នាយទាហាននិងពលទាហានដែលស្អប់ខ្ពើមអំពើមិនប្រក្រតីរបស់លោក យ៉ម មឿន បានឲ្យដឹងថា មេបញ្ជាការវរសេនាតូចការពារព្រំដែនលេខ៥០៦ រូបនេះ បានធ្វើជាខ្នងបង្អែកឲ្យឈ្មួញខិលខូចនាំចូលឈើគ្រញូងខុសច្បាប់ពីទឹកដីសៀមចូលទឹកដីខ្មែរតាមច្រករបៀងនិងបើកឲ្យមានបទល្មើសធ្វើអាជីវកម្មរ៉ែមាស នៅស្រុកភ្នំព្រឹកយ៉ាងពេញបន្ទុក ។ លោក យ៉ម មឿន ធ្វើអ្វីៗគិតតែរឿងផលប្រយោជន៍ផ្ទាល់ខ្លួន ហើយមិនគិតពីទុក្ខលំបាករបស់នាយទាហាន និងពលទាហានក្រោមឱវាទនោះទេ។ ក្នុងនាមជាមេបញ្ជាការវរសេនាតូចការពារព្រំដែនលេខ៥០៦ លោក យ៉ម មឿន តែងតែប្រើអំណាចគាបសង្កត់គំរាមកំហែងលើនាយទាហានពលទាហានក្រោមឱវាទយ៉ាងអសីលធម៌ គ្មានហេតុផល បណ្តាលឲ្យនាយទាហាននិងពលទាហានខ្លះសូមចូលនិវត្តន៍មុនកំណត់ ខ្លះទៀតសុំប្តូរអង្គភាព ហើយក៏មានអ្នករត់ចោលជួរជាបន្តបន្ទាប់ផងដែរ។
រឿងអាស្រូវរបស់លោក យ៉ម មឿន មេបញ្ជាការវរសេនាតូចការពារព្រំដែនលេខ ៥០៦ ដែលមានទីតាំងនៅភូមិអូរកណ្តោល ភូមិសន្តិភាព ស្រុកសំពៅលូន ខេត្តបាត់ដំបង ត្រូវនាយទាហាន និងពលទាហានក្នុងអង្គភាពលាតត្រដាងជាសាធារណៈ ដើម្បីឲ្យរដ្ឋមន្ត្រីក្រសួងការពារជាតិ និងស្ថាប័នពាក់ព័ន្ធបានដឹងឮ ផងដែរ។ យោងតាមលិខិតមួយច្បាប់របស់នាយទាហាន និងពលទាហានវរសេនាតូចការពារព្រំដែនលេខ៥០៦ បានឲ្យដឹងថា លោក យ៉ម មឿន បានកាត់របបបន្ថែមរបស់នាយករដ្ឋមន្ត្រីដែលផ្តល់ឲ្យកូនទាហាន កាត់ប្រាក់ខែកងទ័ព និងយកដីអង្គភាពលក់ស្រេចតែអំពើចិត្ត។ ដូច្នេះលោក ប៉ុល សារឿន អគ្គមេបញ្ជាការ នៃកងយោធពលខេមរភូមិន្ទ ក៏ត្រូវពិនិត្យមើលបញ្ហានេះដែរ ដើម្បីកុំឲ្យលោក យ៉ម មឿន អាងអំណាចធ្វើបាបនាយទាហាននិងពលទាហានក្រោយឱវាទរបស់ខ្លួន ស្រេចតែអំពើចិត្តតទៅទៀត។
នៅក្នុងលិខិតរបស់នាយទាហាននិងពលទាហានបានឲ្យដឹងថា លោក យ៉ម មឿន បានកាត់របបបន្ថែមដែលនាយករដ្ឋមន្ត្រី ផ្តល់ឲ្យកូនទាហាន បែងចែករបស់មិនត្រឹមត្រូវ ហើយយកទៅឲ្យប្រពន្ធចុងរបស់ខ្លួននៅស្រុកភ្នំព្រឹក យ៉ាងហូរហៀ។ របបហូបចុកប្រចាំថ្ងៃរបស់កូនទាហាន នៃវរសេនាតូចការពារព្រំដែនលេខ៥០៦ និងគគាំទ្រមិនដែលបានបើកតាំងពីខែមករា ឆ្នាំ២០១២ រហូតមកដល់បច្ចុប្បន្ន មិនដឹងថាលោក យ៉ម មឿន យកទៅធ្វើអ្វីនោះទេ។ ជាងនេះទៅទៀត លោក យ៉ម មឿន បានយកដីទីតាំងកងទ័ពក្នុង ខ១គ២,ខ២គ២ និង ខ១គ១ បែងចែកលក់ដូរស្រេចតែអំពើចិត្ត ហើយបានយកធ្វើជាកម្មសិទ្ធិផ្ទាល់ខ្លួន ដោយគ្មានញញើតអ្វីទាំងអស់៕
