ខេត្តត្បូងឃ្មុំ ៖ប្រជាពលរដ្ឋរាយការណ៏ឲ្យដឹងថាចាប់តាំងពីលោកព្រាបធារ៉ាត(ហៅសិត)ជាមេគយចល័ត
ប្រចាំនៅក្នុងខេត្តត្បូងឃ្មុំគេសង្កេតឃើញឈ្មួញរកស៊ី តូចតាច មានការខឹងសម្បារនិងលោកព្រាបធារ៉ាត(ហៅទិត)គាប បង្ខំឲ្យបង់លុយ ដោយគ្មានការយោគយល់ឡើយ។ ប៉ុន្តែសម្រាប់ក្រុមឈ្មួញធំៗ ដែលរកស៊ីនាំចូល ទំនិញគេចពន្ធ និងអ្នករកស៊ី ដឹកជញ្ជូនឈើខុសច្បាប់ ចេញទៅប្រទេសវៀតណាម ទទួលបានការយោគយល់ពីលោកព្រាបធារ៉ាត(ហៅសិត) ព្រោះការដឹកជញ្ជូន បទល្មើសទាំងនោះ គឺជាប្រភពចំណូលមិនចេះរីងស្ងួតសំរាប់លោកព្រាបធារ៉ាត(ហៅសិត)ដាក់ចូលហោប៉ៅផ្ទាល់ខ្លួន។ប្រជាពលរដ្ឋ បានរាយការណ៍បន្តថា សព្វថ្ងៃលោកព្រាបធារ៉ាត(ហៅសិត)ប្រព្រឹត្តអំពើពុករលួយចំហរ ព្រោះមានទំនិញគេចពន្ធ ជាច្រើនប្រភេទ ដែលឈ្មួញធំៗនាំឆ្លងកាត់ គឺជំនាញគយ របស់លោកព្រាបធារ៉ាត(ហៅសិត)បានឃុបឃិតជាមួយឈ្មួញ បង់ពន្ធរបៀបជាទំនិញក្លែងភេទ និងបង់ពន្ធមិនគ្រប់ជាដើម។ ពេលខ្លះឈ្មួញ ដឹកសុទ្ធតែថ្នាំពេទ្យ គ្រឿងសំណង់ និងទំនិញមានតម្លៃ តែគេបង់ពន្ធ ជារបៀបទំនិញចាប់ហួយ ឬតុ កៅអី ជ័រ ទៅវិញ ហើយការបង់ពន្ធ ក្លែងភេទទំនិញនេះ ក៏គេមិនបង់ទាំងស្រុង មិនគ្រប់ចំនួននោះដែរ យ៉ាងច្រើនគេបង់ ត្រឹមតែ ៤០ទៅ៥០ ភាគរយប៉ុណ្ណោះ ធ្វើឲ្យខាតបង់ ចំណូលថវិកាជាតិ រាប់លានដុល្លារ ក្នុងមួយខែៗ។
សំរាប់ប្រជាពលរដ្ឋ ដែលដឹកផលកសិកម្ម ទៅលក់នៅប្រទេសវៀតណាម បានឲ្យដឹងថា ពួកគាត់ដឹកដំឡូងមី ពោត គ្រាប់ស្វាយចន្ទី បានប្រាក់ចំណេញ តិចតួចប៉ុណ្ណោះ ត្រូវកូនចៅរបស់លោកព្រាបធារ៉ាត(ហៅសិត)គាបយកលុយ ហើយប្រឈមនឹងការស្តីបន្ទោស មើលងាយមើលថោក ដោយសម្តីអសុរោះ។ ប៉ុន្តែសម្រាប់ក្រុមឈ្មួញ រកស៊ីដឹកឈើខុសច្បាប់ ឆ្លងទៅវៀតណាម ដូចជាឈ្មោះ សាន ចយ ឧកញ៉ា លឹម ប៊ុណ្ណា ហៅខ្នា ជាដើម ។គេមិនដែលឃើញ លោកព្រាបធារ៉ាត(ហៅសិត)បញ្ចេញឫកពាឬប្រើសម្តីធំៗ ទៅលើក្រុមឈ្មួញទាំងនោះ ម្តងណាឡើយ ហើយឃុបឃិតគ្នា ជាមួយអ្នករកស៊ីល្មើសច្បាប់ ដើម្បីបានលុយច្រកហោប៉ៅ ដោយមិនខ្វល់ពី ការកែទម្រង់របស់លោក គុណ ញឹម ដែលជាមេគយនោះទេ។
ទំនិញគេចពន្ធទាំងនេះ មិនអាចគេចផុត ពីក្រសែភ្នែកសមត្ថកិច្ចគយ បានទេ តែលោកព្រាបធារ៉ាត(ហៅសិត)បានចាត់ទុកជាឆ្នាំងបាយ ជាប្រយោជន៍ សម្រាប់បំពេញសេចក្តីត្រូវការ របស់ថ្នាក់លើ និងសម្រាប់ការពារតួនាទីនិងតំណែងខ្លួនតែប៉ុណ្ណោះ ។សារពត៌មានយើងមិនអាចទំនាក់ទំនងលោកព្រាបធារ៉ាត(ហៅសិត)បានទេ៕
