ប្រភពព័ត៌មានពីសកម្មជនព្រៃឈើនៅខេត្តបាត់ដំបង បានឲដឺងថា ធ្យូងចន្លោះពី ៧០ទៅ ៩០តោនក្នុងមួយសប្តាហ៍ៗ ដែលបានមកពីការកាប់បំផ្លាញឈើក្នុងតំបន់អភិរក្ស ត្រូវបានឈ្មួញខ្មែរ និងឈ្នួញសៀមបាន ឃុបឃិតគ្នាដឹកចេញតាមច្រក ៤០០ ក្នុង ស្រុកសំឡូត ទៅ ស្រុកបររ៉ៃ ខេត្តត្រាត ជាច្រើនឆ្នាំមកហើយដោយគ្មានការទប់ស្កាត់ឡើយ។ ប្រភពដដែលបានបញ្ជាក់ថា សកម្មភាពដឹកធ្យូង ដោយឈ្មួញដើរប្រមូលទិញ ពីពលរដ្ឋដោយបើកចំហនេះ មិនត្រូវបានមន្ត្រីជំនាញ អាជ្ញាធរមូលដ្ឋាន និងមន្ត្រីពាក់ព័ន្ធ ធ្វើការទប់ស្កាត់នោះទេ គឺគិតតែប្រមូលលុយដាក់ហោប៉ៅផ្ទាល់ខ្លួនដើរហឺហារដោយសេរី។
សកម្មជនបរិស្ថាននៅខេត្តបាត់ដំបង បានប្រទះឃើញសកម្មភាពដឹកជញ្ជូនធ្យូង យ៉ាងគគ្រឹកគគ្រេងតាមរថយន្តធុនធ្ងន់ និងឡានកែច្នៃចំនួនច្រើនគ្រឿង ដោយឆ្លងចេញទៅប្រទេសសៀម តាមច្រក ៤០០ ក្នុងភូមិសាស្ត្រ ស្រុកសំឡូត ខេត្តបាត់ដំបង។ ប្រភពដដែលបានបញ្ចាក់ ថា អ្នកបើកបររថយន្តដឹកធ្យូងទាំងនោះ មិនបានបង្ហាញអាជ្ញាប័ណ្ណ ឬលិខិតអនុញ្ញាតឲ្យដឹកជញ្ជូនធ្យូង ទេ ដោយពួកគេគ្រាន់តែបានប្រាប់ ទាំងទើសទាល់ថា គេដើរប្រមូលទិញពីប្រជាពលរដ្ឋ ហើយបានបង់លុយឲ្យសមត្ថកិច្ចជំនាញពាក់ព័ន្ធទាំងអស់ ដែលឈរយាមតាមផ្លូវ នៅពេលដឹកចេញ។ ជុំវិញបញ្ហានេះ នាំឲ្យគេសង្ស័យថាសមត្ថកិច្ចកម្ពុជា ជាអ្នកឃុបឃិតបើកដៃឲ្យមានការនាំធ្យូងចេញ ព្រោះបើគណៈកម្មការព្រំដែន និងនគរបាលតាមផ្លូវ មិនអនុញ្ញាត ម៉េចដឹកចេញទៅកើត។
ប្រភពដដែលបញ្ជាក់ថា ធ្យូងដឹកម្តងៗជាច្រើន តោន ចុះរាប់ខែតាំងពីមុន ឆ្នាំ២០១៤ មក។ ប្រភពដដែលអះអាងថា ឈើដែលយកទៅដុតធ្វើធ្យូងនោះ គឺកាប់ចេញពី ស្រុកសំឡូត នៅក្នុងដែនជម្រកសត្វព្រៃភ្នំសំកុះ ព្រៃសហគមន៍ និងដែនអភិរក្សសំឡូត៕
