ប្រជាពលរដ្ឋនៅក្នុងក្រុងសៀមរាប បានលើកឡើងថា ដោយសារតែអំពើពុករលួយរបស់លោក ទិត្យ ណារ៉ុង និងបក្ខពួកនោះហើយទើបបទល្មើសផ្សេងៗ នៅក្នុងក្រុងសៀមរាបបន្តកើតមានយ៉ាងពេញបន្ទុកជាពិសេស អំពើចារកម្ម ល្បែងស៊ីសង និងគ្រឿងញៀនជាដើម។ហេតុនេះហើយទើបមានការអំពាវនាវឲ្យលោក សត ណាឌី ស្នងការនគរបាលខេត្តសៀមរាបចាត់វិធានការស៊ើបអង្កេតជាបន្ទាន់ចំពោះអំពើពុករលួយ និងភាពមិនប្រក្រតីដែលកើតឡើងក្នុងអធិការដ្ឋាននគរបាលក្រុងសៀមរាប ហើយត្រូវចាត់វិធានការលុបបំបាត់ជាបន្ទាន់បំផុត។
អំពើពុករលួយរបស់លោក ទិត្យ ណារ៉ុង និងបក្ខពួកត្រូវបានលាតត្រដាងជាសាធារណៈតាមរយៈលិខិតអនាមិកដែលបានបាចនៅខាងមុខស្នងការដ្ឋាននគរបាលខេត្តសៀមរាបកាលពីថ្ងៃទី០៧ ខែកក្កដា ឆ្នាំ២០១៥។ នៅក្នុងលិខិតអនាមិកបានបញ្ជាក់ថាលោក ទិត្យ ណារ៉ុង និងបក្ខពួកបានយកលុយប្រចាំខែពីតាមបន់ល្បែងស៊ីសង និងកន្លែងបម្រើផ្លូវភេទលួចលាក់នៅក្នុងក្រុងសៀមរាប។ ដូច្នេះលោក សត ណាឌី ស្នងការនគរបាលខេត្តសៀមរាប ត្រូវចាត់វិធានការស៊ើបអង្កេតជាបន្ទាន់ដើម្បីកុំឲ្យលោក ទិត្យ ណារ៉ុង និងបក្ខពួកឃុបឃិតគ្នាធ្វើអ្វីៗស្រេចតែអំពើចិត្តតទៅទៀត ព្រោះធ្វើឲ្យប៉ះពាល់យ៉ាងខ្លាំងដល់កេរ្តិ៍ឈ្មោះស្ថាប័ននគរបាលជាតិទាំងមូល។
នៅក្នុងលិខិតអនាមិកបានរៀបរាប់ទៀតថាលោក ទិត្យ ណារ៉ុង អធិការនគរបាលក្រុងសៀមរាប បានតែងតាំងមន្ត្រីក្រោមឱវាទនាពេលកន្លងមកតាមរបៀបបក្ខពួកនិយម ឃុបឃិតគ្នាប្រព្រឹត្តអំពើពុករលួយដោយគ្មានញញើតអ្វីទាំងអស់។ ជាងនេះទៅទៀតលោក ទិត្យ ណារ៉ុង បានបណ្ដោយឲ្យមន្ត្រីក្រោមឱវាទរបស់ខ្លួនឈ្មោះ ម៉ុក បូរ៉ា ដើរប្រមូលលុយតាមបនល្បែងគ្រប់ប្រភេទដូចជា ហ្គេម កន្ទុយលេខ កន្លែងម៉ាស្សា និងកន្លែងបម្រើសេវាផ្លូវភេទនៅទូទាំងក្រុងសៀមរាប។ ជាពិសេសលោក ទិត្យ ណារ៉ុង មិនចាត់វិធានការលើមន្ត្រីនគរបាលខិលខូចជាកូនចៅរបស់ខ្លួនដែលយកកាំភ្លើងអាកា បាញ់រះជាច្រើនគ្រាប់ទៅលើអ្នកឆក់ត្រីនៅវាលប្រាំង ក្នុងសង្កាត់ជ្រាវ ក្រុងសៀមរាបកាលពីថ្ងៃទី១៣ ខែមិថុនា កន្លងទៅនោះទេ ៕
