ជនហ្វ៊ីលីពីនរាប់ពាន់នាក់ដែលនៅមានជីវិតពីខ្យល់ព្យុះហៃយ៉ាន់បានផ្ទុះការអបអរជាខ្លាំងកាលពីថ្ងៃអាទិត្យនៅពេលកីឡាករប្រដាល់មែននី ប៉ាកគីអៅ វាយឈ្នះពិន្ទុះដាច់លើកីឡាករអាមេរិក ប្រ៊ែនដុន រីយ៉ូស ក្នុងការប្រកួតនៅទីក្រុងម៉ាកាវ ។
អាដេល ណេបាសា អ្នកបោសសម្រាមតាមផ្លូវម្នាក់ដែលបានបាត់បង់ផ្ទះក្នុងព្យុះកាលពីថ្ងៃ៨វិច្ឆិកា បាននិយាយថា”ខ្ញុំមានអារម្មណ៍ថាហាក់ដូចបានផ្ទះរបស់ខ្ញុំមកវិញ” ។
ពួកមន្ត្រីជឿថា ការទស្សនាការប្រកួតប្រដាល់ដែលវីរបុរសរបស់គេទទួលបានជោគជ័យលើរីយ៉ូស បានជួយអ្នកនៅរស់ដែលកំពុងបាក់ស្បាតនោះអោយបង្វែរអារម្មណ៍របស់ពួកគេចេញពីមហន្តរាយដ៏គួរអោយរន្ធត់ដែលរហូតមកទល់ពេលនេះបានឆក់យកជីវិតមនុស្សប្រមាណ៧ពាន់នាក់ ។
ណេបាសា ដែលបានទស្សនាការប្រកួតជាមួយកូនប្រុសនិងមនុស្សរាប់ពាន់នាក់ទៀតនៅទីក្រុងតាក្លូបាន បាននិយាយថា”ខ្ញុំរីករាយណាស់និងចង់ស្រែកយំតែមានមនុស្សច្រើនពេក ។ វាហាក់ដូចជាមានព្យុះមួយប្រសិនបើគាត់ចាញ់” ។
អ្នកនៅរស់ម្នាក់ទៀតបានគ្រវីបដាដែលមានសរសេរអក្សរថា”យើងគាំទ្រប៉ាកគីអៅ ព្រះជួយគាត់ ។ តាក្លូបាន នឹងងើបជាថ្មី” ។
សំរាប់ការវិលមកកាន់សង្វៀនជាថ្មីរបស់លោក ប៉ាគីអៅ ដែលដណ្តើមបានខ្សែក្រវាត់អន្តរជាតិWBO បានប្តេជ្ញានិងបូជ្ញាខ្ពស់សំរាប់ជនរងគ្រោះពីព្យុះ និងបានសន្យាទៅទស្សនាក្រុងតាក្លូបាន ព្រមទាំងតំបន់ជុំវិញ ដែលរងការវាយប្រហារដោយព្យុះ ។ នៅពេលស្នូរជួងបន្លឺឡើងបញ្ជាក់ការបញ្ចប់ទឹកទី១២ អ្នកទស្សនាជាច្រើននៅតាក្លូបាន បានគ្រវែងមួក អាវ និងរបស់របរផ្សេងៗចូលក្នុងអាកាស ទោះជាលទ្ធផលផ្លូវការនៅមិនទាន់ប្រកាសក៏ដោយ ។ នៅម៉ាកាវ សង្វៀនចំណុះ១៣.០០០នាក់ មានមនុស្សចូលទស្សនាពេញ ដោយទស្សនិកជនជាច្រើនជាជនជាតិហ្វ៊ីលីពីនដែលរស់ឬក៏ធ្វើការនៅម៉ាកាវ ឬនៅហុងកុងជាប់គ្នានោះ។អ្នកខ្លះទៀតបានធ្វើដំណើរទៅពីហ្វ៊ីលីពីន៕
