ខេត្តក្រចេះ ៖ប្រភពបានឲ្យដឹងថា ឈ្មួញមានអំណាច រកស៊ីដឹកជញ្ជូនឈើ ល្មើសច្បាប់សព្វថ្ងៃនេះ ជាមន្ត្រីយោធា មានឈ្មោះ ហ៊ុត ប៊ុនគីម ជាមេបញ្ជាការ កងសេនាធំលេខ៣ ចំណុះឲ្យវរការពារព្រំដែន២០៤ និងឈ្មោះ ជាប់ សារឿន ជាយោធាយោធភូមិភាគ២ ប្រចាំស្រុកស្នួល។ ជាក់ស្ដែង កាល ពីយប់ថ្ងៃទី១៣ និង១៤ ខែមិថុនា ឆ្នាំ២០១៥ លោក ហ៊ុត ប៊ុនគីម និងលោក ជាប់ សារឿន បាននាំយកឈើសុក្រំ ដែលជាប្រភេទឈើ លេខ១ ជាង ២០ឡានធំៗ ចូលទៅព្រំដែនវៀតណាម បានយ៉ាងរលូន។
ដោយសារភាពអសកម្ម និងអំពើពុករលួយ របស់មន្ត្រីជំនាញ ឃុបឃិតជាមួយ ឈ្មួញមានអំណាច ទើបសកម្មភាព ដឹកជញ្ជូនឈើល្មើសច្បាប់ នៅតែបន្តកើតមាន យ៉ាងអនាធិបតេយ្យ នៅចំណុច៩៩៩៩ ឆ្លងកាត់ក្រុមហ៊ុន TTY ស្ថិតក្នុងស្រុកស្នួល ខេត្តក្រចេះ យកទៅលក់នៅប្រទេសវៀតណាម យ៉ាងរំភើយគ្មាននរណា អើពើបង្ក្រាបទេ។
អំពើពុករលួយ និងភាពអសកម្ម របស់លោក គង់ ងីម នាយដែនជម្រកសត្វព្រៃស្នួល ជាអ្នកបើកភ្លើងខៀវ ឲ្យក្រុមឈ្មួញទាំងនោះ ទើបពួកគាត់នាំចេញឈើ ទៅស្រុកយួន ដូចភ្លៀងរលឹម។ ពាក់ព័ន្ធនិងបញ្ហាខាងលើនេះ លោក គង់ ងីម នាយដែនជម្រកសត្វព្រៃស្នួល បានប្រាប់ តាមទូរស័ព្ទថា លោកមិនបានដឹងទេ ព្រោះលោកជាប់ប្រជុំ នៅភ្នំពេញ ៕
