កំពង់ធំ ៖ ដោយការឈឺចាប់ពីប្រជាពលរដ្ឋក្រីក្រ និងមានសេចក្តីរាយការណ៍ពីប្រជាពលរដ្ឋក្នុងឃុំមានរិទ្ធិ ស្រុក សណ្តាន់ ខេត្តកំពង់ធំ បានឱ្យការិយាល័យយើងដឹងថា មានករណី ដឹកជញ្ជូនឈើយ៉ាងអនាធិបតេយ្យបំផុត ឆ្លងកាត់ផ្នែក និងសង្កាត់រដ្ឋបាលព្រៃឈើក្នុងតំបន់ទំរីងយ៉ាងរលូនហើយក៏គ្មានសមត្ថកិច្ចពាក់ព័ន្ធទប់ស្កាត់នោះទេ ។
តាមប្រភពពីប្រជាពលរដ្ឋបានឱ្យដឹងថា ឈើអនាធិបតេយ្យរបស់ឈ្មួញទាំងនោះ បានដឹកតាមតំបន់ច្រកតោលទាំង យប់ទាំងថ្ងៃ មានទាំងគោយន្ត ទាំងរថយន្ត និងមានទាំងរថយន្តយីឌុបផងដែរ ក៏ប៉ុន្តែពួកគាត់មានការងឿងឆ្ងល់ ចំពោះមន្ត្រីរដ្ឋបាលព្រៃឈើស្រុកសណ្តាន់ថា ដែលមានតួនាទីជាអ្នកបង្ក្រាប និងប្រឆាំងបទល្មើសព្រៃឈើឆ្លងកាត់ បែរជា បណ្តែតបណ្តោយឱ្យមានបទល្មើសព្រៃឈើកើតឡើងយ៉ាង អនាធិបតេយ្យនៅក្នុងតំបន់គ្រប់គ្រងរបស់ខ្លួន ឬមួយ ក៊អស់លោកទាំងនោះ គិតថា រាជរដ្ឋាភិបាលចាត់ តាំងពួកលោកឱ្យមកសំលឹងមើលតែឈ្មួញដឹកឈើ និងរាប់ក្បាលឡានដាក់ខែយកលុយ ឬយ៉ាងណា ?
បើតាមប្រជាពលរដ្ឋបន្តទៀតថា មេព្រៃស្រុកសណ្តាន់ឥឡូវល្បីណាស់ ល្បីខាងធ្វើបាបប្រជាពលរដ្ឋក្រីក្រ និងបង្កើត រឿងដើម្បីគាបសង្កត់យកលុយពីប្រជាពលរដ្ឋទាំងដែលពួកគាត់ គឺប្រជាពលរដ្ឋស្លូតត្រង់ ហើយប្រជាពលរដ្ឋខ្លះ ដឹកឈើមកធ្វើផ្ទះក៏ត្រូវបានលោកមេព្រៃស្រុកសណ្តាន់គាបសង្កត់ឱ្យបង់ប្រាក់ឱ្យខ្លួនពី ១០ម៉ឺនរៀលទៅ ២០ម៉ឺនរៀល ទើបអនុញ្ញាតឱ្យដឹកទៅដាក់ផ្ទះយ៉ាងជំលើយបំផុត ។
មិនតែប៉ុណ្ណោះ ចំណែកឯរថយន្តធំៗដែលមានដឹកឈើពេញប្រៀប រហូតដល់ហៀរចេញមកក្រៅទៀតនោះ គឺលោកមេព្រៃមិនដែលមើលឃើញ និងចាត់វិធានការបង្ក្រាបនោះទេ មិនដឹងថា តើរថយន្តដឹកឈើទាំងនោះធំពេក ហើយគ្របជិតៗធ្វើឱ្យពួកលោកមើលមិនឃើញ ឬមួយទទួលលុយបង់ខែ ឬយ៉ាងណា ?
ផ្ទុយទៅវិញបញ្ហានេះ ក្រុមប្រជាពលរដ្ឋឃុំមានរិទ្ធិ ស្រុកសណ្តាន់ក៏បានសំណូមពរទៅដល់ លោក អ៊ុត សំអន អភិបាលនៃគណៈអភិបាល ខេត្តកំពង់ធំ គួរតែជួយចាត់វិធានការចំពោះកូនចៅថ្នាក់ក្រោមផង ព្រោះបុគ្គលមួយ ចំនួននេះ មិនជួយប្រជាពលរដ្ឋទេ តែបែរជាកាន់តំណែងដើម្បីធ្វើមានបាន និងជាន់.កប្រជាពលរដ្ឋទៅវិញ ។ ហើយដែលបញ្ហានេះគួរតែថ្នាក់លើមានវិធានការជាបន្ទាន់ផង ។/
ដោយ ៖ ព្រៃឡង់
