ប្រធានសហគមន៍ជនជាតិដើមភាគតិចព្នង ឃុំក្បាលរមាស បានលើកឡើងថា ការផ្តល់ដីសម្បទានសេដ្ឋកិច្ចរបស់រដ្ឋាភិបាលគឺជាក្តីបារម្ភសម្រាប់សហគមន៍ជនជាតិដើមភាគតិច ដែលអាស្រ័យផលធនធានធម្មជាតិ ព្រោះក្រុមហ៊ុនឈូសឆាយដីព្រៃឲ្យទៅជាវាល សម្រាប់ដាំកៅស៊ូអស់១ម៉ឺនហិកតាទៅហើយ ដែលជាឧបសគ្គចម្បងដល់ការប្រកបរបរចិញ្ចឹមជីវិតរបស់ជនជាតិដើមភាគតិច។ ប្រជាសហគមន៍ ក៏បានអំពាវនាវឲ្យលោក កុល សំអុល អភិបាលខេត្តស្ទឹងត្រែងជួយការពារព្រៃសហគមន៍របស់ពួកគាត់ផងដែរ ដើម្បីទុកឲ្យកូនចៅជំនាន់ក្រោយបានស្គាល់ និងបានអាស្រ័យផលពីធនធានធម្មជាតិ។ ប្រធានសហគមន៍ជនជាតិដើមភាគតិចព្នង ក្នុងឃុំក្បាលរមាស បានរិះគន់ថា រដ្ឋាភិបាលបានផ្តល់សិទ្ធិឲ្យក្រុមហ៊ុនវិនិយោគនៅក្នុងឃុំក្បាលរមាស គឺជាប្រភេទដីព្រៃសម្បូរទៅដោយធនធានធម្មជាតិ ហើយក្រុមហ៊ុនទាំងនោះកាប់ឈើលក់យកលុយយ៉ាងច្រើនសន្ធឹកសន្ធាប់ ដោយមិនទាន់ឃើញអភិវឌ្ឍន៍ ។
កាលពីថ្ងៃទី១៤ ខែមិថុនា ឆ្នាំ២០១៥ កន្លងទៅថ្មីៗនេះ សហគមន៍ជនជាតិដើមភាគតិចព្នង នៅឃុំក្បាលរមាស ស្រុកសេសាន ខេត្តស្ទឹងត្រែង បានឃាត់គ្រឿងចក្រ២គ្រឿង របស់ក្រុមហ៊ុន ស៊ីវ ហ្គិច (Saiv Kheck) ដោយសារតែក្រុមហ៊ុននេះ ឈូសឆាយដីព្រៃអភិរក្សសហគមន៍ក្បាលរមាស។ ប្រជាពលរដ្ឋជនជាតិដើមភាគតិចព្នង ប្រមាណ៥០នាក់ នៅថ្ងៃទី១៥ ខែមិថុនា ឆ្នាំ២០១៥ បានជួបជុំគ្នានៅទីតាំងស្រែគាស់ ភូមិក្បាលរមាស ឃុំក្បាលរមាស ស្រុកសេសាន ដើម្បីរង់ចាំតំណាងក្រុមហ៊ុន ស៊ីវ ហ្គិច ចូលមកដោះស្រាយ។ ប្រជាសហគមន៍អះអាងថា តំណាងក្រុមហ៊ុនត្រូវធ្វើកិច្ចសន្យាជាលាយលក្ខណ៍អក្សរ និងមានស្នាមមេដៃជាមួយសហគមន៍ ច្បាស់លាស់ ទើបអ្នកភូមិសម្រេចប្រគល់គ្រឿងចក្រឲ្យក្រុមហ៊ុនវិញ។
តំណាងជនជាតិដើមភាគតិចព្នង បាននិយាយថាពួកគាត់ព្រួយបារម្ភខ្លាចក្រុមហ៊ុនដីសម្បទានសេដ្ឋកិច្ចឈូសឆាយដីព្រៃ អភិរក្សរបស់សហគមន៍ ហេតុនេះហើយទើបពួកគាត់ឃាត់គ្រឿងចក្រទុកជាមុន ដើម្បីការពារព្រៃសហគមន៍សម្រាប់ផលប្រយោជន៍កូនចៅជំនាន់ក្រោយ។ ប្រធានសហគមន៍ជនជាតិដើមភាគតិចព្នង នៅឃុំក្បាលរមាស លោក ស្រៀន ជឿន បានប្រកាន់ជំហរថា តំណាងក្រុមហ៊ុនត្រូវធ្វើកិច្ចសន្យាផ្តិតមេដៃ ជាមួយសហគមន៍ ថែមទាំងមានអាជ្ញាធរមូលដ្ឋានដឹងឮជាមុនសិន ទើបសហគមន៍សម្រេចប្រគល់គ្រឿងចក្រជូនក្រុមហ៊ុនវិញ ហើយបើនៅតែមានសកម្មភាពរំលោភបំពានតទៅទៀត គឺពួកគាត់ប្តេជ្ញាការពារព្រៃសហគមន៍៕
