ខេត្តកំពត ៖ អស់រយៈពេលជាច្រើនឆ្នាំណាស់មកហើយ ទាំងមន្ត្រីរាជការតូច-ធំ និងប្រជាពលរដ្ឋក្នុងខេត្តកំពត ជាពិសេសពលរដ្ឋភូមិព្រៃពាយ និងភូមិៃព្រស្តៅ ឃុំត្រពាំងភ្លាំងចាំមិនភ្លេចនោះទេ គឺសម្តេចតេជោ ហ៊ុន សែន នាយករដ្ឋមន្ត្រី និងជាអនុប្រធានគណបក្សប្រជាជនកម្ពុជា បានប្រើកណ្តាប់ដៃដែកចាត់ការលើមន្ត្រីខិលខូចមួយចំនួន ក្នុងខេត្តកំពត ក្នុងនោះក៏មានអភិបាលខេត្តកំពតម្នាក់ឈ្មោះ ពុធ ចាន់ដារិទ្ធិ ជាប់ពន្ធនាគារទៀតផង ព្រោះតែរឿង ដីធ្លីភូមិព្រៃពាយ ឃុំត្រពាំងភ្លាំងនេះ ហើយក្រុមហ៊ុនដែលចំណាយលុយសម្រាប់អភិវឌ្ឍន៍នោះ ក៏ខាតបង់ច្រើនដែរ ។
ក្រោយមកក៏មានប្រជាពលរដ្ឋក្រីក្រ និងជនពិការខ្វះដី បង្កបង្កើនផលចិញ្ចឹមជីវិតស្នើសុំដីផងដែរ ។ ដោយ មើលឃើញពីទុក្ខលំបាករបស់ប្រជាពលរដ្ឋទីទ័លក្រ និងការយកចិត្តទុកដាក់ពីសម្តេចតេជោ ហ៊ុន សែន នាយករដ្ឋ មន្ត្រីនៃព្រះរាជាណាចក្រកម្ពុជាក៏បានអនុញ្ញាតឱ្យស្ថាប័នពាក់ព័ន្ធ ទាំងអស់រៀបចំឯកសារ ដើម្បីចាត់ចែងដីធ្លី សាធារណៈរបស់រដ្ឋឱ្យមកទីឯកជនរបស់រដ្ឋ និងដាក់ជាដីសម្បទានសង្គមកិច្ចចែកជូនប្រជាពលរដ្ឋដែលខ្វះខាតដីបង្ក បង្កើនផល ។ ហើយក្នុងច្បាប់ភូមិបាលបាននិយាយថា ពលរដ្ឋគ្រប់រូប ដែលទទួលដីសង្គមកិច្ចសម្រាប់បង្កបង្កើនផល នោះហាមធ្វើការលក់ដូរជួលបញ្ចាំ ឬធ្វើប្លង់កម្មសិទ្ធិ បើសិនពលរដ្ឋរស់នៅមិនបាន ៥ឆ្នាំ ។ ហើយរាជរដ្ឋាភិបាល ដែលដឹកនាំដោយសម្តេចតេជោ ហ៊ុន សែន ជានាយករដ្ឋមន្ត្រីនោះ សម្តេចខ្លាចណាស់ពលរដ្ឋអត់បាយ អត់ដីបង្ក បង្កើនផល សម្តេចដើរព្រួយសម្រាកព្រួយ ព្រោះប្រជាពលរដ្ឋខ្វះដីធ្វើស្រែចំការ ទើបសម្តេចបង្កើតឱ្យមានរបបដី សង្គមកិច្ចនេះឡើយ ។
តែដោយឡែក ប្រជាពលរដ្ឋនៅខេត្តកំពតបានទទួលដីសង្គមកិច្ចហើយ បែរជាមានឈ្មួញមហាអំណាចមក សំឡុតគំរាមកំហែង វាយធ្វើបាបដើម្បីឱ្យពួកគាត់លក់ដីនេះឱ្យទៅក្រុមហ៊ុន អា.ម៉ា.វី.អូ ក្រុមហ៊ុនរបស់ប្រទេស ជប៉ុនទៅវិញ ។
