ខេត្តព្រះវិហារ ៖ មន្ត្រីសាខាគយ និងរដ្ឋាករ ខេត្តព្រះវិហារ បានអោយដឹងថា មានទំនិញគេចពន្ធសំខាន់ៗ ដូចជាម៉ូតូគេចពន្ធ,គ្រឿងអេទ្បិចត្រូនិចថ្លៃៗ, គ្រឿងសំណង់ មានស៊ីម៉ង់ត៍និងដែក គ្របតង់បិទជិត ដឹកតាមរថយន្ដធំៗ ចេញតាមច្រកទ្វារអន្តរជាតិ អានសេះ ឆ្ពោះមកទីរួមខេត្តព្រះវិហារ តាមផ្លូវជាតិលេខ៦២ដែលទំនិញខ្លះ ដឹកយកទៅកាន់ខេត្តកំពង់ធំ និងខ្លះទៀតដឹក ទៅកាន់ខេត្តស្ទឹងត្រែង តាមផ្លូវជាតិលេខ៩ថ្មី។ ឈ្មួញរកស៊ី ដឹកទំនិញសំខាន់ៗគេចពន្ធ សុទ្ធតែមានអ្នកធំមានអំណាច នៅពីក្រោយខ្នង តាមជួយអន្តរាគមន៍ អោយដោះលែង កាលណាដែលសមត្ថកិច្ចជំនាញចាប់ឃាត់ ។
ចាប់តាំងពីប្រកាសតែងតាំង សាខាគយ និងរដ្ឋាករ ខេត្តព្រះវិហារ កាលពីរសៀល ថ្ងៃទី១១ ខែកញ្ញា ឆ្នាំ២០១៤ មកលោក សុខ គឹមហេន ប្រធានសាខា គយនិងរដ្ឋាករ ខេត្តកំពង់ធំឲ្យទទួលមុខងារ ជាប្រធានសាខា គយនិងរដ្ឋាករ ខេត្តព្រះវិហារ បន្ថែមមួយទៀត គេសង្កេតឃើញបទល្មើសនៃ ការត់ពន្ធទំនិញ និងការហូរចូលទំនិញខុសច្បាប់ មកពីប្រទេសជិតខាង តាមច្រកព្រំដែន នៃខេត្តព្រះវិហារ កាន់តែគគ្រេកគគ្រេង យកមកលក់ចែកចាយ ដល់ខេត្តកំពង់ធំ នាំឲ្យខាតបង់ចំណូលថវិកាជាតិជាច្រើនលានដុល្លាក្នុងមួយឆ្នាំៗ ។
ការបង្ក្រាប ទប់ស្កាត់ទំនិញគេចពន្ធ សំខាន់ៗទាំងនោះ សំរាប់ខេត្តព្រះវិហារ គេមិនដែលឃើញអាជ្ញាធរដែនដី ចាប់បង្ក្រាបបានម្ដងណាទ្បើយ ចាប់តាំងពីកើតមាន ច្រកទ្វារអន្តរជាតិ ដែលសូម្បីតែលោក សុខ គឹមហេន ជាប្រធានសាខាគយ និងរដ្ឋាករ ខេត្តព្រះវិហារចាំតែទទួល លាភសក្ការៈដាក់ហោប៉ៅតែប៉ុណ្ណោះ។ ពេលខ្លះមន្ដ្រីគយ ខេត្តព្រះវិហារ បានដោះសារថា ជារៀងរាល់ថ្ងៃ ពួកគេមិនដែលបានជួបប្រទះ ការដឹកទំនិញគេចពន្ធនោះទេ បើទោះបីខិតខំ ត្រួតពិនិត្យនិងតាមឃ្លាំមើល គ្រប់រថយន្ដដឹកទំនិញសំខាន់ៗ គ្រប់ប្រភេទ តាមដងផ្លូវក៍ដោយ តែរឿងពិតគ្មានឈ្មួញណាម្នាក់ អាចដឹកទំនិញខុសច្បាប់ ឬទំនិញគេចពន្ធ ឆ្លងកាត់ខេត្តព្រះវិហារ និងខេត្តកំពង់ធំ យ៉ាងរលូន ដោយមិនបានបង់លុយ ឲ្យកូនចៅរបស់លោកមេគយ សុខ គឹមហេន នោះបានទេបើសិនជាចាប់បាន លោកមេគយ សុខ គឹមហេន ច្បាស់ជាផាកវិន័យជាច្រើន៕
