ប្រជាពលរដ្ឋខេត្តបន្ទាយមានជ័យ បាននិយាយថា សមត្ថកិច្ចនៅតាមព្រំដែនកម្ពុជា ថៃបានអនុញ្ញាតឲ្យមាន់ថៃ រាប់ពាន់តោន ចូលមកលក់បែបអនាធិបតេយ្យ តាមផ្សារនានានៅក្នុង ខេត្តបន្ទាយមានជ័យ មុនរដូវចូលឆ្នាំខ្មែរចូលមកដល់ ដែលសកម្មភាពបែបនេះ កើតមានរាល់ថ្ងៃ មិនឃើញមានសមត្ថកិច្ចជំនាញ ណាម្នាក់ ចុះទៅអង្កេត និងត្រួតពិនិត្យ នោះឡើយ។ ប្រភពដដែលបានបញ្ជាក់ថា មន្ត្រីជំនាញ គ្រប់ផ្នែក គ្មានការទប់ស្កាត់នោះទេ ដោយបណ្តោយពលរដ្ឋឯទៀត ដែលមិនដឹងអ្វីសោះ អាចទទួលទានទៅពិតជាជួបប្រទះផលប៉ះពាល់សុខភាពធ្ងន់ធ្ងរ។
លោកហ៊ុន សែន បានបញ្ជាក់នៅខេត្តបន្ទាយមានជ័យ ថា ហាមដាច់ខាតមិនឲ្យមានបទល្មើស ឆ្លងដែន និងការជួញដូរមនុស្ស ទៅមកតាមខ្សែបន្ទាត់ព្រំដែននៃប្រទេសកម្ពុជា និងថៃ ឡើយ តែក្រោយពីលោកហ៊ុន សែន បានព្រមានរួចហើយនោះ គេសង្កេតឃើញ បទល្មើសសេដ្ឋកិច្ច តាមព្រំដែន កម្ពុជា និងថៃ បន្តកើតឡើងដូចទឹកបាក់ទំនប់ តែម្តង ដែលរួមមាន ជ្រូកក្រហម មាន់រស់ មាន់ងាប់ រាប់ពាន់តោន បទល្មើសម៉ូតូ គេចពន្ធ រាប់រយគ្រឿង ក៏មានការនាំចូលមកផងដែរ។ ប្រជាពលរដ្ឋខេត្តបន្ទាយមានជ័យ រិះគន់ថាលោកហ៊ុន សែន ដឹកនាំប្រទេសកម្ពុជាគ្មានប្រសិទ្ធភាពអនុវត្តន៍ច្បាប់នោះទេ គឺដូចវែកចកកណ្តាលបឹងអញ្ចឹង ព្រោះមន្ត្រីខិលខូចដឹងថារដ្ឋាភិបាលលោកហ៊ុន សែន ពុករលួយស្ទើរតែគ្រប់ជាន់ថ្នាក់។
ប្រភពព័ត៌មានពីច្រកទ្វារប៉ោយប៉ែត ខេត្តបន្ទាយមានជ័យ បានរាយការណ៍ឲ្យដឹងថា សមត្ថកិច្ចជំនាញ និងឈ្មួញបានឃុបឃិតគ្នាបើកដៃឲ្យមានការនាំចូលជ្រូកក្រហមពីប្រទេសថៃ ។ អាជីវករមូយរូប បានបញ្ជាក់ប្រាប់ថា កុងត្រូលជជុះជាច្រើនកន្លែង ក៏ត្រូវបានរូបគាត់បង់លុយជូនសមត្ថកិច្ចជំនាញ ផងដែរ ។ ម្ចាស់ទំនិញខាងលើដដែល ក៏បានបង្ហើបទៀតថា រដូវចូលឆ្នាំខ្មែរដែលជិតចូលមកដល់នៅពេលឆាប់ៗខាងមុខនេះ ដូច្នេះឈ្មួញត្រូវតែនាំចូលទំនិញ ពីប្រទេសថៃ មកលក់កាន់តែច្រើនសន្ធឹកសន្ធាប់ ក្នុងពេលដែលអស់លោកមន្ត្រីខាងលើ ខិតខំប្រមូលលុយពីក្រុមឈ្មួញតាមច្រើនរូបភាព ដើម្បីយកចាយវាយក្នុងរដូវចូលឆ្នាំខ្មែរ មានរយៈពេលបីថ្ងៃ។
ចំពោះករណីនាំចូលទំនិញគ្មានគុណភាពមហាជនជា ច្រើនដែលរស់នៅតាមខ្សែរបន្ទាត់ព្រំដែន ហើយបានដឹងពីភាពអនាធិបតេយ្យ ក្នុងការនាំចូលទំនិញពីប្រទេសថៃ បានព្រួយបារម្ភថា បើសិនជាគេ អនុញ្ញាតឲ្យមាន់រស់ មាន់ងាប់ និងអាហារខូចគុណភាពជាច្រើន រួមជាមួយជ្រូកក្រហម ដែលកំពុងនាំចូលប្រទេសកម្ពុជា តាមច្រករបៀង បន្តប្រព្រឹត្តទៅយ៉ាងរលូនដូចសព្វថ្ងៃនេះ ប្រាកដជា សុខភាពប្រជាពលរដ្ឋខ្មែរ នឹងជួបប្រទះផលប៉ះពាល់រយៈពេលខ្លី មធ្យម និងវែងមិនខាន។