តាមប្រជាពលរដ្ឋសុំមិនបញ្ចោញឈ្មោះបានប្រាប់ឱ្យសារព័ត៌មានយើង ដឹងថា អ្នកដែលមានអំណាចមកទីញដី សង្គមកិច្ចដែលសម្តេចចែកជូនពួកគាត់នោះ គឺឯកឧត្តម អាំ ផល្លីន និងលោកជំទាវ ហ៊ាង គន្ធី ។ ហើយបើតាមមន្ត្រី រាជការ ក្នុងខេត្តកំពតបានបង្ហើបឱ្យដឹងថា ឯកឧត្តម អាំ ផល្លីន គ្រាន់តែជាអ្នកទទួលថវិកាពីក្រុមហ៊ុនមកចាត់ចែង ទេ តែអ្នករៀបចំដីធ្លីនេះ គឺលោក ជឹង ផល្លា អភិបាលរងខេត្តកំពត និងលោក ហុក ទ្រី អភិបាលរងស្រុកឈូក ព្រោះលោកទាំងពីរនេះជាថ្នាក់ដឹកនាំខេត្តម្នាក់ ថ្នាក់ដឹកនាំស្រុកម្នាក់ហើយទទួលបន្ទុកខាងដីធ្លីទៀត ដូច្នេះទើប គេនិយាយតៗគ្នាថា អ្នកដឹងច្បាប់ទើបប្រព្រឹត្តខុសច្បាប់យ៉ាងនេះ ហើួលោក ជឹង ផល្លា បានចេញលិខិតមួយច្បាប់ ផ្ញើជូនគ្រប់ឃុំ ដោយបំរាមមិនឱ្យជនណាមួយយកឈ្មោះលោកមកប្រើដើម្បីធ្វើឱ្យខូច ផលប្រយោជន៍ និងមុខមាត់ថ្នាក់ដឹកនាំខេត្ត តែលោក ជឹង ផល្លា ភ្លេចបិទមាត់ឈ្មោះ មាស ម៉ាតៈ (ហៅធឿន, ហៅឪអាដូច)ដែលរស់នៅភូមិថ្មី ឃុំថ្មី ស្រុកទឹកឈូ ខេត្តកំពត និងឈ្មោះ កែវ សេន មន្ត្រីប៉ុស្តិ៍រដ្ឋបាលឃុំថ្មី ដែលជាសេនាស្លាប់រស់របស់លោកឈ្មោះ មាស ម៉ាតៈ (ហៅធឿន)និងឈ្មោះ ទូច សារុម នោះដើរអួតក្អេងក្អាង ដាក់ប្រជាពលរដ្ឋដែលរស់នៅឃុំព្រៃថ្នង់ ឃុំថ្មី ឃុំស្ទឹងកែវ និងប្រជាពលរដ្ឋដែលគ្រោះដោយការសំឡុតគំរាមវាយដំ ដុតចំការ គំរាមចាប់ដាក់គុកថា “ពួកឯង ធ្វើមិនឈ្នះមេអញទេ ព្រោះមេអញជាថ្នាក់ដឹកនាំខេត្តបន្តិចទៀត ឬក្រោយចូលឆ្នាំខ្មែរហើយមេអញចាប់ពួកឯង និងអ្នកកាសែតទាំងអស់ដាក់គុកហើយប្រយ័ត្ន” ។
ទាក់ទងនឹងសំដីដ៏សាហាវនេះ លោក ហ៊ុន សុខា ប្រធានក្លឹបអ្នកកាសែតឯករាជ្យមានប្រសាសន៍ថា ចំពោះពាក្យគំរាមនេះ គឺលោកធ្លាប់ទទួលហើយ ព្រោះនៅថ្ងៃទី ២៤ ខែមីនា ឆ្នាំ២០១៥ លោកបានដឹកនាំក្រុមអ្នក សារព័ត៌មានចុះទៅយកព័ត៌មាននៅតំបន់នោះ ក៏ត្រូវបានក្រុមលោក មាស ម៉ាតៈ, កែវ សេន, ទូច សារុម ស្ទាក់បាញ់ និងជំពាមកៅស៊ូគ្រាប់ដែក មានកាំបិត ពូថៅ មកលើក្រុមខ្ញុំ ហើយ មាស ម៉ាតៈ, នេះបានបញ្ជាឱ្យឈ្មោះ ចេក ដុតឡានពួកខ្ញុំចោលឱ្យអស់ ព្រោះមេគេធំណាស់ ។
