រតនគិរី ៖ ក្រុមប្រជាសហគមន៍នៅភូមិសាគ្រៀងថ្មីៗនេះបានចោទប្រកាន់ថា ក្រុមហ៊ុន ជា ច័ន្ទរិទ្ធ ដាក់រោងចក្រអារ និងកែច្នៃឈើគ្មានច្បាប់ និងលួចកាប់ឈើដឹកចេញពីព្រៃសហគមន៍យ៉ាងគគ្រឹកគគ្រេងបំផុត មិនរំលងជំនាញឡើយ។
គួររំលឹកថា ក្រុមហ៊ុន ជា ច័ន្ទរិទ្ធអភិវឌ្ឍន៍ ហៅក្រុមហ៊ុន៧២ មានផ្ទៃដីទំហំ ៥១២៤ ហិកតា វិនិយោគដាំដំណាំកសិឧស្សាហកម្ម និងចិញ្ចឹមសត្វ ដែលមានទីតាំងនៅស្រុកបរកែវ និងស្រុកអូរយ៉ាដាវ ។
ដោយឡែក ថ្មីៗនេះគេបែរជាសង្កេតឃើញនៅ ភូមិសាគ្រៀង ឃុំកិចុង ស្រុកបរកែវ ជាប់ព្រំប្រទល់ ស្រុកអូរយ៉ាដាវ មានរោងចក្រអារកែច្នៃឈើសុក្រំ មួយកន្លែងដែលគេស្គាល់ថា ជារោងចក្ររបស់ក្រុមហ៊ុនខាងលើទៅវិញ ។ ហើយ នៅពេលថ្ងៃរោងចក្រនេះ ពុំមានសកម្មភាពទេ ហើយបើក្នុងពេលយប់ គឺមានសកម្មភាពដឹកបទល្មើសព្រៃឈើយ៉ាង សកម្មបំផុត ។ ហើយដែលក្នុងរោងចក្រនោះ គឺមានកម្មករ សុទ្ធជាជនជាតិយួន មិនចេះខ្មែរទាំងអស់។
បើតាមប្រភពព័ត៌មានពីប្រជាពលរដ្ឋនៅភូមិសាគ្រៀង បានអោយដឹងទៀតថា រោងចក្រនេះជារបស់ក្រុមហ៊ុន៧២ ហើយគេតែងតែលួចចូលកាប់ឈើសុក្រំ ដឹកចេញពីព្រៃសហគមន៍យកទៅដាក់ដេប៉ូ និងដាក់ចូលទៅក្នុងរោងចក្រអារកែច្នៃ តែនៅពេលយប់ទេ។
តាមប្រភពបន្តដដែលថា ក្រោយពីពេលអារអាចម៍រណានិងជុំនៀរឈើ ត្រូវគេយកទៅគរដុតចោលភ្លាមៗ រីឯកម្មករអារឈើ ជាជនជាតិយួនសុទ្ធនោះ មិនមានកម្មករខ្មែរទេ ហើយមិនចេះនិយាយភាសាខ្មែរមួយម៉ាត់ផងទេ។ នៅពេលថ្ងៃពួកគេ សម្ងំស្ងាត់ហាក់បីដូចមិនមានមនុស្សអ៊ីចឹង ប៉ុន្តែបើយប់វិញ គឺដឹកបទល្មើសព្រៃឈើយ៉ាងសកម្មបំផុត ។
ពាក់ព័ន្ធករណីខាងលើនេះលោក ឡេង យុគ នាយរដ្ឋបាលព្រៃឈើផ្នែកបរកែវ បានអះអាងថា រោងចក្រកែច្នៃឈើសុក្រំខាងលើនេះមានច្បាប់ ហើយការចោទប្រកាន់ថា ក្រុមហ៊ុនលួចចូលកាប់ឈើក្នុងព្រៃ សហគមន៍នោះមិនមានការពិតទេ ពីព្រោះមានក្រុមឈ្មួញ លួចចូលកាប់ហើយឆ្លើយដាក់ក្រុមហ៊ុន។ លោកបន្តថា ចំពោះការអារនៅពេលយប់ អោយតែគេមានច្បាប់ អារនៅពេលណាក៏បានដែរ ហើយលោកបានចុះទៅត្រួតពិនិត្យពីរលើកមកហើយ។
បើទោះជាលោក ឡេង យុគ នាយរដ្ឋបាលព្រៃឈើផ្នែកបរកែវ បានអះអាងយ៉ាងនេះក៏ដោយ ក្នុងច្បាប់ស្តីពីព្រៃឈើ ត្រង់ជំពូក១៣ មាត្រា៦៨ បានចែងថា ទោះជាមានលិខិតអនុញ្ញាតិស្របតាមបទប្បញ្ញត្ថិ នៃច្បាប់នេះក៏ដោយ ក៏ការកាប់ ដើមឈើ ការប្រមូល ការដឹកជញ្ជូនផល អនុផលព្រៃឈើ ក្នុងដែនព្រៃបម្រុងទុកអចិន្ត្រៃយ៍ពីទីតាំងផ្សេង គឺខុសច្បាប់ ត្រូវហាមឃាត់ចាប់ពីម៉ោង៨យប់ ដល់ម៉ោង៥ភ្លឺ ពេលព្រឹក។
ផ្ទុយទៅវិញការដោះសាររបស់លោកនាយផ្នែករដ្ឋបាលព្រៃឈើខាងលើនេះ ត្រូវបានចោទប្រកាន់ដោយប្រជាសហគមន៍ថា ជាការ Lobby ការពារខ្លួន និងឈ្មួញក្រុមហ៊ុនប៉ុណ្ណោះ ព្រោះថា គាត់អាចទទួលការសើមមាត់ប្រចាំខែ ច្រើនគួរសមដែរ ក៊៏ អាចថាបាន (Sic)។/ ដោយ ៖ អារក្ខឈើ
