ប្រជាពលរដ្ ឋនៅក្នុងស្រុកសេសានបាន ឲ្យដឹងថាឈើប្រណីត ក្នុងព្រៃការពារ ព្រៃអភិរក្សរបស់សហគមន៍ ស្ទើរតែវិនាសហិន ហោចអស់ទៅហើយ ដោយសារស្នាដៃឧកញ៉ា លឹម ប៊ុណ្ណា ហៅខ្នាដ៏មានឥទ្ធិពល និងមានខ្នងបង្អែក ចាំការពារ គ្រប់ពេលវេលា ។សូម្បីតែដើមច្បោះ ជ័ររបស់ជនជាតិដើមភាគតិចក៏ប្រឈមនឹងការកាប់រំលំដឹកជញ្ជូនធ្វើ អាជីវកម្មខុសច្បាប់យ៉ាងអនាធិបតេយ្យដែរដែលជាហេតុធ្វើឲ្យប៉ះពាល់ យ៉ាងខ្លាំងដល់ជីវភាពរស់នៅរបស់ជនជាតិដើមភាគតិច។ ឈើដែលមេការឈ្មោះ សាន ចយ និងឧកញ៉ា លឹម ប៊ុណ្ណា ហៅខ្នាប្រមូលទិញបានត្រូវបានគេដឹកជញ្ជូនតាមផ្លូវជាតិលេខ៧៨អា ឆ្លងកាត់ចំណុចអូរពងមាន់ ខេត្តស្ទឹងត្រែង ឆ្ពោះទៅខេត្តក្រចេះនិងខេត្តត្បូងឃ្មុំ ដើម្បីយកទៅលក់ឲ្យឈ្មួញយួន។ប្រការនេះហើយដែលធ្វើឲ្យឈើប្រណីត ក្នុងព្រៃការពារព្រៃដែនជម្រកសត្វ ព្រៃសហគមន៍ និងឧទ្យានជាតិវីរជ័យកំពុងប្រឈមនឹងមហន្តរាយព្រោះមេឈ្មួញ លឹម ប៊ុណ្ណានិងបក្ខពួកកំពុងឃុបឃិតគ្នាបំផ្លាញតាមអំពើចិត្ត។
សេចក្តីរាយការណ៍ពីមន្ត្រីរាជការក្នុងខេត្តស្ទឹងត្រែងបានឲ្យដឹងថា បច្ចុប្បន្ននេះ ឈ្មោះ សាន ចយ ដែលជាមេការឧកញ៉ា លឹម ប៊ុណ្ណាហៅខ្នា នៅតែបន្តប្រមូលទិញឈើប្រណីតស្តុកទុកក្នុងខេត្តស្ទឹងត្រែងដើម្បី ដឹកជញ្ជូនទៅលក់នៅស្រុកយួនយ៉ាងរលូន។ ប្រភពបានឲ្យដឹងទៀតថាឧកញ៉ា លឹម ប៊ុណ្ណា ហៅខ្នាជាអ្នកប្រមូលទិញឈើធំជាងគេនៅក្នុងខេត្តស្ទឹងត្រែង ដោយមានមេការឈ្មោះសាន ចយ ចាំប្រមូលទិញពីប្រជាពលរដ្ឋដែលចូលព្រៃកាប់ឈើខុសច្បាប់។សមត្ថកិច្ច ពាក់ព័ន្ធដូចជា មន្ត្រីរដ្ឋបាលព្រៃឈើ មន្ត្រីបរិស្ថាននិងនគរបាលប្រឆាំងបទល្មើសសេដ្ឋកិច្ចជាដើម មិនហ៊ានប៉ះពាល់ឧកញ៉ាលឹម ប៊ុណ្ណា ហៅខ្នា ព្រោះដឹងថាឧកញ៉ាម្នាក់នេះមានខ្នងបង្អែករឹងមាំដូចភ្នំ។
ប្រភពពីមន្ត្រីអង្គការក្រៅរដ្ឋាភិបាលឃ្លាំមើលបទល្មើសបំផ្លាញព្រៃឈើ ក្នុងខេត្តស្ទឹងត្រែងបានឲ្យដឹងថាឈើប្រណីតក្នុងព្រៃការពារនិងព្រៃ អភិរក្សនៅស្រុកសេសាន កំពុងប្រឈមនឹងសេចក្តីវិនាសដោយសារស្នាដៃឧកញ៉ា លឹម ប៊ុណ្ណាហៅខ្នា និងមេការឈ្មោះ សាន ចយ ចៀសមិនផុតឡើយ។ ឈ្មោះ សាន ចយពេលខ្លះចូលទៅទិញឈើតាមបណ្ដាស្រុកនានាក្នុងខេត្តរតនគិរីហើយ ដឹកជញ្ជូនចូលមកខេត្តស្ទឹងត្រែងតាមរថយន្តធំៗធ្វើឲ្យបាក់ស្ពាននិង ខូចផ្លូវជាបន្តបន្ទាប់ហើយពុំមានមន្ត្រីស្ថាប័នពាក់ព័ន្ធណាហ៊ាន ចាត់វិធានការតាមច្បាប់ទេ។មន្ត្រីរដ្ឋបាលព្រៃឈើនិងសមត្ថកិច្ចតាម ដងផ្លូវចាំតែទទួលផលប្រយោជន៍បន្តិចបន្តួចពីឧកញ៉ា លឹម ប៊ុណ្ណា ហៅខ្នាប៉ុណ្ណោះព្រោះបើហ៊ានបង្ក្រាបរថយន្តដឹកឈើរបស់មេឈ្មួញ រូបនេះប្រាកដជាបាត់បង់តួនាទីឬរបូតស័ក្តិពីលើស្មាជាមិនខានឡើយ៕
