សម្បុកបនល្បែងស៊ីសងបៀរ អាប៉ោង កន្ទុយលេខ និងបនពេស្យាចារ (ហៅថា ស្រីខូច)បើកយ៉ាងគគ្រឹកគគ្រេង ស្ថិតនៅក្នុងស្រុកស្អាង ខេត្តកណ្តាល បង្កឱ្យមានបទល្មើសចោរលួច ចោរប្លន់ ចោរលួចគាស់ផ្ទះជាច្រើនករណី នាំឱ្យប្រជាពលរដ្ឋទូទាំងស្រុកស្អាងសព្វថ្ងៃនេះមានការព្រួយបារម្ភ ភ័យខ្លាចយ៉ាងខ្លាំងណាស់ ដោយសារសមត្ថកិច្ច មិនមានវិធានការបង្ក្រាប ។
ប្រភពរាយការណ៍ពីប្រជាពលរដ្ឋក្នុងស្រុកស្អាងបានឱ្យដឹងថា កន្លងមកថ្មីៗនេះមានករណីចោរប្លន់ អ្នកចិញ្ចឹមមាន់ និងលក់មាន់ម្នាក់នៅចំណុចក្បែរដីចំការរបស់លោក អ៊ាវ ចំរើន ស្នងការនគរបាលខេត្តកណ្តាល ស្ថិតក្នុងឃុំព្រែកគយ ស្រុកស្អាង ខេត្តកណ្តាល យកបានលុយចំនួនជាង បីម៉ឺនដុល្លារអាមេរិក គេចខ្លួនដោយសុវត្ថិ ភាព កាលពីថ្ងៃទី ២៥ ខែមីនា ឆ្នាំ២០១៤ វេលាម៉ោង ១ៈ០០នាទីរសៀល ជនរងគ្រោះឈ្មោះ សន គីមសាយ ភេទប្រុស អាយុ ៤៨ឆ្នាំ រស់នៅភូមិព្រែកស្នង ឃុំព្រែកគយ ស្រុកស្អាង ខេត្តកណ្តាល ក្រោយបានលក់មាន់ហើយនោះ ។
ពាក់ព័ន្ធនឹងករណីដែលកើតឡើងជាច្រើននៅក្នុងស្រុកស្អាងនេះ គឺបណ្តាលមកពីភាពធូររលុងអាជ្ញាធរ និងសមត្ថកិច្ចប៉ូលិសតែម្តង ដែលបានបណ្តែតបណ្តោយឱ្យមានការបើកល្បែងស៊ីសងគ្រប់ប្រភេទ ជាពិសេសគឺបទ ពេស្យាចារ (ហៅស្រីខូច) និងកន្ទុយលេខ បៀរ អាប៉ោង និងជួញដូរគ្រឿងញៀនយ៉ាងគគ្រឹកគគ្រេង ដោយគ្មាន អាជ្ញាធរ និងសមត្ថកិច្ចប៉ូលិសគ្មានចំណាត់ការបង្ក្រាបនោះទេ ដូចជា ករណីបទល្មើសកើតឡើងនោះ គឺនៅក្នុងឃុំរការខ្ពស់ ឃុំព្រែកគយ ឃូំស្អាងភ្នំ ឃុំស្វាយប្រទាល ឃុំសិត្បូ ឃុំស្វាយរលំ ស្រុកស្អាង ខេត្តកណ្តាល ចំណុចឃុំទាំងអស់នេះ គឺសំបូរទៅដោយការបើកល្បែងស៊ីសងដូចខាងលើ ដែលបង្កឱ្យប្រជាពលរដ្ឋស្លូតត្រង់មានការ ព្រួយបារម្ភភ័យខ្លាចជាខ្លាំងក្នុងការរស់នៅសព្វថ្ងៃនេះ ដូចជា កើតឡើងនូវអំពើហិង្សាក្នុងគ្រួសារចោរលួច ចោរប្លន់ ចោរលូចគាត់ផ្ទះដោយសារតែចាញ់ល្បែង ឬគ្មានលុយទិញញៀនជក់នោះ ។
តាមប្រភពបានបន្តឱ្យដឹងទៀតថា ការបើកល្បែងស៊ីសងពាលាអាវ៉ាសែបៀរ អាប៉ោង កន្ទុយលេខ បានដោយ សុខស្រួលនេះបានដោយសារតែមានការឃុបឃិតជាមួយអាជ្ញាធរ និងសមត្ថកិច្ចប៉ូលិស ជាពិសេសគឺលោកអធិការ ស្រុកស្អាងតែម្តង ។ ហើយដែលបញ្ហានេះត្រូវបានគេមើលឃើញអធិការស្រុកស្អាងមិនខ្វល់ និងរំលោភទៅលើអភិបាលកិច្ច ល្អភូមិ-ឃុំ សុវត្ថិភាពធ្វើយ៉ាងណាឱ្យតែបានលុយខែហូរចូលហោប៉ៅ ។
បើតាមប្រភពពីមន្ត្រីតូចតាចម្នាក់សុំមិនបញ្ចោញឈ្មោះបាន ឱ្យដឹងថា សង្ស័យមេកន្ទុយលេខទាំងអស់ក្នុង ស្រុកស្អាង បានបង់លុយឱ្យលោកអធិការប្រចាំខែអស់ហើយ បានជាគ្មានញញើតសមត្ថកិច្ចប៉ូលិសសោះ ជួនកាល មេឆ្នោតចូលលក់ដល់ ក្នុងប៉ុស្តិ៍ប៉ូលិសទៀតផង គឺវាផ្ទុយពីគោលនយោបាយ៩ចំណុចភូមិ –ឃុំមានសុវត្ថិភាពរបស់ ប្រមុខរាជរដ្ឋាភិបាលឱ្យមាន ប្រសិទ្ធិភាពនោះទេ ។/ ដោយ ៖ ជ្រៃធំ