ហើយនៅថ្ងៃទី ២៦ ខែមីនា ឆ្នាំ២០១៥ ឯកឧត្តម អាំ ផល្លីន បានដាក់ពាក្យបណ្តឹងចំពោះក្រុមសារព័ត៌មាន អង្គការដែលចុះទៅយកព័ត៌មានថា គំរាមចាប់ចងប្រជាពលរដ្ឋដោយប៉ូលិសយកអាវុធភ្ជង់ផងដែរ ។ លោក អាំ ផល្លីន និយាយគ្មានស្គាល់បាបបុណ្យសោះ អ្នកសារព័ត៌មាន និងអង្គការសង្គមស៊ីវិលមានកាំភ្លើងដូចខាងលោកឬ ? ពួកខ្ញុំរក្សាសេចក្តីសុខ អង្វរមនុស្សបិទមុខទាំងនោះ ទើបស្គាល់សន្តានពួកទមិឡនេះថា ធ្វើបាបប្រជាពលរដ្ឋ របស់សម្តេចតេជោណាស់ ។
លោក ទូច ណូរ៉ា ប្រធានសមាគមសារព័ត៌មានឃ្លាំមើលកម្ពុជា មានប្រសាសន៍ថា ថ្ងៃនោះលោករន្ធត់ណាស់ ព្រោះលោកជិះគោយន្តមុខគេ ពេលដល់ឃើញមនុស្សជាច្រើនពាក់ម៉ាសមុខ ទាញកាំបិត ពូថៅ បាញ់ជំពាមកៅស៊ូ ហើយសំឡុងដុតគោយន្តចោល និងមានម្នាក់ស្រែកបញ្ជាថា កាប់ និងបាញ់ឱ្យងាប់ឱ្យអស់ ព្រោះមេយើងទទួលខុស ត្រូវទេ ក្នុងនោះយើងស្គាល់ដោយក្នុងចំណោមមនុស្សបិទមុខនោះ ក៏មានមនុស្សស្មោះត្រង់ដែរ ដោយគាត់ប្រាប់ថា គេជួលឱ្យមកទេ ដោយឱ្យ ៣០០០០រៀល ម្នាក់ ដើម្បីឱ្យវាយអ្នកកាសែត ជាពិសេសសម្លាប់ឈ្មោះ គឿន ហើយម្នាក់ទៀត ជាជំនួយការភូមិ តែលោកមិនហ៊ានទេ ចេះតែមកតាមគេទៅ ដើម្បីប្រាក់ ។
លោក ទូច ណូរ៉ា មានប្រសាសន៍ទៀតថា លោកធ្វើកាសែតជិត ២០ឆ្នាំហើយ មិនដែលជួបរឿងអញ្ចឹងទេ ហើយលោកបានធើរបាយការណ៍ជូនលោកព្រះរាជអាជ្ញាខេត្តកំពត ក៏ដូចអភិបាលខេត្តហើយ ។ ហើយលោកជឿ ជាក់ថា សម្តេចនាយករដ្ឋមន្ត្រី និងចាត់ការចំពោះមន្ត្រីនោះ ដែលបញ្ជាឱ្យឈ្មោះ មាស ម៉ាតៈ, កែវ សេន, ទូច សារុម ធ្វើបាបប្រជាពលរដ្ឋ និងអ្នកសារព័ត៌មានមិនខានឡើយ ។
