លោកក្រាញ់មេឈ្មួញរកស៊ីដឹកឈើដុះស្លែល្បីឈ្មោះបោះសំលេងយូរ ឆ្នាំណាស់មកហើយនៅខេត្តសៀមរាបឥឡូវកំពុងតែសំរុកដឹកឈើអត់ច្បាប់ យ៉ាងគគ្រឹគគគ្រេងហើយថែមទាំងមានអតីតឈ្មួញឈើដ៏ល្បីម្នាក់ឈ្មោះ យិនថាវកំពុងតែចេញមុខកាងពីក្រោយខ្នងទៀតផង។
ជាក់ស្តែងនៅព្រឹក ថ្ងៃទី១៨ខែធ្នូឆ្នាំ២០១៥នេះវេលាម៉ោង១២និង១៦នាទីរសៀលមានរឺម៉កដឹកឈើចល័យចេញ ពីកន្លែងស្តុកឈើរបស់លោក យិនថាវស្ថិតក្នុងភូមិអញ្ចាញ សង្គាត់នគរធំ ក្រុងសៀមរាប (ខាងត្បូងទ្រនប់អញ្ចាញ) តាមដងផ្លូវលេខ៦០ម៉ែត្រ យកមកលក់អោយដេប៉ួតារ៉េ ដែលស្ថិតនៅជាប់ផ្លូវ៦០ម៉ែត្រទល់មុខសារមន្ទីរក្រហម។
អ្នកកាសែតមួយរូបដែលតាមថតរឺម៉កដឹកឈើខាងលើបានអោយដឹងថានៅពេល រូបគាត់តាមថតរឺម៉កដឹកឈើខាងលើនេះ ស្រាប់តែលោក យិនថាវចុះពីរថយន្តសាំងយ៉ុងពណ៍សមកថាអោយរូបលោកថា ˝មេចឯងមកថតធ្វើអីឈើជារបស់អាក្រាញ់ទេ ឯងមិនស្រណោះវាទេឬ? ហើយបើឯងមិនយល់មុខវា ឯងក៏គួរតែយោគយល់អញ់ដែរព្រោះនៅខេត្តសៀមរាបអ្នកណាក៏គេយោគយល់មុខអញ់ ដែរ˝។អ្នកកាសែតដែលតាមថតរូបសកម្មភាពដឹកឈើអត់ច្បាប់របស់លោកក្រាញ់ ខាងលើនេះបានបញ្ជាក់បន្ថែមថា លោកបានទូរស័ព្ទរាយការណ៍ជូនលោក ទាគឹមសុទ្ធនាយខណ្ឌរដ្ឋបាលព្រៃឈើខេត្តសៀមរាបភ្លាមៗបន្ទាប់ពីឃើញ សកម្មភាពដឹកឈើចល័តយ៉ាងគគ្រឹកគគ្រេងបែបនេះ តែលោកទាគឹមសុទ្ធ ថាជាប់ប្រជុំរួចក៏បិទទូរស័ព្ទបាត់ទៅ។
លោក ក្រាញ់បានប្រាប់តាមទូរស័ព្ទនៅរសៀលថ្ងៃទី១៨ដដែលនេះថាឈើដែលដឹកចូល ដេប៉ូលោករ៉េខាងលើនោះពិតជាឈើរបស់គាត់មែន។លោកក្រាញ់បានបន្ថែមថា គាត់ដឹកឈើពីខេត្តព្រះវិហារមកលក់នៅខេត្តសៀមរាប មានច្បាប់ខ្លះ អត់មានច្បាប់ខ្លះហើយអ្នកកាសែតដែលទៅថតរូបនោះគាត់បានទូរស័ព្ទអោយ ទៅយកលុយ១០ម៉ឺនរៀលគ្រាន់ចាក់សាំង តែគេមិនព្រមយក បើមិនយកក៏មិនដឹងធ្វើមេចដែរ។
លោក យឹមស៊ីវននាយសង្កាត់រដ្ឋបាលព្រៃឈើក្រុងសៀមរាបបានប្រាប់តាម ទូរស័ព្ទនៅរសៀលនេះផងដែរថា លោកមិនដែលដឹងថា ឈ្មោះក្រាញ់ឬឈ្មោះថាវបានកាត់ច្បាប់ដឹកឈើនោះទេនៅពេលថ្មីៗនេះ។
លោក រ៉េ ថៅកែដេប៉ូលក់ឈើដែលមានយីហោ ដេប៉ូតារ៉េដែលស្ថិតនៅផ្លូវ៦០ម៉ែត្រក្នុងភូមិអញ្ចាញ សង្កាត់នគរធំ ក្រុងសៀមរាបបានប្រាប់តាមទូរស័ព្ទនៅរសៀលម៉ោង២និង១៤នាទីនេះថាលោកពិត ជាបានទិញឈើពីលោក យិនថាវ ពិតប្រាកដមែនហើយឈើដែលលោកបានទិញនោះជាប្រភេទឈើសុក្រមដែលមានមុខធំៗ។ លោករ៉េបានបន្ថែមថាលោកខានទិញឈើលោកយិនថាវយូរហើយ ទើបតែបានទិញព្រឹកមិញនេះឯង។
តាមប្រភពព័ត៌មានបានលួចបង្ហើបថា លោកយិនថាវចាប់ផ្តើមរកស៊ីដឹកឈើឡើងវិញនៅខេត្តសៀមរាបអស់រយៈពេល ប្រហែលជិត៣ខែហើយ តែមិនចេញមុខខ្លួនឯងនោះទេអោយឈ្មោះក្រាញ់ជាអ្នកចេញមុខជំនួសទៅ វិញ។
អ្នកយកព័ត៌មានយើងមិនអាចសុំការបកស្រាយពីលោក យិនថាវ បានទេ ព្រោះទូរស័ព្ទខលមិនចូលនៅរសៀលថ្ងៃទី១៨នេះ។
សូមសមត្ថកិច្ចពាក់ព័ន្ធបទល្មើសព្រៃឈើនៅខេត្តសៀមរាបមេត្តាជួយទប់ ស្កាត់បទល្មើសព្រៃឈើផង កុំសម្ងំយកពិសពេកព្រោះព្រៃឈើជិតរលាយហិនហោចអស់ហើយ៕ ដោយ៖ ផ្លុងរ៉េត
