កំពង់ធំ ៖ ក្រុមបជាពលរដ្ឋដែលរស់នៅក្នុងភូមិបុស្សតាឯក ឃុំទ្រា ស្រុកស្ទោង បាននាំគ្នាលើកឡើងពីមាត់មួយទៅមាត់មួយ មិនដាច់គ្នាថា ដីនៅតំបន់ដូប៉ា ទាំងដីវាលក្រោមបឹងទន្លេសាប និងដីវាលទំនាប ពួកគាត់បានសង្កេតឃើញមានក្រុមឈ្មួញ បានធ្វើសកម្មភាពឈូសឆាយរុករានទន្ទ្រានយ៉ាងគគ្រឹកគគ្រេង ហាក់គ្មានការខ្លាចរអាលើសមត្ថកិច្ចអាជ្ញាធរមូលដ្ឋាន សោះ។
តាមប្រជាពលរដ្ឋដែលរស់នៅតំបន់ខាងលើនេះ បានរៀបរាប់ឱ្យដឹងថា ពួកគាត់ជាប្រជាពលរដ្ឋទូទៅ គ្មានប្រាក់គ្មានអំណាច ពុំមាននរណាម្នាក់ហ៊ានទៅប៉ះពាល់ដីត្រង់ចំណុចតំបន់ដូប៉ានោះទេ ព្រោះខ្លាចទទួលទោសទណ្ឌពីច្បាប់។
ផ្ទុយទៅវិញ ពួកគាត់បែរជាសង្កេតឃើញថា មានឈ្មួញម្នាក់ដែលគេដឹងថា បានប្រើទឹកលុយយ៉ាងច្រើន ទៅធ្វើសកម្មភាពឈូសឆាយ រុករានទន្ទ្រានដីព្រៃ ដោយដំបូង គេប្រើឱ្យលួចកាប់ឆ្ការ រួចហើយគេលួចគាសគល់ ដល់ដំណាក់កាលចុងក្រោយ គេយកគ្រឿងចក្រទៅភ្ជូរ ដោយគ្មានច្បាប់អនុញ្ញាតនោះទេ ប៉ុន្តែក៏ពុំមាននរណាហ៊ានទៅប៉ះ ឬហាមឃាត់សកម្មភាពគេនោះទេ។
លើសពីនេះទៅទៀត នៅពេលដែលមានដំណឹងថា ក្រុមអ្នកសារព័ត៌មានចុះទៅផ្តិតយករូបភាពនៅទីនោះ បែរជាមានអ្នកអោយដំណឹងទៅក្រុមឈ្មួញនោះ ឱ្យយកគ្រឿងចក្រដែលធ្វើសកម្មភាពឈូសឆាយចេញ ដើម្បីជៀសវៀងការបែកធ្លាយព័ត៌មាន។
តាមប្រភពច្បាស់ការបានបង្ហើបឱ្យដឹងដែរថា គេបានរកឃើញថាមានមន្ត្រីមួយចំនួនបានឃុបឃិតនឹងក្រុមឈ្មួញ ទាំងនោះ ដោយបើកដៃឱ្យពួកគេធ្វើសកម្មភាពស្រេចទំនើងចិត្តឈូសឆាយយកដីរដ្ឋ ហើយក៏មានការកោះហៅឱ្យឡើងតុលាការខ្លះដែរដើម្បីឱ្យពួកអ្នក ពាក់ព័ន្ធទាំងនោះបំភ្លឺពីរឿងនេះ និងដើម្បីជាការព្រមានឱ្យរាងចាល ប៉ុន្តែគេនៅសង្កេតឃើញថា សកម្មភាពនោះនៅតែបន្តដដែល។
បើតាមប្រជាពលរដ្ឋឱ្យដឹងថា ឈ្មោះ ពៅ ប៉េងឃីម ជាម្ចាស់ហាងលក់គុយទៀវមួយកន្លែងនៅផ្សារស្ទោង បានយកគ្រឿងយន្តមកឈូសឆាយដីនៅតំបន់ដូនប៉ានោះយ៉ាងគឃ្លើន ហាក់មានការសហការគ្នាយ៉ាងល្អរវាងក្រុមឈ្មួញ និងអាជ្ញាធរពាក់ព័ន្ធមួយចំនួន ដោយពុំខ្លាចញញើតពីសំណាញ់ច្បាប់សូម្បីបន្តិចនោះឡើយ។
ឯលោកព្រឹម រដ្ឋា អភិបាលស្រុកស្ទោង បានបដិសេធចំពោះករណីឈូសឆាយដីរដ្ឋនេះថា លោកពុំបានដឹងទាល់តែសោះ ថាដីនៅតំបន់នោះត្រូវគេឈូសឆាយ។ ហើយបែរជានិយាយយ៉ាងប្រហើរថា ចាំមើលលោកសួរទៅមេឃុំទ្រាសិន ។/
