ប្រជាពលរដ្ឋស្រុកមង្គលបុរី បានរាយការណ៍មកថា ក្រុមឈ្មួញធ្វើអាជីវកម្មបូមខ្សាច់ខុសច្បាប់ខាងលើនេះ បានធ្វើសកម្មភាព ជាយូរឆ្នាំមកហើយ តែគេមិនដែលឃើញ មានអាជ្ញាធរ និងសមត្ថកិច្ចជំនាញ ចុះទៅបង្ក្រាប និងទប់ស្កាត់នោះឡើយ។ ប្រជាពលរដ្ឋបានសម្តែងការព្រួយបារម្ភថា ក្នុងមួយថ្ងៃៗ ក្រុមឈ្មួញ បានបូមខ្សាច់ចេញពីក្រោមដីលុងជ្រៅ ក្លាយទៅជារណ្តៅធំៗ រាប់សិបកន្លែង ដែលធ្វើឲ្យប្រជាពលរដ្ឋនៅទីនោះមានការព្រួយបារម្ភយ៉ាងខ្លាំង អំពីបញ្ហាសុវត្ថិភាពដល់កូនតូចៗរបស់ពួកគាត់ដើរធ្លាក់ក្នុងរណ្តៅបូមខ្សាច់លង់ទឹកស្លាប់ និងភ័យខ្លាច ដោយការប្រឈមសត្វគោ ក្របីធ្លាក់ ក្នុងរណ្តៅ ទាំងនោះផងដែរ។ ប្រជាពលរដ្ឋ ស្រុកមង្គលបុរី បញ្ជាក់ថា អាជីវកម្មបូមខ្សាច់ខុសច្បាប់ទាំង៣កន្លែងខាងលើមានទីតាំង នៅភូមិគោកទម្លាប់ ភូមិពោធិ៍រៀង ឃុំបន្ទាយនាង និង ភូមិអូរ អណ្តូង ឃុំអូរប្រាសាទ ស្រុកមង្គលបុរី ខេត្តបន្ទាយមានជ័យ។
អភិបាលស្រុកមង្គលបុរី លោក ឡុង ពុន បាននិយាយ ថា អាជីវកម្មបូមខ្សាច់ខុសច្បាប់ នៅក្នុងភូមិសាស្ត្រស្រុកមង្គលបុរី ខេត្តបន្ទាយមានជ័យ ត្រូវបានលោក និងក្រុមការងារ ដឹកនាំកម្លាំងចុះទៅទប់ស្កាត់ និងឲ្យផ្អាកសកម្មភាពកន្លងមករួចមកហើយ តែសកម្មភាពធ្វើអាជីវកម្មបូមខ្សាច់ខុសច្បាប់ទាំង៣កន្លែងនៅតែ ធ្វើសកម្មភាពបូមខ្សាច់ទាំងបំពានដដែល។ តែប្រជាពលរដ្ឋរស់នៅស្រុកមង្គលបុរី បានរិះគន់ថា អាជីវកម្មបូមខ្សាច់ យ៉ាងអនាធិបតេយ្យចំនួន៣កន្លែងដែលធ្វើសកម្មភាពបូមខ្សាច់ធ្វើអាជីវកម្មយ៉ាងគគ្រឹកគ្រេងនេះ គឺដោយសារមានមន្ត្រីនៅស្រុកមង្គលបុរី ចេញមុខការពារជាបន្តបន្ទាប់ បើទោះជាប្រជាពលរដ្ឋ បានស្នើឲ្យបញ្ឈប់សកម្មភាពក៏ដោយ។
ចំពោះក្រុមឈ្មួញដែលធ្វើអាជីវកម្មបូមខ្សាច់នៅ ៣ទីតាំងខាងលើ ត្រូវបានប្រជាពលរដ្ឋប្រាប់ឱ្យដឹងថា មានឈ្មោះ អ៊ឹង វ៉ាន់ម៉ៅ និងឈ្មោះ សៀវ ភឿង។ ទន្ទឹមនឹងនេះ ប្រជាពលរដ្ឋក៏មានការសង្ស័យថា ការមិនទប់ស្កាត់ និងបង្ក្រាបសកម្មភាពបូមខ្សាច់ខុសច្បាប់ ដែលបានធ្វើសកម្មភាពរាប់ឆ្នាំមកនេះ ទំនងជាអាជ្ញាធរ និងមន្ត្រីជំនាញ ទទួលបានផលប្រយោជន៍ពីអាជីវកម្មបូមខ្សាច់របស់ក្រុម ឈ្មួញ ទើបពុំបង្ក្រាបយ៉ាងដូច្នេះ។ ប្រជាពលរដ្ឋស្រុកមង្គលបុរី បានរិះគន់ថា បើ អាជ្ញាធរចេះតែបណ្តែតបណ្តោយឲ្យមាន សកម្មភាពបូមខ្សាច់ធ្វើអាជីវកម្ម អនាធិបតេយ្យជាបន្តទៀតដោយគ្មានការទប់ស្កាត់ និងបង្ក្រាប នោះផលលំបាកពិតប្រាកដនឹងធ្លាក់មកលើប្រជាពលរដ្ឋមូលដ្ឋានទាំងពេលបច្ចុប្បន្ន និងពេលអនាគត៕