លោក បឿង រដ្ឋា ចាងហ្វាងកាសែតយុវជនតេជោ លោកមានប្រសាសន៍ថា កាលពីថ្ងៃទី ១៣ ខែមេសា ឆ្នាំ ២០១៥ លោកជំទាវ ហ៊ាង គន្ធិ និងឯកឧត្តម អាំ ផល្លីន បានធ្វើពិធីជប់លៀងមួយនៅក្រុងកំពត ហើយយាយធី គាត់មានប្រសាសន៍ប្រាប់អ្នកចូលរួមថា ចូលឆ្នាំខ្មែរហើយនេះគាត់និងឱ្យតុលាការចាប់ពួកអ្នកកាសែតនេះ ដាក់គុក ឱ្យអស់ ក្នុងនោះមានលោក ហ៊ុន សុខា ប្រធានក្លឹបអ្នកកាសែតឯករាជ្យ, លោក ទូច ណូរ៉ា ប្រធានសមាគមសារព័ត៌ មានឃ្លាំមើលកម្ពុជា, លោក បឿង រដ្ឋា ចាងហ្វាងកាសែត យុវជនតេជោ, លោក ពេជ គឿន ប្រធានស្នាក់ការអង្គការ អភិរក្សព្រៃឈើ អភិវឌ្ឍន៍ធនធានធម្មជាតិប្រចាំខេត្តកំពត និងអ្នកសារព័ត៌មានទាំងអស់ ដែលចុះទៅយកព័ត៌មានថ្ងៃទី ២៤ ខែមីនា ឆ្នាំ២០១៥ នោះ ។
ចំពោះពាក្យគំរាមរបស់យាយធីនេះ អ្នកសារព័ត៌មាន និងត្រៀមខ្លួនជាស្រេច ចំពោះចំណាត់ការផ្លូវច្បាប់ ហើយក៏យើងដឹងដែរថា លោក ឯក ឆេងហួត ជាព្រះរាជអាជ្ញាយុត្តិធម៌ម្នាក់ដែលប្រជាជនទូទៅទទួលស្កាល់នូវ ចំណាត់ការរបស់លោកមិនដូចយាយធី ពោលអំនួតទេ ។
សម្តេចតេជោ ធ្លាប់មានប្រសាសន៍ហើយថា មន្ត្រីទាំងអស់ត្រូវដុសក្អែលមុជទឹកឱ្យស្អាត ដើម្បីបំរើប្រជាជន ហើយសម្តេច និងកាត់សាច់ស្អុយចោលហើយ ព្រោះមន្ត្រីទាំងនេះកំពុងធ្វើបាបប្រជាជន សម្តេចណាស់ ដីសម្តេចចែក ឱ្យប្រជាជនសោះ ហ៊ានមកសំឡុតគំរាមបណ្តេញប្រជាជនចេញឱ្យវេទនា“នេះឬមន្ត្រីល្អ” ។
យើងរង់ចាំមើលតើលោក ជឹង ផល្លា ដែលប្រើ មាស ម៉ាតៈ, កែវ សេន ធ្វើបាបប្រជាជនធ្វើឱ្យកិត្តិយសគណបក្សប្រជាជនបាត់បង់សន្លឹកឆ្នោត ក្នុងស្រុកឈូកសន្ធឹកសន្ធាប់នោះ លោកនិងចាត់ការយ៉ាងណា ? ព្រោះពលរដ្ឋរងគ្រោះដោយសារដីធ្លីរស់នៅឃុំស្ទឹងគែវ ឃុំព្រៃថ្នង់ ឃុំថ្មី ឃុំត្រពាំងភ្លាំង ជាពិសេសបងប្អូនដែលកាន់សាសនាអីស្លាម ដែលលោករងការគាបសង្កត់ពីឈ្មោះ មាស ម៉ាតៈ, កែវ សេន ដែលយកអំណាចអភិបាលរង ជឹង ផល្លា មកប្រើយ៉ាងណា ? តើលោក ជឹង ផល្លា ហ៊ានចាត់ការទេ ? ហ៊ាន ឬមិនហ៊ាន…. ? ៕
