សេចក្ដីរាយការណ៍ពីប្រជាពលរដ្ឋរស់នៅតំបន់ភ្នំឱរ៉ាល់នៃ ខេត្តពោធិ៍សាត់ បានឲ្យដឹងថាអ្នកភូមិអាចចូលទៅកាប់ឈើនៅក្នុងតំបន់ដែនជម្រកសត្វព្រៃ ភ្នំឱរ៉ាល់បានដោយសេរី ហើយឈើទាំងនោះត្រូវយកមកលក់ឲ្យក្រុមមនុស្សរបស់លោក ប៉ាន់មរកត បើមិនដូច្នេះទេត្រូវប្រឈមនឹងការបង្ក្រាប។ ជាងនេះទៅទៀតលោកប៉ាន់ មរកតបានដាក់កម្លាំងក្រោមឱវាទរបស់ខ្លួនឲ្យចាំចាប់រទេះដឹកឈើចេញពី ភ្នំឱរ៉ាល់ ដើម្បីឲ្យបង់លុយតាមការកំណត់ហើយត្រូវវាស់ឈើគិតលុយតែម្តង។ មន្ត្រីរាជការក្នុងខេត្តពោធិ៍សាត់បានបញ្ជាក់ថា លោក ប៉ាន់ មរកត ត្រូវជាប្អូនថ្លៃរបស់លោក ថៃ ចន្ថាអតីតប្រធានមន្ទីរបរិស្ថានខេត្តពោធិ៍សាត់ហើយកំពុងតែប្រើរូបមន្ត របស់លោក ថៃ ចន្ថាដើម្បីប្រមូលផលប្រយោជន៍ ។ ដូច្នេះលោក សាយ សំអាល់រដ្ឋមន្ត្រីក្រសួងបរិស្ថាន គួរចាត់វិធានការទៅលើលោក ប៉ាន់ មរកតនិងបក្ខពួកជាបន្ទាន់ព្រោះឈើប្រណីតនិងឈើប្រភេទលេខ១ក្នុង ដែនជម្រកសត្វព្រៃភ្នំឱរ៉ាល់កំពុងប្រឈមនឹងសេចក្ដីវិនាស។
ប្រជាពលរដ្ឋក្នុងខេត្តពោធិ៍សាត់ បានអំពាវនាវឲ្យលោក សាយ សំអាល់រដ្ឋមន្ត្រីក្រសួងបិរស្ថានចាត់វិធានការទប់ស្កាត់បទល្មើសកាប់ ឈើនិងដឹកជញ្ជូនឈើខុសច្បាប់នៅក្នុងដែនជម្រកសត្វព្រៃភ្នំឱរ៉ាល់ ជាបន្ទាន់បើមិនដូច្នេះទេព្រៃឈើក្នុងតំបន់នេះត្រូវវិនាសហិនហោចចៀស មិនផុតឡើយ។ ដោយហេតុថាលោក ប៉ាន់ មរកតជាប្រធានស្ដីទីនៃមន្ទីរបរិស្ថានខេត្តពោធិ៍សាត់និងជានាយក ដែនជម្រកសត្វព្រៃភ្នំឱរ៉ាល់មិនបានចាត់វិធានការបង្ក្រាបបទល្មើស បំផ្លាញព្រៃឈើនោះទេហើយកំពុងប្រមូលផលប្រយោជន៍ពីបទល្មើសព្រៃឈើ ។ហេតុនេះហើយទើបបទល្មើសកាប់ឈើនិងដឹកជញ្ជូនឈើក្នុងតំបន់ ដែនជម្រកសត្វព្រៃភ្នំឱរ៉ាល់ ខេត្តពោធិ៍សាត់ កំពុងកើតឡើងយ៉ាងអនាធិបតេយ្យបំផុត។
មន្ត្រីរាជការនិងប្រជាពលរដ្ឋក្នុងខេត្តពោធិ៍សាត់ បានអះអាងថាជំនាន់លោក ថៃ ចន្ថា ធ្វើជាប្រធានមន្ទីរបរិស្ថានខេត្តពោធិ៍សាត់គឺបទល្មើសកាប់ឈើនិង ដឹកជញ្ជូនឈើចេញពីតំបន់ដែនជម្រកសត្វព្រៃភ្នំឱរ៉ាល់ពុំមានសកម្មភាព ខ្លាំងក្លាដូចសព្វថ្ងៃនេះទេ។ ប៉ុន្តែនៅពេលលោកប៉ាន់ មរកត ទទួលបានតំណែងជាប្រធានស្ដីទីមន្ទីរបរិស្ថានខេត្តពោធិ៍សាត់និងជានាយក ដែនជម្រកសត្វព្រៃភ្នំឱរ៉ាល់ស្រាប់តែឃុបឃិតឲ្យមានបទល្មើសកាប់ឈើ និងដឹកជញ្ជូនឈើយ៉ាងគគ្រឹកគគ្រេងតែម្តង។ ប្រភពបានលើកឡើងថាទំនងជាលោក ប៉ាន់ មរកតគ្មានសង្ឃឹមថាទទួលបានតំណែងជាប្រធានមន្ទីរបរិស្ថានខេត្តពោធិ៍សាត់ ពេញសិទ្ធិទើបឆ្លៀតឱកាសក្នុងតំណែងជាប្រធានស្ដីទីដើម្បីប្រមូលលុយ ពីបទល្មើសព្រៃឈើយ៉ាងពេញបន្ទុកតែម្តង៕
