្រួយបារម្ភ ជាខ្លាំង។
តាមរយៈ សាធារណៈមតិជាតិ និងភ្ញៀវទេសចរណ៍ ជាច្រើនដែលធ្វើដំណើរ កំសាន្តលើកំពូល ភ្នំប្រវត្តិសាស្ត្របូកគោ ដែលជាតំបន់ទេសចរណ៍ ដ៏ល្អប្រណិត តាំងពីសម័យមុនមក បាននិយាយឲដឹង ថាមានសកម្មភាពជីកថ្ម និងបើកសិប្បកម្មនៅលើភ្នំនេះ ដែលជាហេតុធ្វើឲ្យ ពួកគាត់មានការ ស្រង៉ាកចិត្ត យ៉ាងខ្លាំង ទើបទូរស័ព្ទមក ផ្តល់ព័ត៌មានជូនភ្នាក់ងា រយើងឲ្យជួយចុះផ្សាយ ពីរឿងនេះ ដើម្បីឲ្យអាជ្ញាធរដែន និងសមត្ថកិច្ចជំនាញ ជាពិសេស គឺ ក្រសួង រ៉ែនិងថាមពល និងមន្ទីររ៉ែ និងថាមពលខេត្ត កំពត បានដឹង និងចុះ ទៅពិនិត្យទីតាំងសិប្បកម្ម ធ្វើថ្មនោះជាបន្ទាន់ ជៀសវៀងតំបន់ ទេសចរណ៍ប្រវត្តិសាស្ត្រដ៏មហិមាមួយនេះ ទទួលរងនូវបំផ្លិចបំផ្លាញកាន់តែធ្ងន់ធ្ងរ។
ជាងនេះទៅទៀត តំបន់នេះគឺជាតំបន់ អភិវឌ្ឍវិស័យទេសចរណ៍ធម្មជាតិ និងជាតំបន់ឧទ្យានជាតិថែមទៀតផង ហេតុអ្វីបានជា មានសិប្បកម្មផលិតថ្ម ធ្វើសកម្មភាពទាំងយប់ទាំងថ្ងៃ នៅទីនោះទៅវិញ?
ប្រភពព័ត៌មានពីមន្ត្រីមួយចំនួនក្នុងខេត្តកំពត បានបង្ហើបឲ្យសារព័ត៌មានយើងដឹងថាថ្មកាយយកមកកែឆ្នៃនោះ គឺមានទំហំធំៗណាស់ ហើយកែឆ្នៃដូចជាឈើអញ្ចឹង។
ទាំងនេះជាព័ត៌មានក្តៅបំផុត ដើម្បីជាសារមួយជូន សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដើម្បីឲ្យលោកជួយចាត់វិធានការជាបន្ទាន់ ព្រោះសកម្មភាពនេះ ជាគ្រោះមហន្តរាយដ៏ធំ ដែលអាចធ្វើឲ្យបាត់បង់សោភ័ណ្ឌភាពរបស់តំបន់ទេសចរណ៍ប្រវត្តិសាស្ត្រមួយនេះ ជាហេតុបណ្តាលឲ្យប៉ះពាល់លើវិស័យទេសចរណ៍ និងជាពិសេសគឺអាចប៉ះពាល់ដល់ធនធានធម្មជាតិយ៉ាងធ្ងន់ធ្ងរផងដែរ។
ទាក់ទិននឹងបញ្ហានេះអ្នកសារព័ត័មានយើងបានជួបសម្ភាសន៍តាមទូរស័ព្ទជាមួយលោក ប្រធានមន្ទីររ៉ែ និងថាមពលខេត្តកំពត ដោយលោកបានបកស្រាយឲ្យដឹងថា កន្លែងនោះជាតំបន់អភិវឌ្ឍន៍របស់ឧកញ្ញ៉ា សុខ គង់ ដូច្នេះលោកពុំមានសិទ្ធិអ្វី ដើម្បីទប់ស្កាត់នោះទេ តែបើក្រុមហ៊ុនជាអ្នកធ្វើអាជីវកម្មនោះ មន្ទីរនឹងតំរូវឲ្យធ្វើច្បាប់ទំលាប់។
នៅក្នុងរឿងនេះដែរ គឺមានតែសម្តេចអគ្គមហាសេនាបតីតេជោ ហ៊ុន សែន ទេដែលអាចប្រាប់ទៅក្រសួងពាក់ព័ន្ធបាន ដូចជាក្រសួងទេសចរណ៍ ក្រសួងរ៉ែ និងថាមពល ក្រសួងសិប្បកម្ម និងឧស្សាហកម្ម ក្រសួងរដ្ឋសភាព្រឹទ្ធសភា និងអធិការកិច្ចក្រសួងបរិស្ថាន ដើម្បីពិនិត្យរឿងនេះ។
ករណីធ្វើសិប្បកម្មលើភ្នំប្រវត្តិសាស្ត្រនេះដែរ សារព័ត៌មានយើងមិនអាចសុំការបំភ្លឺពីក្រុមហ៊ុន ធ្វើអាជីវកម្មនោះបាននៅឡើយទេ ព្រោះពុំស្គាល់លេខទូរស័ព្ទ។(នៅមានតភាគ)
