គណបក្សសង្គ្រោះជាតិបានដាក់កាលបរិច្ឆេទចាប់ផ្តើមធ្វើមហាបាតុកម្មលើកទី៤ នៅថ្ងៃទី១០ ខែធ្នូ ឆាប់ៗខាងមុខនេះដើម្បីរកយុត្តិធម៌ជូនប្រជាពលរដ្ឋម្ចាស់ឆ្នោត និងរកយុត្តិធម៌សម្រាប់កម្មករ ព្រះសង្ឃ និងប្រជាពលរដ្ឋដែលសមត្ថកិច្ចប្រើអំពើហិង្សាវាយបង្ក្រាបនិងបាញ់សម្លាប់កាលពីថ្ងៃទី១២ ខែវិច្ឆិកា ឆ្នាំ២០១៣។មេដឹកនាំគណបក្សសង្គ្រោះជាតិចាប់ផ្តើមបញ្ចុះបញ្ចូលប្រជាពលរដ្ឋជាថ្មីទៀតឱ្យមកចូលរួមធ្វើមហាបាតុកម្មលើកទី៤ នៅថ្ងៃទី១០ ខែធ្នូ ឆ្នាំ២០១៣ ចំទិវាសិទ្ធិមនុស្សអន្តរជាតិ ហើយប្រជាពលរដ្ឋនិងអ្នកគាំទ្រគណបក្សសង្គ្រោះជាតិក៏បានត្រៀមរួចជាស្រេចដើម្បីចូលរួមក្នុងមហាបាតុកម្មនោះដែរ។ នៅលើទំព័រហ្វេសប៊ុក របស់លោក សម រង្ស៊ី កាលពីព្រឹកថ្ងៃពុធ ទី២០ ខែវិច្ឆិកា ម្សិលមិញនេះបានសរសេរថារូបលោក និងលោក កឹម សុខា បានចុះជួបសំណេះសំណាលជាមួយបងប្អូនប្រជាពលរដ្ឋនិងសមាជិកក្រុមប្រឹក្សាឃុំ-សង្កាត់ នៅសង្កាត់បារាយណ៍ ក្រុងព្រៃវែង។ លោក សម រង្ស៊ី បានសរសេរទៀតថា នៅល្ងាចថ្ងៃពុធ ទី២០ ខែវិច្ឆិកា រូបលោកនិងលោក កឹម សុខា នឹងជួបសំណេះសំណាលជាមួយប្រជាពលរដ្ឋនិងអ្នកគាំទ្រនៅឃុំធាយ ស្រុកបាភ្នំ ខេត្តព្រៃវែង។ ចំណែកនៅថ្ងៃទី២១ ខែវិច្ឆិកា ឆ្នាំ២០១៣ រូបលោក និងលោក កឹម សុខា ត្រូវជួបសំណេះសំណាលជាមួយបងប្អូនប្រជាពលរដ្ឋ និងសមាជិកក្រុមប្រឹក្សាឃុំ-សង្កាត់នៅក្រុងស្វាយរៀង ហើយនៅពេលរសៀលត្រូវជួបសំណេះសំណាលជាមួយបងប្អូនប្រជាពលរដ្ឋនិងអ្នកគាំទ្រនៅឃុំក្រោលគោ ស្រុកស្វាយជ្រំ ខេត្តស្វាយរៀង។ មហាបាតុកម្មលើកទី៤ របស់គណបក្សសង្គ្រោះជាតិដែលប្រព្រឹត្តទៅនៅថ្ងៃទី១០ ខែធ្នូ ឆ្នាំ២០១៣ គឺជាសំឡេងអំពាវនាវថ្មីមួយទៀតរបស់ប្រជាពលរដ្ឋកម្ពុជាដើម្បីឱ្យអង្គការសហប្រជាជាតិនិងសហគមន៍អន្តរជាតិជួយដោះស្រាយវិបត្តិនយោបាយដែលជាប់គាំងនៅក្រោយការបោះឆ្នោត។ សម្រែកទាមទារយុត្តិធម៌របស់ប្រជាពលរដ្ឋម្ចាស់ឆ្នោត គឺជារឿងដែលសហគមន៍អន្តរជាតិ ក៏ដូចជាប្រទេសម្ចាស់ជំនួយត្រូវពិចារណាឡើងវិញ ចំពោះការគាំទ្ររដ្ឋាភិបាលមិនស្របច្បាប់របស់លោក ហ៊ុន សែន។ មានន័យថាសហគមន៍អន្តរជាតិមិនគាំទ្ររដ្ឋសភា និងរដ្ឋាភិបាលឯកបក្សរបស់លោក ហ៊ុន សែន ដោយពេញលេញទេ ដែលប្រការនេះអាចធ្វើឱ្យរដ្ឋាភិបាលលោក ហ៊ុន សែន ប្រឈមនឹងវិបត្តិសព្វបែបយ៉ាង។ ជាពិសេសការធ្លាក់ចុះនៃកំណើនសេដ្ឋកិច្ចកម្ពុជាដោយសារតែអំពើពុករលួយ គឺជាគ្រោះថ្នាក់ដ៏ធ្ងន់ធ្ងរបំផុតសម្រាប់រដ្ឋាភិបាលមិនស្របច្បាប់របស់លោក ហ៊ុន សែន ព្រោះមួយរយៈពេលចុងក្រោយនេះទំនិញលើទីផ្សារកំពុងឡើងថ្លៃយ៉ាងគំហុក។ ជាងនេះទៅទៀតការប្តេជ្ញាកែទម្រង់ស៊ីជម្រៅរបស់លោក ហ៊ុន សែន បែរជានាំឱ្យអំពើពុករលួយរាលដាលកាន់តែខ្លាំងនៅក្នុងស្ថាប័នរដ្ឋសំខាន់ៗក្នុងនោះរួមមានទីស្តីការគណៈរដ្ឋមន្ត្រី អគ្គនាយកដ្ឋានពន្ធដារ និងអគ្គនាយកដ្ឋានគយ។ មហាបាតុកម្មលើកទី៤ របស់គណបក្សសង្គ្រោះជាតិគឺប្រជាពលរដ្ឋម្ចាស់ឆ្នោតប្រាកដជាស្រែកទាមទារឱ្យលោក ហ៊ុន សែន ចុះចេញពីអំណាច ៕
