ប្រភពពីឈ្មួញ មួយចំនួនបានឲ្យដឹងថា មេឈ្មួញ ស្រេង ម៉េង ដើរប្រមូលទិញឈើគ្រញូង ធ្នង់ បេង នាងនួន យកទៅស្តុកទុកនៅក្នុងទីតាំងដ៏ធំមួយកន្លែង ស្ថិតនៅក្បែរក្រុមហ៊ុនវាយថ្ម របស់ចិនក្នុងភូមិតាឃែង ឃុំព្រែកមាស ស្រុកសៀមប៉ាង ខេត្តស្ទឹងត្រែង។ ប្រភពបានឲ្យដឹងទៀតថា ឈ្មួញឈ្មោះ ស្រេង ម៉េង ហៅម៉េងបីពូថៅ ប្រមូលទិញឈើពីប្រជាពលរដ្ឋ និងពីសមត្ថកិច្ចដឹកជញ្ចូនតាមទូក និងតាមរថយន្តកែច្នៃយកមកស្តុកទុកក្នុងទីតាំងរបស់ខ្លួនដោយគ្មានសមត្ថកិច្ចណាហ៊ានទៅក្បែរឡើយ។ សូម្បីតែឈើប្រណីតក្នុងឧទ្យានជាតិវីរៈជ័យ និងព្រៃការពារក៏កំពុងវិនាសហិនហោចដោយសារស្នាដៃមេឈ្មួញ ស្រេង ម៉េង ដែលយកឈ្មោះក្រុមហ៊ុន ទ្រី ភាព ទៅប្រើប្រាស់ដើម្បីផលប្រយោជន៍ផ្ទាល់ខ្លួន ។
ប្រភពពីប្រជាពលរដ្ឋក្នុងខេត្តស្ទឹងត្រែង បានឲ្យដឹងថា មេឈ្មួញ ស្រេង ម៉េង កំពុងធ្វើសកម្មភាពប្រមូលទិញឈើប្រណីត និងឈើប្រភេទលេខ១ យ៉ាងពេញបន្ទុកនៅស្រុកសៀមប៉ាង និងស្រុកសេសាន ខេត្តស្ទឹងត្រែង។ មេឈ្មួញរូបនេះបានយកឈ្មោះក្រុមហ៊ុន ទ្រី ភាព ទៅប្រើប្រាស់ដើម្បីផលប្រយោជន៍ផ្ទាល់ខ្លួន គ្មានសមត្ថកិច្ចណាហ៊ានប៉ះពាល់ឡើយ ។ គេមិនដឹងថាក្រុមហ៊ុន ទ្រី ភាព បានដឹងពីករណីឈ្មួញ ស្រេង ម៉េង យកឈ្មោះក្រុមហ៊ុនទៅប្រើដើម្បីផលប្រយោជន៍ផ្ទាល់ខ្លួន ឫយ៉ាងណានោះទេ ព្រោះឈ្មួញ ស្រេង ម៉េង តែងតែអួតអាងថា ខ្លួនជាអ្នកប្រមូលទិញឈើឲ្យក្រុមហ៊ុន ទ្រី ភាព ក្នុងខេត្តស្ទឹងត្រែងទាំងមូល។
ប្រភពដែលជិតស្និទ្ធ និងមេឈ្មួញ ស្រេង ម៉េង បានឲ្យដឹងថា តាមរយៈការប្រមូលទិញឈើនៅក្នុងខេត្តស្ទឹងត្រែង គឺមេឈ្មួញរូបនេះអាចសល់លុយទិញងារ ជាឧកញ៉ា ដើម្បីពង្រីកឥទ្ធិពលរបស់ខ្លួនក្រោមលេសជាមេការរបស់ក្រុមហ៊ុន ទ្រី ភាព យ៉ាងគឃ្លើនបំផុត។ អភិបាលខេត្តស្ទឹងត្រែងលោក កុល សំអុល និងមេរដ្ឋបាលព្រៃឈើខេត្តស្ទឹងត្រែងលោក ឈាង តុលា ត្រូវបានគេដឹងថា រង់ចាំទទួលផលប្រយោជន៍ពីមេឈ្មួញ ស្រេង ម៉េង ជាប្រចាំទើបបណ្ដោយឲ្យមេឈ្មួញរូបនេះ ប្រមូលទិញឈើ និងបញ្ជូនកម្មករឲ្យចូលកាប់ឈើក្នុងព្រៃការពារ និងឧទ្យានជាតិយ៉ាងមហន្តរាយ។ លោក ឆេង គឹមសុន អគ្គនិយករដ្ឋបាលព្រៃឈើ និងលោក អ៊ុក រ៉ាប៊ុន រដ្ឋមន្ត្រីក្រសួង កសិកម្ម ត្រូវចាត់វិធានការទប់ស្កាត់ជាបន្ទាន់ទៅលើ មេឈ្មួញ ស្រេង ម៉េងដែល កំពុងតែបំផ្លាញព្រៃឈើក្នុងខេត្តស្ទឹងត្រែង ៕
